Tic Mi Jukwenda 4 - The Holy Bible In Alur (Lur) Revised Orthography

Petro ku Yohana i Wang’ Dilo

¹ E ka gibeyero ni dhanu, julam man jadit mi hekalu ku Jusadukayo gibino i bang’gi,

² ma cwinygi ng’abre dit kum joca ponjo dhanu, man giyero ni kum Yesu pi cer ku kind ju m’utho.

³ E giketho cing’gi i kumgi, man gikethogi i odkol tundu mir urwone: kum nwang’u piny udoko uthieno.

⁴ Ento dupa m’i kindgi m’uwinjo lembene giyio; e wel jumaco doko ve rubanga abic.

⁵ E urwone lembe timbre kumae, ya jubim migi ku judongo man jugorcik de gicoko dhoggi i Yerusalem;

⁶ e Ana ma jalam ma dit de nuti, ku Kayafa, man Yohana, man Iskander, ku dhanu ceke ma gi jupagi jalam ma dit de.

⁷ E ka giketho joca i diere, gipenjo kumae, Wutimo maeni ku tego ang’o, kadi ku nying’ ng’a?

⁸ E Petro, ma Tipo Maleng’ urome, elund ewacu igi kumae, Wu jubim mi dhanu, ku judongo de,

⁹ tinuni tek wubepenjowa pi tic ma ber m’utimbre kum ng’atu ma ng’ic, ya girang’o m’udwoko ng’atuni dho;

¹⁰ kewu ceke dong’wung’ei, ku dhanu pa Israel ceke bende, nia ku nying’ Yesu Kristu ma Nazareti, ma wugure, ma Mungu ketho ecer ku kind ju m’utho, e ng’atuni cungo dho i vutwu kakeni ni kume.

¹¹ En e kidi ma wun wu jugomot wudwoke ni gin mananu, ma judwoke ni wie mi gui.

¹² Man ni kum ng’atu mange both umbe; kum nying’ mange mbe the polo, ma jumio i kind dhanu, ma wakowaboth be ni kume.

¹³ Nie ka gineno tegocwiny pa Petro giku Yohana, ging’eyo de ya gi dhanu ma sang’na ma cobo de, igi wang’ lii; e ging’eyo pigi, ya naka gibedo giku Yesugi.

¹⁴ E ka gineno ng’atu ma kume kei cungo i bang’gi gicopo yero gin moko ngo pire.

¹⁵ Ento ka ging’olo ya giai cen kud i dilo, gipido lembe i kindgi gigi,

¹⁶ giwacu kumae, Wabitimo ang’o kum joni? kum musana ma pire dwong’ utimbre ni kumgi andha, unyuthre ni dhanu ceke ma gibedo i Yerusalem; wan de piembe loyowa.

¹⁷ Ento kara kud eyik apila i kind dhanu, dong’ wacimugi, kara ku giyer nying’ maeni kendo ni ng’atu moko.

¹⁸ E gilwong’ogi, man gipoko igi ya ku giyer ku nying Yesu ki man ku giponj i nying Yesu.

¹⁹ Ento Petro giku Yohana gidwoko lembe giwacu igi kumae, Tek en e atira i wang’ Mungu ya wawinj i beng’wu ma sagu ma ba Mungu, wupok wun:

²⁰ kum wacopo weko yero pi gin ma waneno ku ma wawinjo de ngo.

²¹ E gin, ka gicimogi kendo, gigonyogi ma ginwang’u gin moko ngo ma gisendgi i kume ni kum dhanu; kum dhanu ceke giyungo Mungu kum gin m’utimbre.

²² Kum ng’atu ma musana mi kum acanga timbre i kume, nwang’u rundi pare sagu pier ang’wen.

Juyic Ukwayu Tegocwiny ba Mungu

²³ E ka jugonyogi, gibino ba juwagi, man gigonyo lembe ceke ma julam ma dongo ku judongo de giyero igi.

²⁴ Gin de, ka giwinjo maeni, giting’o dwandgi malu ba Mungu ku cwinygi m’uripo acel, man giwacu kumae, E Rwoth, in m’icwio polo ku ng’om ngi ku nam de, ku gin ceke ma ni i igi bende:

²⁵ In ma yang’ iwacu ku Tipo Maleng’, ku dhu wegwa ma Daudi ma jatic peri kumae, Thekdhanumange timo ng’ecwiny apila nedi, Kodhi dhanu de bepido pi gin ma kite mbe nedi?

²⁶ Ju m’ubimo m’i ng’om girieri gigi, Jubim de coko dhoggi karacelo, Kum Rwoth, man kum Kristu pare:

²⁷ kum andha i adhura nini Herode giku Pontio Pilato, karacelo ku Thekdhanumange ku kodhi dhanu pa Israel de, gicoko dhoggi kum Yesu ma Jatic peri maleng’, m’iwiro mo i wie,

²⁸ ya gitim gin ma yang’ cingi ku lembapora peri gilar giketho ya bitimbre.

²⁹ Kawono, Rwoth, nen cim migi: man dong’ imi ni jumiru peri ya giyer lembe peri ku tegocwiny kwa,

³⁰ kan irieyo cingi m’ikeyo ko tho; man kara giranyutha ku musana de timbre ni kum nying’ Jatic peri maleng’ Yesu.

³¹ E ka gidaru rwo ka ma gicoko ie dhoggi karacelo yengre; e kagi ceke Tipo Maleng’ uromogi, man giyero lem pa Mungu ku tegocwiny.

Adundegi ku Ng’eyong’ec Migi Ripo Acel

³² Man udul mi ju m’uyio adundegi ripo acel ku ng’eyong’ec de: ng’atu acel de mbe m’uwacu ya ng’et kum gin m’ebedo ko ya pare gire; ento giribo gin ceke karacelo.

³³ E jukwenda ginyutho pi cer pa Rwoth Yesu ku tego ma dit: e bero ma dit ubedo i wigi ceke.

³⁴ Kum moko mbe m’i kindgi ma canpiny unegogi: kum ceke ma gi weg pothi kadi udi de giloko, man gikelo wel piny mi gin ma gilokone,

³⁵ gikethogi de the tiend jukwenda: e jupoko pokne ku ba dhanu nzu, ma can pinje ni i kumgi.

³⁶ Man Yusuf, ma jukwenda gilwong’e Barnaba (ma, ka juloke, en e Wodjuk), e Jalawi, dhanu ma thugi ni Kupro,

³⁷ e won podho, eloke, ekelo sentene de eketho the tiend jukwenda.