Yocuwa 22 - The Holy Bible In Alur (Lur) Revised Orthography

Pemblam Dhu Yordan

¹ Yocuwa lund ulwong’o Jurubeni, ku Jugadi, man ng’et suru pa Manase,

² man ewacu igi kumae, Wuworo gin ceke ma Musa ma jatic pa Yehova ng’olo iwu, man wuwinjo dwanda kum gin ceke m’ang’olo iwu;

³ wuweko utumegwu ngo i nindo dupa maeni cil tin, ento wuworo cik mi lembang’ola pa Yehova Mungu mu.

⁴ E kawono Yehova Mungu mu mio yom ni utumegwu, calu eyero igi: ka kumeno kawono wudoki, man wuci ba hema mu, i ng’om ma piny mu, ma Musa ma jatic pa Yehova mio iwu loka Yordan.

⁵ Ento wubed k’amora mi timo lembang’ola mi cik ma Musa ma jatic pa Yehova ng’olo iwu, ya wumar Yehova Mungu mu, man wuwoth i yo pare ceke, wuwor lembang’ola pare de, man wumok i kume, wutim ire de kud adundewu ceke, ku ng’eyong’ec mu ceke.

⁶ Kum kumeno Yocuwa mio mugisa igi, man eketho gicidho; e gicidho ba hema migi.

⁷ Nwang’u Musa mio aba i Bacan ni ng’et suru acel pa Manase; ento ni ng’et suru mucelo Yocuwa mio igi aba i kind uturneggi loka Y ordan yo reto. Mange ke kinde ma Yocuwa ketho gicidho ba hema migi, emio mugisa igi,

⁸ man eyero igi, ewacu kumae, Wudok ku lonyo ma dit ba hema mu, man ku lim dupa, man ku mola ma tar, ku mola ma kwar, man ku mola, ku nyunyu, man ku kendi dupa: wupok ayeki mi judegi mu ku utumegwu.

⁹ E nyithindho pa Ruben man nyithindho pa Gad ku ng’et suru pa Manase gidok, man gipokri ku nyithindho mir Israel kud i Cilo, ma eni i ng’om Kanan, kara gicidh i ng’om Gilead, ba ng’om mi piny migi, ma gibedo kudo, calku lembang’ola pa Yehova ku dhu Musa.

¹⁰ E ka gitundo i ng’om ma ceng’ni Yordan, ma ni i ng’om Kanan, nyithindho pa Ruben man nyithindho pa Gad ku ng’et suru pa Manase giguro pemblam keca i ng’et Yordan, pemblam ma dit ma nen.

¹¹ E nyithindho mir Israel giwinjo kumae, Nen, nyithindho pa Ruben man nyithindho pa Gad ku ng’et suru pa Manase giguro pemblam i nyim ng’om mi Kanan, i ng’om ma ceng’ni Yordan, i ng’ete yo ka ma en e piny mi nyithindho mir Israel.

¹² E kinde ma nyithindho mir Israel giwinjo pire, udul ceke mi nyithindho mir Israel gicokri gigi karacelo i Cilo, kara giidh malu i kumgi e gikied kugi.

¹³ Man nyithindho mir Israel gioro kwenda ba nyithindho pa Ruben, man ba nyithindho pa Gad, man ba ng’et suru pa Manase, i ng’om Gilead, ma en e Finehas ma wod Eleazar ma jalam,

¹⁴ man karacelo kude judongomawijo apar, jaditmawijo acel mi ot pa weggi mi suru mir Israel kubang’gi kubang’gi; man gin kubang’gi kubang’gi gi wi udi pa weggi i kind rubanga mir Israel.

¹⁵ E gibino ba nyithindho pa Ruben, man ba nyithindho pa Gad, man ba ng’et suru pa Manase, i ng’om Gilead, e giyero igi, giwacu kumae,

¹⁶ Udul ceke pa Yehova wacu kumae, En e kier ma nedi ma wukier ko ni Mungu mir Israel, ma wukiewo ko tin kum lubo Yehova, ma wuguro ko iwu pemblam, ma wujai ko tin ni Yehova?

¹⁷ Kier mi Peor e nok hai iwa ma fodi walwokra giwa ngo cil i ceng’ maeni, kadok thong’om upodho wi udul pa Yehova,

¹⁸ ma nia wulokru tin kum lubo Yehova? man ebibedo, kum wucamu co ni Yehova tin, nia urwo kwinyo binege kum udul ceke mir Israel.

¹⁹ Ento, tek ng’om ma piny mu bedo leng’ ungo, e dong’ wukadh i ng’om ma piny pa Yehova, ma hema pa Yehova bedo i ie, man wumwony ng’om i kindwa: ento kud wujai ni Yehova, kadi kud wujai iwa, ma wugur ko iwu pemblam ma tung’ ku pemblam pa Yehova Mungu mwa.

²⁰ Akan ma wod Zera kier ungo i gin ma jukwong’o, e kwinyo podho wi udul Israel ceke ngo? e ng’atu maeno tho kende ngo i kier pare.

²¹ E nyithindho pa Ruben, man nyithindho pa Gad man ng’et suru pa Manase gilund giloko lembe, man giyero ni wi rubanga mir Israel kumae,

²² Ng’atu ma Jatego, Mungu, Yehova, Ng’atu ma Jatego, Mungu, Yehova, eng’eyo; e Israel ebing’eyo: tek en e i jai, kadi tek en e i kier kum Yehova (kud ilarwa i ceng’ maeni),

²³ ma nia waguro iwa pemblam kara wakier kum lubo Yehova; kadi tek mi lamu wie lam m’awang’a kadi lam mi mogo, kadi mi lamu lam mi kwiocwiny i wie, dong’ Yehova en elwong’e;

²⁴ kadi tek watime ngo ni iwa m’upido, man aka, ma wawacu ko kumae, I nindo m’ubino nyithindho mu maru wacu ni nyithindho mwa kumae, Wubedo ku lembang’o wuku Yehova, Mungu mir Israel?

²⁵ kum Yehova ketho kulo Yordan ni kieu i kindwa wakudu, wu nyithindho pa Ruben man nyithindho pa Gad; wubedo ku makapiny mu ngo i Yehova: kum kumeno nyithindho mu maru ketho nyithindho mwa wek lworo Yehova.

²⁶ Ka kumeno wawacu kumae, Dong’ kawono wabedu ayika mi guro iwa pemblam, mi lam m’awang’a ngo, kadi mi lam de ngo:

²⁷ ento ebibedo ni giranyutha i kindwa wakudu, man i kind dhanum’utuk mwa yo ng’eiwa, kara watim tic pa Yehova i wang’e ku lam m’awang’a mwa, man ku lam mwa, man ku lam mwa mi kwiocwiny; kara nyithindho mu kud uwac ni nyithindho mwa i nindo m’ubino kumae, Wubedo ku makapiny mu ngo i Yehova.

²⁸ Ka kumeno wawacu kumae, Ebibedo, kinde ma giwacu iwa kadi ni dhanum’utuk mwa i nindo m’ubino, nia wabiwacu kumae, Nen ayi mi pemblam pa Yehova, ma kwaruwa guro, mi lam m’awang’a ngo, kadi mi lam de ngo; ento en e lembanyutha i kindwa wakudu.

²⁹ Kud etund i kumwa nia wajai ni Yehova, man wakiewo woko tinuni kum lubo Yehova, ma nia wagur ko pemblam mi lam m’awang’a, kadi mi lam mi mogo, kadi mi lam, ma tung’ ku pemblam pa Yehova Mungu mwa ma eni i wang’ hema pare.

³⁰ Man kinde ma Finehaz ma jalam, man judongomawijo mir udul, en e wi rubanga mir Israel ma gini karacelo kude, giwinjo lembe ma nyithindho pa Ruben ku nyithindho pa Gad man nyithindho pa Manase giyero, enyayu mutoro i igi.

³¹ Man Finehaz ma wod Eleazar ma jalam uwacu ni nyithindho pa Ruben, ku nyithindho pa Gad, man ni nyithindho pa Manase kumae, Tin wang’eyo nia Yehova ni i kindwa, kum wukier ungo i gin maeni ni Yehova: kawono wubodho nyithindho mir Israel kud i cing’ Yehova.

³² Man Finehaz ma wod Eleazar ma jalam, man judongomawijo, gidwogo ku ba nyithindho pa Ruben, man ku ba nyithindho pa Gad, kud i ng’om Gilead, gibino i ng’om mi Kanan, ba nyithindho mir Israel, e gikelo lembe kendo igi.

³³ E gin maeni nyayu mutoro i nyithindho mir Israel; man nyithindho mir Israel gimio mugisa ni Mungu, man giyero kendo ngo pi idho malu i kumgi nikiedo kugi, kara ginyoth ng’om ma nyithindho pa Ruben ku nyithindho pa Gad gibedo i ie.

³⁴ Man nyithindho pa Ruben ku nyithindho pa Gad gilwong’o pemblamne Ed: Kum, giwacu, en e lembanyutha i kindwa nia Yehova en e Mungu.