Yocuwa 5 - The Holy Bible In Alur (Lur) Revised Orthography

Jutimo Yaa ku Kadhukuwijo i Gilgal

¹ Man etimbre, kinde m’ubimo ceke mi Juamori, ma gini loka Yordan yo reto, kud ubimo ceke mi Jukanani, ma gini dhu nam, giwinjo maram Yehova dwono ko pi mi Yordan kud i wang’ nyithindho mir Israel, maram wakadhu ko lokaca, nia adundegi ng’oi ndiri, kadok cwinygi de mbe i igi kendo, kum nyithindho mir Israel.

² I nindo maeca Yehova wacu ni Yocuwa kumae, Wutim iwu pala mi kidi ma tek, man wutim yaa kendo wang’ arionde kum nyithindho mir Israel.

³ E Yocuwa timo ire pala mi kidi ma tek, man etimo yaa i kum nyithindho mir Israel i Gebeyaharaloth.

⁴ Man maeni lembe m’uketho Yocuwa timo yaa: dhanu ceke m’uai kud i Misiri, ma gi jumaco, ma en e dhanu mi lwiny ceke, githo i langa i yo, yo ng’ei ai migi kud i Misiri.

⁵ Kum dhanu ceke ma giai nwang’u jutimo yaa i kumgi; ento dhanu ceke ma junyolo i yo i yamba ka giai kud i Misiri, e jutimo yaa ngo i kumgi.

⁶ Kum nyithindho mir Israel giwotho rundi pier ang’wen i yamba, rama thek dho, ma gi dhanu mir ali m’uai i Misiri, ginyothri ko, kum giwinjo dwand Yehova ngo: ma Yehova kwong’o igi nia ebiweko ngo ginen ng’om ma Yehova kwong’o ni kwarugi ya ebimio iwa, ng’om ma molo cak ku kic.

⁷ Man nyithindhgi, m’eting’o malu kakagi, e ma Yocuwa timo yaa i kumgi: kum fodi jutimo yaa i kumgi ngo, kum gitimo yaa i kumgi ngo i yo.

⁸ Man etimbre, kinde ma gidaru timo yaa kum thek dho, nia gibedo kakagi i ka ma juguro ie hema, maram kumgi cangu ko.

⁹ E Yehova wacu ni Yocuwa kumae, I ceng’ maeni ang’ielo lewic mi Misiri kud i kumwu cen. Kum kumeno nying’ ka maeno julwong’o Gilgal, cil i ceng’ maeni.

¹⁰ Man nyithindho mir Israel gigonjo i Gilgal; man gikwiro kadhukuwijo i ceng’ apar wi ang’wende mi dwi uthieno i pambu mi Yeriko.

¹¹ Man gicamu cam m’i ng’ombe urwone yo ng’ei kadhukuwijo, kwen m’apada m’umbe thobi ku cam m’acela, i ceng’ maeca nica.

¹² E dhu mana jik ndhu urwone, yo ng’ei cam m’i ng’om maeno ma gicamu; e nyithindho mir Israel ubedo ku mana kendo ngo: ento gicamu cam m’i ng’om Kanan rundi nica.

Yocuwa ku Ng’atu M’uciko Palamularu i Cinge

¹³ Man etimbre, kinde ma Yocuwa ni ng’et Yeriko, nia eting’o wang’e malu man eneno, man, nen, ng’atu moko cungo i vute keca ku palamularu m’ubedo acika i cinge: e Yocuwa cidho i bang’e, man ewacu ire kumae, In i jabang’wa, kadi i jaba judegi mwa?

¹⁴ Man ewacu kumae, Ungo; ento abino kawono calu jaditmawijo mir udul pa Yehova. Man Yocuwa podho arieba wang’e i ng’om, man erwo, epenje kumae, Rwoth para wacu ang’o ni jatic pare?

¹⁵ E jaditmawijo mir udul pa Yehova wacu ni Yocuwa kumae, Wodh wara peri kud i tiendi; kum ka m’icungo i ie e leng’. E Yocuwa timo kumeca.