Yakobo 3 - The Holy Bible In Alur (Lur) Revised Orthography

¹ Kindwu dupa kud ubed juponji, juwada, ma wung’eyo ko nia wabinwang’u lembapoka tek ma sagu.

² Kum i gin dupa wan ceke wakier. Tek ng’atu moko kier ungo i lembe, meca ng’atuca en e ng’atu ma bedo ndhu cu, m’ecopo twinyo kum ceke bende.

³ Nie tek waketho gwang’ mi kana i dhu kana kara giworwa, e watwinyo kumgi ceke bende.

⁴ Nen, combo bende, kadok gi dit hai man julekogi ku yamu ma tek, jutwinyogi kud utwindi ma nyathigi, yo ka ma mubalia yenyo.

⁵ Kumeno leb bende en e wathkum ma nyanok, man elulo gin ma dit. Ei nen, thwo yen ma rokeno ngi jucwinyo ku nyathi mac ma rokeni!

⁶ Leb de en e mac: leb en e ng’om dubo m’i kind wathkumwa, m’ecido kum ceke, man ke ecwinyo ulag nyodo, en ke gehena cwinye re.

⁷ Kum dhanu rambu kwond yedi ceke ku winyo, ku gin ma lak i ng’om ku gin m’i nam bende, gidoko mol, man ke jugamu rambugi con:

⁸ ento leb ng’atu moko mbe ma copo rambe edok mol; en e gin ma rac m’ubetimbre awe, epong’ ku yath ma negojo.

⁹ Wafoyo kude Rwoth ku Wego; wakwong’o kude dhanu, ma jucwio kud ayi Mungu;

¹⁰ mugisa ku kwong’ de giai kud i dhok acel. Juwada, maku maeni kud ubed kumeno.

¹¹ Kulo molo pi ma mit ku ma kec de kud i wang’e aceli?

¹² juwada, ulam copo cego ulemo, kadi ulok ke ulami? kadok pi mi kadu de copo wodho pi ma mit ungo.

Rieko M’uai Malu

¹³ Ng’a ma riu i kindwu m’ung’eyo lembe? wek enyuth tic pare ku kwo pare ma ber ku molcwiny mi rieko.

¹⁴ Ento tek wubedo ku kumira m’akeca ku koiri bende i adundewu, kud wuheru, kud wucwai ndra kum lemandha.

¹⁵ Rieko maeni en e rieko m’uai malu loro piny ungo, ento en e m’i ng’om, mi kum m’anyola, pa wonabali.

¹⁶ Kum ka ma kumira ku koiri ginuti ie, yakni ku tic ceke ma rac de ginuti.

¹⁷ Ento rieko m’uai malu elar ebedo leng’, macen mi kwiocwiny, yo de, ma yot kum winjo lembe, pong’ ku kisa ku nying’ ma jucego, ma piem umbe, dhok ario de mbe.

¹⁸ E nying’ bedopwe jucoyo i kwiocwiny ni ju m’unyayu kwiocwiny.