Tic Mi Jukwenda 24 - The Holy Bible In Alur (Lur) Revised Orthography

Adote kum Paolo

¹ E ka ceng’ abic ukadhu jalam ma dit ma Anania loro piny ku judongo moko, ku ng’atu acel de ma dwande leng’, ma nyinge Tertulo; man gidoto Paolo ba jabim.

² E ka julwong’e, Tertulo maku dote, ewacu kumae, Kum wanwang’u kwiocwiny ma dit ni kumi, in i Feliki ma dwong’, man ni kum gwok peri gin ma rac uyikre ni thek maeni,

³ wajolo maeni i yo ceke, i kaka ceke de, man ku foyofoc ceke.

⁴ Ento, kara kud aoli kendo, akwei ya ikoiwinja nyanok ku mol peri.

⁵ Kum wanwang’u ng’atu maeni en e jaganda, e jathub ali i kind Juyahudi ceke i ng’om ngung’, man en e jatel wi weg pokri mi Junazareti:

⁶ man kendo eponjo cido hekalu: e wamake: wabeyenyo wapok lembe pare de ku cik mwa.

⁷ Ento jego ma dit Lusia bino, man emaye kud i cingwa ku kero ma dit,

⁸ man eng’olo ya weg adote pare gibin i beng’i e ibing’eyo gin ma wadote i kume ceke ni kum luro i lembe pare m’ibiluro in.

⁹ E Juyahudi de giribri i lembene, giwacu y a gin maeni bedo kumeno.

Paolo Ugonyo Lembe Pare i Wang’ Feliki

¹⁰ Ka jabim ugwelo ire ya eyer, Paolo loko lembe kumae, Kum ang’eyo nia ibedo japoklembe mi thek maeni rundi dupa, agonyo lembe para ku tegocwiny:

¹¹ kum icopo ng’eyo nia esagu ceng’ apar wi ario de ngo m’aidho ko nirwo i Yerusalem:

¹² man kadok i hekalu ginwang’u apiemo ku ng’atu moko ngo kadi athubo i njuru dhanu de ngo, kadi i kacokri, kadi i adhura de.

¹³ Gin de ecopre igi ngo ma nia giketh ing’ei ya gin ma gidota i kume en e andha.

¹⁴ Ento maeni atuco iri, nia i Yo ma gilwong’o pokri, e ma atimo ie ni Mungu pa kwaruwa, ma wayio ko gin ceke ma gi calku cik, ku lembe m’ugore i kitabu mi jubila bende;

¹⁵ m’abedo ku genogen yo ba Mungu, ma gin gi joni bende gigeno, nia cer ma jucer ko bibedo nuti ni weg bedopwe ku ni weg bedopwe ngo de.

¹⁶ Kum kumeno aponjra gira kara abed ku pidocwiny ma ber m’umbe kier yo ba Mungu ku ba dhanu de thiri thiri.

¹⁷ Nie ka rundi moko kadhu abino nikelo giramia ba thek mwa, kud ajok bende:

¹⁸ ginwang’a i maeni ma ia leng’ i hekalu, ku njuru dhanu de ngo; ku yakni de ngo: ento Juyahudi moko ma giai i Asia ginuti,

¹⁹ ma maku gin de gibed nuti i weng’i keni, gikel adote de, tek gibedo ku lembe moko i kuma.

²⁰ Kadi wek joni gin giwac pi tic ma rac ma ginwang’u kan acungo i wang’ dilo,

²¹ tek en e pi dwal acel maeni ngo, ma nia akok kumae kan acungo i kindgi, Pi cer mi ju m’utho ketho jubetonda i weng’i tinuni.

Paolo i Cing’ Jego M’ukure

²² Ento Feliki, m’ung’eyo pi Yojuno cu m’usagu, ethirogi, ewacu kumae, Ka Lusia ma jego ma dit bilero piny, abipoko lembe mu.

²³ Man eng’olo ni jego ya jukure, man juweke ewoth gire kende; man ku jucer wat pare moko kutimo ire.

²⁴ Ento yo ng’ei ceng’ moko, Feliki gibino giku Drusila, ma cege, ma en e Nyayahudi, e elwong’o Paolo, man ewinje pi yioyic ma ni i Kristu Yesu.

²⁵ E kan eluro lembe mi bedopwe, man pi kwerigijo, ku mi pokolembe ma bibino de, e Feliki doko tipo, man edwoko lembe kumae, Koicidh i yo peri tundu; ka nindo m’ubedo ber ira wok, abilwong’i i bang’a.

²⁶ Egeno nyo Paolo bimio ire sente: kum kumeno ebedelwong’e wang’ udul, man giweco gikude.

²⁷ Ento ka rundi ario kadhu, Portio Festo kabu Feliki; man kum eyenyo Juyahudi gifoye, Feliki weko Paolo atwia.