Yeremia 7 - The Holy Bible In Alur (Lur) Revised Orthography

Yik Yo Mu Ku Giratima Mu

¹ Lembe bino ba Yeremia m’uai ba Yehova, m’uwacu kumae,

² Cung i dhugang’ mi ot pa Yehova, man iyer lembe maeni kuca, man iwac kumae, Wuwinj lembe pa Yehova, kewu ceke i Yuda, m’umondo i dhugang’ maeni nirwo ni Yehova.

³ Yehova mir udul, Mungu mir Israel, uwacu kumae, Wuyik yo mu ku giratima mu, man abiketho wubedo i ka maeni.

⁴ Kud wugen lembe mi ndra, ma wuwac ko kumae, Maeni gi hekalu pa Yehova, hekalu pa Yehova, hekalu pa Yehova.

⁵ Kum tek wuyiko yo mu ku giratima mu mii; tek wutimo pokolembe i kind dhanu ku wadi mii;

⁶ tek wusendo umondo ngo, ku tic, ku dhaku ma cware tho, man wucwiro rimo m’umbe dubo ngo i ka maeni, kadi wuwotho tok mungu mange ngo ni can mu giwu:

⁷ abilund ketho wubedo i ka maeni, i ng’om m’amio ni kwaruwu, ugambre con cil mi nja.

⁸ Nen, wugeno lembe ndra, ma kulokane mbe.

⁹ Wubikwalu, ku negonek, ku dubri swa, ku kwong’o ku ndra, man wang’u udok ma ng’wice ng’ar ni Bal, ku wotho tok mungu mange ma fodi wukung’eyo ngo,

¹⁰ man wubibino wubicungo i wang’a i ot maeni, m’ulwongre ku nyinga, man wubiwacu kumae Waboth; kara wutim ginmajudagu maeni ceke?

¹¹ Ot maeni, m’ulwongre ku nyinga, udoko ni odayeki i weng’wu? Nen, an, ndhu an, aneno maeni, Yehova wacu.

¹² Ento wuci kawono ba kakara ma naka ni i Cilo, ka m’aketho nyinga lar ubedo i ie, man inen gin m’atimo i kume kum dubo mi dhanu para Israel.

¹³ E kawono, kum wutimo tic maeni ceke, Yehova wacu, man ayero iwu, m’aai ko pir man ayero, ento wuwinjo ngo; man alwong’owu, ento wuloko lembe ngo:

¹⁴ ka kumeno abitimo ba ot m’ulwongre ku nyinga, ma wugeno ni kume, man kum ka m’amio iwu ni kwaruwu de, calu atimo kum Cilo.

¹⁵ Man abibayuwu woko kud i wang’a, calu abayu utumegwu ceke, en e kodhi ceke pa Efraim.

Kwinyo pa Mungu wi Rwo ni Ayi Gin M’acwia

¹⁶ Ka kumeno kud irwo pi dhanu maeni, kadi kud iting’ ywak kadi rwo pigi, kadi kud itim kwayukwac ira; kum abiwinji ngo.

¹⁷ E ineno ngo gin ma gitimo i adhura mi Yuda man i gengi mi Yerusalemi?

¹⁸ Nyithindho coko yen, e wego cwinyo mac, man mon umieno kwen, kara gitim kwen m’apada ni ubimo ma dhaku m’i polo, man kara gikonj lam m’amadha ni mungu mange, kara ginyai ng’ecwiny i ia.

¹⁹ Ginyayu ng’ecwiny i ia? Yehova wacu; gin gigi ngo, ni lewic m’i wang’gi gigi?

²⁰ Ka kumeno Rwoth Yehova wacu kumae; Nen, ng’ecwiny para ku kwinyo para bikonjre woko wi ka maeni, wi dhanu, man wi lim, man wi yedhi m’i thim, man wi nying’ ng’om; e ebiwang’, man jubinege ngo.

Lembapoka wi Yuda kum Jai Migi

²¹ Yehova mir udul, Mungu mir Israel, uwacu kumae: Wumed lam m’awang’a mu kum lam mu, man wucam ring’o.

²² Kum ayero ni kwaruwu ngo, kadi ang’olo igi de ngo i ceng’ m’awodhogi ie woko kud i ng’om Misiri, pi lam m’awang’a kadi lam:

²³ ento gin maeni ang’olo igi, awacu kumae, Wuwinj dwanda, e abibedo Mungu mu, man wubibedo dhanu para; man wuwoth i yo ceke m’ang’olo iwu, kara lembe bed miero iwu.

²⁴ Ento giwinjo ngo, kadi giciko ithgi de ngo, ento giwotho i lembapora migi gigi man i udhuko mi cwinygi ma rac, man gicoro cen, gicidho acidha de ngo.

²⁵ Ugambre i ceng’ ma kwaruwu wok ie woko kud i ng’om Misiri cil i ceng’ ma tin, aoro jutic para ceke ma jubila i beng’wu, m’aai pir aorogi de ku ba rupiny ku ba rupiny:

²⁶ ento giwinjo dwanda ngo, kadi giciko ithgi de ngo, ento gidwoko ng’utgi tek: gitimo rac ma sagu kwarugi.

²⁷ Man ibiyero lembe maeni ceke igi; ento gibiwinji ngo: e ibilwong’ogi bende; ento gibiloko iri lembe ngo.

²⁸ E ibiwacu igi kumae, Maeni thek m’uwinjo dwand Yehova Mungu migi ngo, kadi m’ujolo ponji de ngo: lemandha nyothre, man ekabre woko kud i dhoggi.

²⁹ Nyar yukwii, E Yerusalem, man ibaye cen, man iting’ ywak wi ka m’utingre ma lelele; kum Yehova kwero man ekuno dhanum’utuk mi kwinyo pare.

³⁰ Kum nyithindho mi Yuda gitimo gin ma rac i wang’a, Yehova wacu: giketho ginmajudagu migi i ot m’ulwongre ku nyinga, kara gicide.

³¹ Man gigomo ka ma malu mi Tofeth, ma ni i poga pa wod Hinom, kara giwang’ wotgi ku nyiggi i mac; m’ang’olo ngo, kadi ebino i pidoia de ngo.

³² Ka kumeno, nen, nindo bibino, Yehova wacu, ma jubilwong’e Tofeth kendo ngo, kadi Poga mi wod Hinom, ento Poga mi Nek: kum gibiyiko avu i Tofeth, maram kamoko bibedo ko mbe mi yik.

³³ Man avu dhanu maeni bibedo ni cemo ni winyo ma kor polo, man ni yedi m’i ng’om; e ng’atu moko mbe ma biriemogi.

³⁴ Abilund jigo dwal mir anyong’a man dwal mi mutoro, ku dwand won ambadha man dwand mugole ku i adhura mi Yuda, man kud i gengi mi Yerusalem; kum ng’om bidoko ni uvuru.