Yeremia 8 - The Holy Bible In Alur (Lur) Revised Orthography

Dubo ku Pokolembe

¹ I nindo maeca, Yehova wacu, gibiwodho cogo mi ju m’ubimo mi Yuda, ku cogo mi judongomawijo pare, man cogo mi julam, ku cogo mi jubila de, man cogo mi ju m’ubedo i Yerusalem, kud i liendgi;

² e gibimoyogi i wang’ ceng’, ku dwi, kud udul m’i polo ceke, ma gimaru, man gitimo igi, man ma gilubo tokgi, man ma giyenyo, man ma girwo i bang’gi: jubicokogi ngo, kadi jubiyikogi de ngo, gibibedo ni weyo i wang’ ng’om.

³ Man dong’ dhanu m’udong’ ceke mi wat maeni ma rac, m’udong’ i ka ceke m’ariemogi i ie, gibifoyo tho ma sagu kwo, Yehova mir udul uwacu.

⁴ Mange ke ibiwacu igi kumae, Yehova wacu kumae: Dhanu bipodho, man gibiai kendo ngo? ng’atu moko bilokre cen, man ebidwogo ngo?

⁵ Ka kumeno nedi dhanu mi Yerusalem gicoro cen ku corocen mi nja? gimoko kum abombi, gikwero dwogo.

⁶ Aciko itha man awinjo, ento giweco atira ngo: ng’atu moko mbe m’uloko cwinye kum dubo pare, m’ewacu kumae, Atimo ang’o? ku ba dhanu ku ba dhanu ng’atuman ulokre ba yo pare, calu riuni ma ringo acika wie yo lwiny.

⁷ Eyo, upa m’i polo ng’eyo nindo pare ma juketho; man nyathuk kud ugwelo man ugoro ging’eyo nindo mi bino migi; ento dhanu para ng’eyo cik pa Yehova ngo.

⁸ Wuwacu nenedi kumae. Wan wa riek, man cik pa Yehova ni kudwa? Ento, nen, kalamu mi ndra mi iugorcik timo ku ndra.

⁹ Junyayu lewic wi jurieko, cwinygi ng’abre man jumakugi: nen, gikwero lerabe pa Yehova; man rieko ma nedi ma ni i igi?

¹⁰ Ka kumeno abimio mon migi ni jumange, man pothi migi ni ju ma bimwonyogi: kum dhanu kubang’gi kubang’gi ugambre kum ma nok cil kum ma dit giketho cwinygi hai kum piny; ugambre kum jabila cil kum jalam kubang’gi kubang’gi ng’atumar timo ku ndra.

¹¹ E gicangu rem pa nya dhanu para nyanok ma giweco ko kumae, Kwiocwiny, kwiocwiny; kinde ma kwiocwiny umbe.

¹² Lewic negogi kinde ma gitimo ginmajudagu? ungo, lewic negogi ki ngo, kadok loko wang’gi de gicopo ngo: ka kumeno gibipodho i kind ju m’upodho; i nindo mi lieu migi jubiredbogi piny, Yehova wacu.

¹³ Abidarugi pet, Yehova wacu: nyingulok bibedo mbe kum ulok, kadi nyingubolo de wi yendubolo, man ith yen biner: e gin m’amio igi bikadhu cen kud i kumgi.

¹⁴ Nedi wabedo ling’i? wucokru giwu, man wek wamond i adhura ma tek, e wek wabed ling’ kuca; kum Yehova Mungu mwa ketho wanyothra, man emio iwa pi mir ulecu wamadhi, kum wadubo ni Yehova.

¹⁵ Wakio kwiocwiny, ento gin ma ber ubino ngo; man nindo mi cangu, man, nen, ang’abacwiny!

¹⁶ Ywak mi riuni pare winjre kud i Dan: ng’om dho yengre kum badwal mi ywak mi riuni pare ma tek; kum giwok, man gicamu ng’om ku gin ceke ma ni i ie; adhura ku ju m’ubedo i ie.

¹⁷ Kum, nen, abioro thwol, uting’kwodo, i kindwu, ma jucopo rambu ngo; e gibikayuwu, Yehova wacu.

Ywak pi Gondri mi Yerusalem ku Yuda

¹⁸ A tek acopo jukra gira ni can! adundena voc yor i ia.

¹⁹ Nen, dwal mi ywak pa nya dhanu para kud i ng’om ma ni bor ngbir kumae: Yehova ni i Sayuni ngo? Ubimo pare ni i ie ngo? Nedi ginyayu ng’ecwiny i ia kud ayi gin m’acwia m’apaya migi, man ku gin ma ie nanu ma tung’i?

²⁰ Mwoka kadhu, jucoko gin mi cwir, man waboth ungo.

²¹ Kum rem ni i kuma ni kum rem pa nya dhanu para: aywak; wang’uic umaka.

²² Yath mi mo mbe i Gileadi? jakeikum moko mbe kuca? ka kumeno nedi judwoko leng’kum pa nya dhanu para ngo?