Wer Pa Suleman 5 - The Holy Bible In Alur (Lur) Revised Orthography

¹ Abino i podho para, nyamira, mugole para: Acoko udok ma ng’wice ng’ar para ku yath para ma jwa jwa; Acamu pedekic para ku kic para; Amadhu pigulok para ku cak para. Wucam, E jurimo; Wumadhi, eyo, wumadh k’abamba, E jumer.

Adieng’acwiny pi Kindgi M’upokre

² Anindo ento adundena ceu: En e dwand jamerna m’udwong’o, m’uwacu kumae, Yab ira, nyamira, jamerna, akuruna, ng’atu ma ndhu cu para; Kum wia pong’ ku thoi, Yukwia ku pi ma ton mi diewor.

³ Awanyu kendi para; abironye nenedi? Alwoko tienda; abicidogi nenedi?

⁴ Jamerna royo cinge ku wang’ dhugola, E ngisi nego adundena pire.

⁵ Aai malu kara ayab ni jamerna; E cinga podho kud udok ma ng’wice ng’ar, Man lweta kud udok ma ng’wice ng’ar ma liu, Wi ramak mir utwindi.

⁶ Ayabu ni jamerna; Ento jamerna eoro cen, e ecidho. Ng’eyong’ec para wok kinde m’eyero: Ayenye, ento anwang’e ngo; Alwong’e, ento eloko ira lembe ngo.

⁷ Jukur m’utieko adhura gbur ginwang’a, Gigoya, gitong’o lero i kuma; Jugwok gang’kidi gimaya ku bongu mi wang’a.

⁸ Akwong’owu, E nyig Yerusalem, Tek wunwang’u jamerna, Nia wuyer ire, ya mer umaka ku kuma. Mugole Yungo Cwar Mugole

⁹ Ng’atu m’imaru esagu jumange ma jumaru, E in i ng’atu ma kumi leng’ i kind moni? Ng’atu m’imaru esagu jumange ma jumaru, Ketho ikwong’owa kumeno?

¹⁰ Jamerna tar man kwar, E jawipiro i kind rubanga apar.

¹¹ Wie calu mola ma kwar ma leng’ hai; Yukwie dinyo, man e col calu upa.

¹² Wang’e calu akuru i ng’et kulo mi pi. M’alwoka ku cak, ma juketho de kakare.

¹³ Limbe calu kavuto mi yath ma jwa jwa, Calu ka m’utingre m’utwio uboko ma ng’ar: Dendhoge calu kura, m’ubetono udok ma ng’wice ng’ar ma liu.

¹⁴ Cinge calu lagith mi mola ma kwar ma jumwono ie kidi ma ie nen ma calu lum: Kume calu tic mi lakliec ma jufuyo ku kidi ma tek ma ie nen uluga.

¹⁵ Tiende calu mbegi mi kidi ma tar ma juketho wi wer mi mola ma kwar ma leng’: Nen pare calu Lebanon, ma ber hai calu musonge.

¹⁶ Dhoge mit hai; Eyo, en e mi mer kwa: Maeni jamerna, man maeni en e jarimba, E nyig Yerusalem.