Yocuwa 14 - The Holy Bible In Alur (Lur) Revised Orthography

Jupoko Ng’om Kanan ku Gagi

¹ Man maeni gin aba ma nyithindho mir Israel umaku i ng’om Kanan, ma Eleazar ma jalam, ku Yocuwa ma wod Nun, man wi udi pa wego mi suru mi nyithindho mir Israel, gipoko igi,

² ku gagi mir aba migi, calu Yehova ng’olo ku dhu Musa, ni suru abung’wen, man ni ng’et suru.

³ Kum Musa mio aba mi suru ario ku ng’et suru loka Yordan: ento ni Julawi emio aba ngo i kindgi.

⁴ Kum nyithindho pa Yusuf gi suru ario, Manase ku Efraim: man gimio makapiny ungo ni Julawi i ng’ombe, ndhu adhura ma gibed i ie, ku ng’et ng’ombe mi lim migi man mi piny migi.

⁵ Calu Yehova ng’olo ni Musa, e nyithindho mir Israel gitimo kumeca; man gipoko ng’ombe.

Jumio Hebron ni Kaleb

⁶ Nyithindho pa Yuda gilund gicoro ceng’ni kum Yocuwa i Gilgal: man Kaleb ma wod Yefune ma Jakenizi wacu ire kumae, Ing’eyo gin ma Yehova yero ni Musa ma dhanu pa Mungu pira man piri i Kadec-barnea.

⁷ Rundi para doko pier ang’wen kinde ma Musa ma jatic pa Yehova ora kud i Kadec-barnea nilibo ng’ombe; e akelo lembe ire kendo calu ebedo i adundena.

⁸ Ento utumira ma waidho malu wakugi ginyayu lworo i adunde dhanu: ento alubo ndhu Yehova Mungu para.

⁹ E Musa kwong’o kwong’ i ceng’ maeca, ewacu kumae, Andha ng’om ma tiendi nyono bibedo ni aba iri man ni nyithindho peri mi nja, kum ilubo ndhu Yehova Mungu para.

¹⁰ Man kawono, nen, Yehova ketho abedo kwo, calu eyero, rundi maeni pier ang’wen wi abic, ugambre i nindo ma Yehova yero lembe maeni ni Musa, kinde ma Israel uwotho i yamba: man kawono, nen, tinuni rundi para doko pier abora wr abic.

¹¹ Fodi tego para ma tin ubedo calu ma i ceng’ ma Musa ora: calu tego para bedo i nindo maeca, e tego para bedo kumeca kawono, pir ali, man pi cidho woko ku mondo de.

¹² Ka kumeno kawono mi ira ng’om gudi maeni, ma Yehova yero pire i ceng’ maeca; kum iwinjo i ceng’ maeca maram Juanaki gini kuca, kud adhura ma dit ma tek de: kuno nyo Yehova bibedo karacelo kuda, man abiriemogi woko, calu Yehova yero.

¹³ E Yocuwa mio mugisa ire; man emio Hebron ni Kaleb ma wod Yefune ni aba.

¹⁴ Ka kumeno Hebron udoko aba pa Kaleb ma wod Yefune ma Jakenizi cil i ceng’ ma tin; kum elubo ndhu Yehova, Mungu mir Israel.

¹⁵ Nie nying Hebron naka en e Kiriath-arba; Arbane en e ng’atu ma dit ma sagu i kind Juanaki. Man ng’ombe kwio ni ali.