Yocuwa 4 - The Holy Bible In Alur (Lur) Revised Orthography

Jukwanyu Kidi Apar wi Ario kud i Yordan

¹ Man etimbre, ka thek dho kadhu Yordan kpo, nia Yehova weco ba Yocuwa, ewacu kumae,

² Gam dhanu apar wi ario kud i kind dhanune, ku ba suru ku ba suru ng’atu acel,

³ man wung’ol igi, wuwac kumae, Wuting’ kidi apar wi ario kud i die Yordan, kud i ka ma tiend julam ucungo i ie ti, man wuyeigi lokaca karacelo kudu, man wukethgi piny i kagonjo, ka ma wubigonjo i ie diewor ma tin.

⁴ Yocuwa lund ulwong’o dhanu apar wi ario, m’eyiko m’i kind nyithindho mir Israel, ku ba suru ku ba suru ng’atu acel:

⁵ e Yocuwa wacu igi kumae, Wukadh i wang’ sanduk pa Yehova Mungu mu i die Yordan, man wuting’ kidi ku ba dhanu ng’atuman kidi acel wi goke, calku wel mi suru mi nyithindho mir Israel;

⁶ kara maeni bed ni giranyutha i kindwu, kara, ka nyithindho mu penjo i nindo ma bibino, giwacu kumae, Kidi maeni thelembene ang’o?

⁷ wubilund wacu igi kumae, Kum pi mi Yordan ung’ol woko i wang’ sanduk mi lembariba pa Yehova; kinde m’ekadhu ku wi Yordan, pi mi Yordan ung’ol: man kidi maeni bibedo ni lembapoya ni nyithindho mir Israel mi nja.

⁸ E nyithindho mir Israel gitimo kumeca calu Yocuwa ng’olo, e giting’o kidi apar wi ario kud i die Yordan, calu Yehova yero ni Yocuwa, calku wel mi suru mi nyithindho mir Israel; e giyeyogi karacelo kugi ba ka ma gigonjo i ie, e gikethogi piny keca.

⁹ Man Yocuwa ketho kidi apar wi ario i die Yordan, i ka ma tiend julam m’uyeyo sanduk mi lembariba cungo i ie: e gini keca cil i ceng’ maeni.

¹⁰ Kum julam m’uyeyo sanduk ucungo i die Yordan, cil ma gin ceke ma Yehova ng’olo ni Yocuwa ya eyer ni dhanu thum ko, calku gin ceke ma Musa ng’olo ni Yocuwa: e dhanune giruiri e gikadhu lokaca.

¹¹ Man etimbre, kinde ma dhanu ceke kadhu kpo lokaca nia sanduk pa Yehova de kadhu lokaca, ku julam, i vut dhanune.

¹² E nyithindho pa Ruben man nyithindho pa Gad, ku ng’et suru pa Manase, gikadhu lokaca ma jamtho ni i kumgi i wang’ nyithindho mir Israel calu Musa yero igi:

¹³ giyenyo romo dhanu rubanga pier ang’wen ma gibedo ayika ku jamtho i kumgi mir ali man gikadhu lokaca i wang’ Yehova ba lwiny, ba pambu mi Yeriko.

¹⁴ I ceng’ maeca Yehova yungo Yocuwa i wang’ Israel ceke; e gilwore, calu gilworo Musa, i nindo ceke mi bedo pare.

¹⁵ Man Yehova yero ni Yocuwa, ewacu kumae,

¹⁶ Ng’ol ni julam m’uyeyo sanduk mi lembariba, nia giidh malu kud i Yordan.

¹⁷ Ka kumeno Yocuwa ng’olo ni julam, ewacu kumae, Wuidh malu kud i Yordan.

¹⁸ Man etimbre, kinde ma julam m’uyeyo sanduk mi lembariba pa Yehova ai kud i Yordan, man die tiend julam utingre malu wi ng’om m’uthwo, nia pi mi Yordan udok kakare, man epong’ ekadhu kieune ceke, calu ma naka.

¹⁹ E dhanu giidho malu ku i Yordan i ceng’ mir apaje mi dwi ma kwon’ane, man giguro hema i Gilgal, i kieu Yeriko ma yo nyangu.

²⁰ E kidi apar wi ario maeno, ma giting’o kud i Yordan, Yocuwa rodo i Gilgal.

²¹ Man Yocuwa yero ni nyithindho mir Israel, ewacu kumae, Ka nyithindho mu bipenjo weggi i nindo ma bibino, gibiwacu kumae, Kidi maeni thelembene ang’o?

²² E wubilund ketho nyithindho mu ng’eyo, wubiwacu kumae, Israel ukadhu Yordan maeni ku wi ng’om m’uthwo.

²³ Kum Yehova Mungu mu dwono pi mi Yordan i weng’wu, maram wukadhu ko lokaca, calu Yehova Mungu mu timo kum Nam Makwar, m’edwono i wang’wa, maram wakadhu ko lokaca;

²⁴ kara kodhidhanu ceke m’i ng’om ging’ei cing’ Yehova, nia e tek; kara wulwor Yehova Mungu mu mi nja.