Tic Mi Jukwenda 9 - The Holy Bible In Alur (Lur) Revised Orthography

Saul Ulokre ba Yesu

¹ Ento Saul, ma fodi ubewodho cim man nek kum julub Rwoth, ecidho ba jalam ma dit,

² man ekwaye ku waraga m’ecidh ko Dameski ba kacokri, kara tek enwang’u jumoko ma gi mi Yojuni, kadok co kadi mon, ekelgi atwia Yerusalem.

³ E kan ebewotho, e etimbre nia edhingo Dameski: e aruca ruca nica der uai i polo ucare ngbeng’:

⁴ e epodho i ng’om, man ewinjo dwal uwacu ire kumae, Saul, Saul, inyayu ragedo i kuma nedi?

⁵ Man ewacu kumae, In i ng’a, Rwoth? Ewacu kumae, An a Yesu m’ibenyayu ragedo i kuma:

⁶ ento ai malu, imond i adhura, man jubiyero iri pi gin m’itim.

⁷ E dhanu ma giwotho gikugi dhoggi tal kau ka giwinjo dwal, ento gineno ng’atu moko ngo.

⁸ Saul uai malu kud i ng’om; e ka wang’e yabre, eneno gin moko ngo; judong’ jupeye apeya ku cinge, jutere ko Dameski.

⁹ Man ebedo ceng’ adek m’eneno ko piny ungo, m’ecamu de ngo kadok amadha de emadhu ngo.

¹⁰ Nwang’u jalub acel ni i Dameski, ma nyinge Anania; e Rwoth uwacu ire ku ginmawokiwang’ kumae, Anania. En de eloko lembe kumae, Nen, anuti, Rwoth.

¹¹ E Rwoth uwacu ire kumae, Ai malu, icidh i gengi ma julwong’o Atira, ipenj ng’atu acel ma nyinge Saul, ma Jatarso, i ot pa Yuda: kum nen, eberwo;

¹² man eneno ng’atu ma nyinge Anania bemondo, ubeketho cinge de i kume kara emak neno piny.

¹³ Ento Anania loko lembe kumae, Rwoth, a winjo pi ng’atuni ba dhanu dupa, maram etimo ko rac kum jumaleng’ peri ma ni i Yerusalem:

¹⁴ keni de ebedo ku ng’ol m’uai ba julam ma dongo m’etwi ko dhanu ceke m’ulwong’o nyingi.

¹⁵ Ento Rwoth uwacu ire kumae, Cidh miri: kum en e agulu m’agoyo wie ira, ya eter nyinga i wang’ Thekdhanumange ku ju m’ubimo ku nyithi Israeli bende:

¹⁶ kum abinyutho ire kwai gin dupa m’ebikosendre kudo be kum nyinga.

¹⁷ E Anania eidho, man emondo i ot; e kan eketho cinge i kume ewacu kumae, Umira Saul, Rwoth ma Yesu m’uwok i beng’i i yo kan ibino, eora kara imak neno piny, Tipo Maleng’ de uromi.

¹⁸ E ndhu ndhu nica gin moko ma calu apoka ai i wang’e podho piny, e emaku neno piny; man eai malu emaku baputisi;

¹⁹ e ecamu cemo man edoko tek. Man ebedo nindo moko ku julub ma gini i Dameski,

Saul Uponjo i Dameski

²⁰ e pio pio eyero pi Kristu nia en e Wod Mungu.

²¹ E kagi ceke ka giwinjo igi wang’ lii, giwacu kumae, Ng’atuni en e ng’atu m’unyotho ju m’ulwong’o nying’ maeni ngo? m’ukele kuni de lembuni, kara etergi atwia wang’ julam ma dongo.

²² Ento Saul udoko tek m’usagu, man eloyo Juyahudi m’ubedo i Dameski, enyutho andha nia maeni en e Kristu.

Saul Upiei ni Juyahudi

²³ E ka ceng’ dupa kadhu, Juyahudi giporo lembe karacelo nia ginege:

²⁴ ento rieko migi ng’eire ni Saul. E gikuro dhugang’ dieceng’ ku diewor de kara ginege:

²⁵ ento julub giting’e ku diewor, e gilure ku wi gang’ ku katoko.

Saul i Yerusalem

²⁶ E kan ewok Yerusalem, eponjo ya en de giribri ku julub: man kagi ceke gilwore, giyio de ngo nia en e jalub.

²⁷ Ento Barnaba game, etere ba jukwenda, man eyero igi maram eneno ko Rwoth i yo, man nia eweco i bang’e, man maram eyero ko ku tegocwinye i Dameski ku nying Yesu.

²⁸ Man gibedo gikugi Yerusalem m’ebedemondo ewok woko de,

²⁹ m’ebeyero ku tegocwinye i nying Rwoth: man eyero epiemo piem de kum Juyahudi ma Juyunani; ento gibeyenyo ya ginege.

³⁰ Ka utumego ging’eyo maeni, gikele piny i Kaisaria, e giore eidho Tarso.

³¹ Ka kumeno kanisa m’i ng’om ceke mi Yahudi ku mi Galilaya man Samaria de gibedo ma cwinygi kwio, e giteng’ni; e ka gibewotho i lworo pa Rwoth man i jukojuk pa Tipo Maleng’, gimedri.

Jukeyo Kum Ainea

³² Gini timbre, ka Petro eidho i ng’et ng’om ceke, eloro piny bende ba jumaleng’ ma gibedo i Luda.

³³ Enwang’u ng’atu acel keca ma nyinge Ainea, m’uvuto ru avuta doko rundi abora; kum kume tho nding’.

³⁴ E Petro wacu ire kumae, Ainea, Yesu Kristu keyo kumi: ai malu, ipedh kavuto peri. E eai malu tho.

³⁵ Dhanu ceke m’ubedo i Luda ku Saron ginene, e giloko cwinygi ni Rwoth.

Dorka Cer

³⁶ Nwang’u jalub acel ma nyinge Tabitha, ma ka juloke edoko Dorka, eni i Yopa: dhaku maeni pong’ ku tic ma ber ku tic ma ni jucan m’etimo bende.

³⁷ Man etimbre i ceng’ maeno, nia kume make, man etho ndhu: e ka gijome, gikethe i ot ma malu.

³⁸ Nwang’u Luda bedo kpengle ku Yopa, e julubne, ka giwinjo nia Petro ni keca, gioro dhanu ario i bang’e, gikwaye kumae, Kud igal ku bino i bang’wa.

³⁹ E Petro ai malu gicidho gikugi de. E kan ewok, gitere i ot ma malu: man mon ma coggi tho ceke gicoro i vute gibeywak, gibenyutho ko kanzu ku kendi de ma Dorka ubedukwoyo ma fodi enuti i bang’gi.

⁴⁰ Ento Petro wodhogi ceke woko, man erum piny, erwo de; man elokre bang’ avu, ewacu kumae, Tabitha, ai malu. E eyabu wang’e, e kan eneno Petro, eai wi there.

⁴¹ Man emio ire cinge, eting’e ko malu; e elwong’o jumaleng’ ku mon ma coggi tho de, man ethiere m’e kwo.

⁴² E lembene ng’eire cil i Yopa ceke: dhanu dupa de giyio ni Rwoth.

⁴³ Man etimbre, nia Petro bedo ceng’ dupa i Yopa giku Simon ma jabodho mir adila.