Yocuwa 7 - The Holy Bible In Alur (Lur) Revised Orthography

Dubo pa Akan

¹ Ento nyithindho mir Israel gikier i gin m’akwong’a; kum Akan, ma wod Karmi, ma wod Zabdi, ma wod Zera, mi suru pa Yuda, gamu kum gin m’akwong’a: man ng’ecwiny pa Yehova opo kum nyithindho mir Israel.

² Man Yocuwa oro dhanu ai i Yeriko cidho i Ai, ma ni i ng’et Beth-aven, yo nyangu ni Beth-el, man eyero igi, ewacu kumae, Wuidh malu man wulib ng’ombe. E dhanu giidho malu man gilibo Ai.

³ Man gidwogo ba Yocuwa, man giwacu ire kumae, Dhanu ceke kud uidh malu; ento wek dhanu ma yenyo romo rubanga ario kadi adek giidh malu gigoi Ai; kud wuketh dhanu ceke gisendri ku tic kuca; kum dhanune gi nok.

⁴ Kum kumeno kind dhanu ma yenyo romo rubanga adek uidho kuca: e giringo i wang’ dhanu mi Ai.

⁵ Man dhanu mi Ai goyo kindgi ma yenyo romo dhanu pier adek wi abusiel; man giriemogi kud i wang’ dhugang’ cil kum Cebarim, man gigoyogi i ka m’alora: man adunde dhanu ng’oi ndiri, man gidoko calu pi.

⁶ E Yocuwa yeco kendi pare, man epodho arieba wang’e i ng’om i wang’ sanduk pa Yehova maram uthieno wok ko, en ku judongo mir Israel; man giketho utur i wigi.

⁷ Man Yocuwa wacu kumae, Aka, E Rwoth Yehova, nedi ikelo dhanu maeni loka Yordan, kara imiwa i cing’ Juamori, uketh warwinyi? a mundo ande wayi wabed loka Yordan ba!

⁸ Ei, Rwoth, abiwacu ang’o, yo ng’ei loko ng’ec ma Israel giloko i wang’ judegi migi!

⁹ Kum Jukanani ku ju m’ubedo i ng’om ceke gibiwinjo pire, man gibitiekowa gbur man gibithumo nyingwa woko kud i ng’om: e ibitimo ang’o pi nyingi ma dwong’i?

¹⁰ Man Yehova wacu ni Yocuwa kumae, Ai malu; pirang’o ipodho kumeno arieba weng’i?

¹¹ Israel udubo; eyo, gikadhu ku wi lembariba para m’ang’olo igi: eyo, gigamu kum gin m’akwong’a, man gikwalu bende, man gimung’o bende; e gikethe i kind jamni migi ma dhe.

¹² Ka kumeno nyithindho mir Israel ucopo cungo ngo i wang’ judegi migi; giloko ng’eigi i wang’ judegi migi, kum gidoko ju ma kwong’ ni i wigi: wabibedo wakudu kendo ngo, tek wunyotho gin m’akwong’a ngo kud i kindwu.

¹³ Ai malu, dwok dhanu leng’, man iwac kumae, Wudwokru giwu leng’ mir urwo: kum Yehova, Mungu mir Israel uwacu kumae, Gin ma jukwong’o ni i kindi, E Israel; icopo cungo ngo i wang’ judegini, ma fodi wukukabu gin m’akwong’a woko ngo kud i kindwu.

¹⁴ Ka kumeno kugweno jubikelowu ceng’ni ku ba suru mu ku ba suru mu: man ebibedo, nia suru ma Yehova bigamu bibino ceng’ni ku ba wat ku ba wat; man wat ma Yehova bigamu bibino ceng’ni ku ba juot ku ba juot; man juot ma Yehova bigamu bibino ceng’ni ku ba dhanu ku ba dhanu.

¹⁵ Man ebibedo, nia ng’atu ma jugame ku gin m’akwong’a jubiwang’e ku mac, en ku gin ceke m’ebedo ko; kum ekadhu ku wi lembariba pa Yehova, man kum etimo kasegu i kind Israel.

¹⁶ Kum kumeno Yocuwa ai malu pir kugweno, man ekelo Israel ceng’ni ku ba suru migi ku ba suru migi; man jugamu suru pa Yuda:

¹⁷ e ekelo wat pa Yuda ceng’ni; man egamu wat mi Juzerahi: e ekelo wat mi Juzerahi ceng’ni dhanu ku ba dhanu; e jugamu Zabdi:

¹⁸ man ekelo juode ceng’ni dhanu ku ba dhanu; e jugamu Akan, ma wod Karmi, ma wod Zabdi, ma wod Zera, mi suru pa Yuda.

¹⁹ E Yocuwa wacu ni Akan kumae, Woda, akwei, mi dwong’ ni Yehova, Mungu mir Israel, man ituc ire; yer ira kawono pi gin m’itimo; kud imung’e ira.

²⁰ Man Akan uloko lembe ni Yocuwa, ewacu de kumae, Andha adubo ni Yehova, Mungu mir Israel, man atimo kuman kuman:

²¹ kinde m’aneno kanzu ma ber mi Babeli i kind ayeki, man cekel mi mola ma tar dak ario, man jamb mola ma kwar ma pekne cekel pier abic, e aketho cwinya i kumgi, man agamugi; man, nen, gibedo akana i ng’om i die hema para, ku mola ma tar i there.

²² Kum kumeno Yocuwa oro jukwenda, man giringo ba hema; man, nen, ebedo akana i hema pare, man mola ma tar ni i there.

²³ E gigamugi kud i die hema, man gikelogi ba Yocuwa, man ba nyithindho mir Israel ceke; e gikethogi piny i wang’ Yehova.

²⁴ Man Yocuwa, kud Israel ceke gikugi, gimaku Akan ma wod Zera, ku mola ma tarne, ku kanzune, ku jamb mola ma kwarne, ku wote, man nyige, ku koni dhiang’ pare, man kana pare, man rombe pare, ku hema pare, ku gin ceke m’ebedo ko: man giterogi malu i poga mir Akor.

²⁵ Man Yocuwa wacu kumae, Isendowa nedi? Yehova bisendi tin. E Israel ceke gicanye ku kidi; man giwang’ugi ku mac, man gicanyugi ku kidi.

²⁶ E girodo kidi ma dit i wie, cil i ceng’ ma tin; e Yehova lokre ni lak ng’ecwiny pare. Kum kumeno julwong’o nying’ kakeno kumae, poga mir Akor, cil i ceng’ ma tin.