Yakobo 2 - The Holy Bible In Alur (Lur) Revised Orthography

¹ Juwada, kud wubed ku yic pa Rwoth Yesu Kristu, Rwoth mi dwong’, ma dhanu bedo tung’ tung’ i weng’wu.

² Kum tek ng’atu moko bino i kacokri mu ku lagith mi mola ma kwar, ku kendi ma ber de, man jacan bende mondo i ie ku kendi ma rac;

³ e ng’atu m’ukendo kendi ma ber e ma bedo ber i weng’wu, man wuwacu kumae, Dong’ ibed kakae i ka ma ber; ni jacan e ma wuwacu kumae, Cung kaca, kadi ibed the kom mi tienda;

⁴ meni nwang’u w uketho dhanu bed tung’ tung’ i weng’wu i kindwu giwu ngo, man ke wudoko jupoklembe mi lembe ma rac ma iwu pido ngo?

⁵ Wuwinji, juwada ma jumerna; Mungu foyo ju ma gi jucan m’i ng’om ungo ya gilony i yioyici, ma gibed ni jucampacu mi ker m’eng’olo ni ju m’umare?

⁶ Ento wuranju jucan. Julonyo givoyowu ngo, man ke gin nica e ma giywayuwu i wang’ kom mi pokolembe ngo?

⁷ Gicido nying’ mi yung ma wulwongru kudo ngo?

⁸ Ento tek wuketho cik mi ker utimbre kakare, calku lembagora pa Mungu ma kumae, Dong’ imar wat peri calu imeri giri, nwang’u wutimo dre:

⁹ ento tek dhanu bedo tung’ tung’ i weng’wu, nwang’u wudubo, ma cik utuco wiwu ya wu judubo.

¹⁰ Kum ng’atu ma tek biworo cik kpo, e kan acel ukier ire, meca edoko jadubo mi cik kpo.

¹¹ Kum ng’atu m’uwacu kumae, Kud igier mon mi juwedu, e en nini e m’ewacu kumae bende, Kud ineg nek. Nie tek igiero mon mi juwedu ngo, enke inego neki, nwang’u idoko jadubo mi cik.

¹² Dong’ lembe ma wuweco ku gin ma wutimo de ubed kumeno, calu dhanu ma jubipoko lembe migi ku cik mi gony.

¹³ Kum pokolembe kisa pare mbe ni ng’atu m’unyutho kisa ngo: kisa behaire kum pokolembe.

Yioyic ma Tije Mbe En e Avu

¹⁴ Kuloka en e ang’o, juwada, tek ng’atu moko wacu ya ebedo ku yioyic, enke tic umbe kude? yioyic nino copo bodhe?

¹⁵ Tek umego kadi nyamego ebedo muneru man ke cemo mi ceng’ ku ceng’ umbe kugi,

¹⁶ e ng’atu acel m’i kindwu wacu igi kumae, Wuci ma cwinywu kwio, kumwu de bed mor wuyeng’ de; ento wumio igi gin ma cande ni i kumgi ngo; nwang’u kulokane en e ang’o?

¹⁷ Cil kumeno yioyic de, tek ebedo ku tic ungo, en e avu i ie gire.

¹⁸ Eyo, ng’atu moko biwacu kumae, Ibedo ku yioyic, an ke abedo ku tic: nyuth ira yioyic peri nge ku tic peri, an ke abinyutho iri yioyic para ku tic para.

¹⁹ Iyio ya Mungu en e acel; itimo dre: pajogi bende giyio, kumgi de bemiel.

²⁰ Ento iyenyo ing’ei, in i dhanu ma kiti mbe, nia yioyic ma tung’ ku tic ebedo lule?

²¹ Jugonyo lembe ma wi Ibrahim ma wegwa ku tic ungo, kum ethiero Isak ma wode wi pemblami?

²² Ineno ngo ya yioyic utimbre ku tic pare, man ku tic yioyic udoko ndhu cu?

²³ lembagora pa Mungu de timbre kakare m’uwacu kumae, Man Ibrahim uyio Mungu, e jukwane ire ni bedopwe; man julwong’e jarim Mungu.

²⁴ Wuneno nia ng’atu moko lembe m’i wie gonjre ku tic, man ku yioyic kende ngo.

²⁵ Kumeno bende Rahab ma won asara lembe m’i wie gonjre ku tic ungo, kum ejolo jukwenda, man eorogi woko ku yo ku mange?

²⁶ Kum calu kum nge ku cwiny en e avu, kumeno cil yioyic de ma nge ku tic en e avu.