Yeremia 9 - The Holy Bible In Alur (Lur) Revised Orthography

¹ A tek wia bedo pi, man wang’a kulo mi piwang’, kara aywak dieceng’ ku diewor kum ju ma junego pa nya dhanu para mire!

² A tek abedo ku kabedo mi juwoth i langa; kara awek dhanu para, man aai woko kud i bang’gi mire! kum kagi ceke gi weg dubri swa, gi cokri mi dhanu ma weg abombi.

³ Man gigomo lebgi, calu en e atum migi, mi yero ndra; e gidoko tek i ng’om, ento mi lemandha ngo: kum gicikucidho ugambre kum lem ma rac utundo kum lem ma rac, e ging’eya ngo, Yehova wacu.

⁴ Wubed ku weng’wu ng’atuman kum wadi man kum wadi, man kud wugen umegwu moko; kum umego kubang’gi kubang’gi bikabu wadi woko, man wat kubang’gi kubang’gi bicidho ku yero nying’.

⁵ Man gibibombri kubang’gi kubang’gi ng’atuman wadi, man gibiyero lemandha ngo: giponjo lebgi ku weco lemndra; giol gigi ku timo kier.

⁶ Kabedo peri ni i kind abombi; ni kum abombi gikwero ng’eya, Yehova wacu.

⁷ Ka kumeno Yehova mir udul uwacu kumae, Nen, abilenyogi, man abiponjogi; kum acopo timo tung’ nenedi, kum nya dhanu para?

⁸ Lebgi en e athero mi tho; eyero abombi: ng’atu moko yero mi kwiocwiny ni wadi ku dhoge, ento yor i adundene ekanu adhi ire.

⁹ Abiliewogi ngo kum gin maeni? Yehova wacu; jubiculo kwor ni ng’eyong’ec para ngo kum wadi thek ma calu maeni?

¹⁰ Abimoc ywak ku goyonduru pi gudi, man awu pi kakwae m’i langa, kum giwang’ kot, ketho nia ng’atu moko kadhu ngo kud i ie; kadi dhanu de copo winjo dwand lim ungo; winyo ma kor polo ku yedi de giringo, gimbe.

¹¹ Man abidwoko Yerusalem ni udhuru, ni kabedo mir utho; man abidwoko adhura mi Yuda ni uvuru, ma ng’atu moko mbe m’ubedo i ie.

Yehova Twong’o Israel pi Nyoth kud Ayeki

¹² Ng’a ma jarieko, ma copo ng’eyothelembe maeni? man ng’a ma dhu Yehova weco i bang’e, kara eyer maeni? pirang’o ng’om unyothre man ewang’ kot calu langa, ketho nia ng’atu moko mbe m’ukadhu kud i ie?

¹³ E Yehova wacu kumae, Kum gikuno cik para m’aketho i wang’gi, man giworo dwanda ngo, kadi giwotho i ie de ngo,

¹⁴ ento giwotho tok udhuko mir adundegi gigi, man tok Balim, ma weggi ponjo kogi;

¹⁵ ka kumeno Yehova mir udul, Mungu mir Israel, uwacu kumae, Nen abikakugi, en e dhanu maeni, ku yendadra, man abimio igi pi mir ulecu gimadhi.

¹⁶ Abikethogi kind thek bende, ma kadok gin kadi kwarugi de ng’eyo ngo; man abioro palamularu i tokgi, maram adaru kogi.

¹⁷ Yehova mir udul uwacu kumae, Iwu pidi, man wulwong’ mon ma juywak, kara gibin; man wulwong’ mon ma riek, kara gibin:

¹⁸ man wek gitim pio, e gimoc goyo nduru piwa, kara wang’wa mol ku piwang’, man biendwang’wa cor pige.

¹⁹ Kum dwal mi goyonduru winjre ku i Sayuni kumae, Wanyothra mire! cwinywa ng’abre dit, kum waweko ng’om, kum girwombo kabedo mwa piny.

²⁰ Ento wuwinj lembe pa Yehova, E wu mon, man wuwek ithwu jol lembe m’i dhoge; man wuponj nyigwu ku goyo nduru, man ku ba dhanu ku ba dhanu ng’atuman uponj wadi ku wejawu.

²¹ Kum tho idho malu i wang’ udi mwa, emondo i udi ma beco mwa; kara ukab nyithindho ku woko, man awobi kud i gengi.

²² Yer, Yehova wacu kumae, Avu dhanu bipodho calu weyo wi podho ma wie leng’, man calu piny ma pong’ cing’ yo ng’ei janyar mwoka, e ng’atu moko mbe ma bicokogi.

Ng’atu M’ung’eyo Mungu Copo Lule i Ng’eyong’ecne

²³ Yehova wacu kumae, Jarieko kud ulule kum rieko pare, kadok ng’atu ma jarukara de kud ulule kum tego pare, jalonyo de kud ulule kum lonyo pare;

²⁴ ento wek ng’atu m’ulule elule kum maeni nia, ng’eyothelembe ni kude, man eng’eyo an, nia an a Yehova m’atimo mer mi bero, ku pokolembe, man bedopwe, i ng’om: kum anyong’a nega kum gin maeni, Yehova wacu.

²⁵ Nen, ceng’ ubino, Yehova wacu, nia abisendo dhanu ceke ma weg yaa kum yaa migi m’umbe:

²⁶ Misiri, man Yuda, kud Edom, man nyithindho mir Amon, ku Moab, ku dhanu ceke ma julielo dhu yukwigi, m’ubedo i langa; kum thek ceke bedo umbe yaa, man ot ceke mir Israel ubedo mbe yaa yor i adundegi.