Yocuwa 10 - The Holy Bible In Alur (Lur) Revised Orthography

Juloyo Juamori

¹ Nie etimbre, kan Adonizedek m’ubimo mi Yerusalem uwinjo maram Yocuwa maku ko Ai, man maram enyothe ko pet (calu etimo kum Yeriko kud ubimo pare, etimo kum Ai kud ubimo pare kumeca), man maram dhanu m’ubedo i Gibeon gitimo ko kwiocwiny kud Israel, man nia gini i kindgi;

² nia lworo negogi dit, kum Gibeon en e adhura ma dit, calu adhura moko ma p’ubimo, man kum en e dit ma sagu Ai, man dhanune ceke gi dhanu ma tek.

³ Kum kumeno Adonizedek m’ubimo mi Yerusalem uoro kwenda ba Hoham m’ubimo mi Hebron, man ba Piram m’ubimo mi Yarmuth, man ba Yafia m’ubimo mi Lakic, man ba Debir m’ubrmo mi Eglon, ewacu kumae,

⁴ Wuidh malu i bang’a, man wukonya, man dong’ wagoi Gibeon; kum etimo kwiocwiny ku Yocuwa man ku nyithindho mir Israel.

⁵ Ka kumeno ubimo abic mi Juamori, gin ubimo mi Yerusalem, man ubimo mi Hebron, man ubimo mi Yarmuth, man ubimo mi Lakic, kud ubimo mi Eglon, gicokri gigi karacelo, man giidho malu, gin kud udul migi ceke, man gigonjo kum Gibeon, e gitimo ali i kume.

⁶ E dhanu mi Gibeon gioro kwenda ba Yocuwa ba kagonjo i Gilgal, giwacu kumae, Kud idol cingi ni jutic peri; idh malu i bang’wa pio, ilarwa de, ikonywa; kum ju m’ubimo mi Juamori ceke m’ubedo i ng’om gudi gicokri karacelo i wiwa.

⁷ Kum kumeno Yocuwa idho malu kud i Gilgal, en, ku dhanu mir ali ceke gikugi, ku dhanu ceke ma tek ma jurukara.

⁸ E Yehova wacu ni Yocuwa kumae, Kud ilworgi: kum amiogi i cingi: ng’atu moko mbe m’i kindgi ma bicungo i weng’i.

⁹ Ka kumeno Yocuwa wok i kumgi mwom; kum eidho malu kud i Gilgal ku diewor soro.

¹⁰ E Yehova sendogi i wang’ Israel, man enegogi ku nek ma dit i Gibeon, man eriemogi yo ba kaidho mi Beth-horon, man egoyogi cil kum Azeka, man kum Makeda.

¹¹ Man etimbre, ka giringo kud i wang’ Israel, kinde ma gini i ka m’alora mi Beth-horon, nia Yehova bolo kidi ma dit piny kud i polo i wigi cil kum Azeka, e githo: ju m’utho ku kidi mi pei gi dit ma sagu ju ma nyithindho mir Israel unego ku palamularu.

¹² Yocuwa lund uweco ku Yehova i ceng’ ma Yehova mio ie Juamori i wang’ nyithindho mir Israel; man ewacu i wang’ Israel kumae, Ceng’, cung tii wi Gibeon; In i Dwi ke, i poga mir Ajalon.

¹³ E ceng’ ucungo tii, man dwi de cere, Maram thek uculo ko kwor kum judegi migi. Maeni gore ngo i kitabu pa Yacari? E ceng’ ucungo tii i die polo, man emwony pio ngo ma yenyo romo ceng’ acel bo.

¹⁴ Man ceng’ acel umbe calu maeno m’ular uwok i wang’e kadi m’ulubo ng’eye, nia Yehova winjo dwand dhanu: kum Yehova kiedo pir Israel.

¹⁵ E Yocuwa dwogo, kud Israel ceke karacelo kude, i kagonjo i Gilgal.

¹⁶ E ju m’ubimo abic maeni giringo, man gipondo i odng’om mi Makeda.

¹⁷ Man juyero ni Yocuwa, juwacu kumae, Ju m’ubimo abic ginwangri, gipondo i odng’om mi Makeda.

¹⁸ Man Yocuwa wacu kumae, Wung’iel kidi ma dit dhu odng’om, man wuketh dhanu i kume kara gikurgi:

¹⁹ ento kud wubed wun; wuriem tok jukwojwu, man wugoi kindgi m’udong’ cen; kud wuyi gimond i adhura migi: kum Yehova Mungu mu miogi i cingwu.

²⁰ Man etimbre, ka Yocuwa ku nyithindho mir Israel udaru negogi ku nek ma dit apila, cil ma githum ko, man donge m’udong’ m’i kindgi gimondo i adhura ma tek,

²¹ nia dhanu ceke gidwogo ba kagonjo ba Yocuwa i Makeda ma cwinygi kwio: ng’atu moko mbe de m’uwodho lebe kum nyithindho mir Israel.

²² Yocuwa lund uwacu kumae, Wuyab dhu odng’om, man wuwodh ubimo abic maeno woko kud i odng’om ira.

²³ E gitimo kumeca, man giwodho ubimo abic maeno woko kud i odng’om i bang’e, gin ubimo mi Yerusalem, man ubimo mi Hebron, man ubimo mi Yarmuth, man ubimo mi Lakic, man ubimo mi Eglon.

²⁴ Man etimbre, kinde ma gikelo ubimo maeno ba Yocuwa, nia Yocuwa lwong’o dhanu ceke mir Israel, man ewacu ni judongo mi dhanu mir ali ma gicidho karacelo kude kumae, Wubin ceng’ni, wuketh tiendwu wi ng’ut ju m’ubimo maeni. Man gibino ceng’ni, e giketho tiendgi wi ng’utgi.

²⁵ Man Yocuwa wacu igi kumae, Kud wulwor, kadi cwinywu kud ung’abre: wubed tek man cwinywu bed tek: kum Yehova bitimo kumeni kum jukwojwu ceke ma wukiedo wukugi.

²⁶ Man yo ng’eye Yocuwa goyogi, man enegogi, man elierogi kum yen abic: e gibedo aliera kum yen cil uthieno.

²⁷ Man etimbre i kinde ma ceng’ upodho, nia Yocuwa ng’olo, man giting’ogi piny ku kor yen, man gibologi i odng’om ma gipondo i ie, man gijengo kidi ma dit i dhu odng’omne, cil i ceng’ maeni ma tin.

²⁸ Man Yocuwa maku adhura Makeda i ceng’ maeca, man egoye ku lak palamularu, kud ubimone: enyothogi pet ku ng’eyong’ec ceke ma ni i ie; eweko moko dong’ ungo; man etimo ni ubimo mi Makeda calu etimo kum ubimo mi Yeriko.

²⁹ Man Yocuwa kadhu ku i Makeda, ku Israel ceke karacelo kude, cil ba Libna, man etimo ali kum Libna:

³⁰ man Yehova mio adhura maeno bende, kud ubimone, i cing’ Israel; e egoye ku lak palamularu, ku ng’eyong’ec ceke ma gini i ie; eweko moko dong’ i ie ngo; man etimo kum ubimone calu m’etimo kum ubimo mi Yeriko.

³¹ E Yocuwa kadhu kud i Libna, man Israel ceke gikugi, cil kum Lakic, man gigonjo i kume, e gitimo ali i kume:

³² man Yehova mio Lakic i cing’ Israel; e emake i ceng’ mir arionde, man egoye ku lak palamularu, ku ng’eyong’ec ceke ma ni i ie, calku gin ceke m’etimo kum Libna.

³³ Horam m’ubimo mi Gezer ulund uidho malu nikonyo Lakic; e Yocuwa goye ku dhanu pare, cil m’eweko ko ngo ng’atu moko m’udong’ ire.

³⁴ Man Yocuwa kadhu kud i Lakic, ku Israel ceke gikugi, cil kum Eglon; e gigonjo i kume, man gitimo ali i kume;

³⁵ e gimake ceng’ nica, man gigoye ku lak palamularu; man enyotho ng’eyong’ec ceke ma ni i ie kot i ceng’ maeca, calku gin ceke m’etimo kum Lakic.

³⁶ Man Yocuwa idho malu kud i Eglon, man Israel ceke gikugi, cil kum Hebron; e gitimo ali i kume:

³⁷ man gimake, gigoye de ku lak palamularu, kud ubimone de, man adhurane ceke, ku ng’eyong’ec ceke ma ni i ie de; eweko moko ngo m’udong’, calku gin ceke m’etimo kum Eglon; ento enyothe kot, ku ng’eyong’ec ceke ma ni i ie.

³⁸ Man Yocuwa dwogo, kud Israel ceke gikugi, ba Debir, man gitimo ali i kume:

³⁹ e emake, kud ubimone, man adhurane ceke; e gigoyogi ku lak palamularu, man ginyotho ng’eyong’ec ceke ma ni i ie kot; eweko moko ngo m’udong’: calu etimo kum Hebron, etimo kumeca kum Debir, man kum ubimone de; calu etimo kum Libna bende, man kum ubimone.

⁴⁰ Kum kumeno Yocuwa goyo ng’om maeno ceke, man ng’om gudi, ku ng’om ma yor ariwa ma piny, ku ng’om poga, ku ng’om m’alora, kud ubimo migi ceke; eweko moko ngo m’udong’, ento enyotho gin ceke m’uyuyo kot, calu Yehova, Mungu mir Israel, ung’olo.

⁴¹ Man Yocuwa goyogi gambre Kadec-barnea cil kum Gaza, ku ng’om ceke mi Gocen, cil kum Gibeon.

⁴² Man ubimo maeni ceke ku ng’om migi Yocuwa maku i nindo acel, kum Yehova, Mungu mir Israel, ukiedo pir Israel.

⁴³ E Yocuwa dwogo, ku Israel ceke gikugi, ba kagonjo i Gilgal.