Tic Mi Jukwenda 16 - The Holy Bible In Alur (Lur) Revised Orthography

Timoteo Cidho Karacelo ku Paolo giku Sila

¹ Man ebino Derbe ku Lustra bende: man nen, jalub moko ni keca, ma nyinge Timoteo, e wod Nyayahudi m’uyio; won mire re Jayunani.

² Ng’atuno umego ma Lustra kud Ikonio de giyero pire ber.

³ E Paolo yenyo gici gikude; e gigame gitimo yaa i kume ni kum Juyahudi ma gini keca: kum kagi ceke ging’eyo nia won mire e Jayunani.

⁴ Man ka gicikukadhu ku kind adhura, gimio igi lem cik ma giwor ma jukwenda ku judongo ging’olo i Yerusalem.

⁵ Ka kumeno kanisa doko tek i yioyic, man gicikumedri ku ba rupiny.

Ginmawokiwang’ Uwok i Wang’ Paolo pi Jamakedoni

⁶ Man gikadhu kud i ng’om Frugia ku Galatia de, gi ju ma Tipo Maleng’ ukwerogi ya ku giyer lembuni i Asia;

⁷ e ka giwok kum Musia, giponjo ya gicidh i Bithunia; e Tipo Yesu yio igi ngo;

⁸ ka gikadhu Musia, giloro Troa.

⁹ Man ginmawokiwang’ uwok i wang’ Paolo ku diewor kumae: Ng’atu acel m’i Makedoni cungo, m’ebekwaye ma tek, ewacu kumae, Bin lokani i Makedoni, man ikonywa.

¹⁰ E kan eneno ginmawokiwang’, e ndhu ndhu nica waponjo cidho i Makedoni, iwa wacu ya Mungu lwong’owa waci wayer lembanyong’a ma juboth ko igi.

Ludia Lokre ba Rwoth

¹¹ Ka kumeno ka waai Troa ku yo mi pi, wacidho atira Samothraki, urwone ke Neapoli;

¹² waai ku keca wacidho Filipi, ma adhura mi Makedoni, en e ma kwong’a mi ng’ombuno, e ng’om mi Rumi; e wario i adhura nini ceng’ moko.

¹³ Man i ceng’ sabatu waai wacidho yo ng’ei gang’ dhu kulo, ka ma wawacu nyo karwo ni ie; e wabedo piny wayero de ni mon ma gicokri karacelo.

¹⁴ Nwang’u dhaku moko ma nyinge Ludia, m’e jatim jamkuloka m’uluga, m’eai i adhura Thuatera, en e ng’atu ma rwo ni Mungu, ewinjo dwandwa: Rwoth uting’o adundene kara ie pid pi gin ma Paolo yero.

¹⁵ E kinde m’emaku baputisi, ku juode de, e ekwayuwa ma tek, ewacu kumae, Tek iwu wacu ya an a mandha ku ba Rwoth, wumond i ot para, wubed keca de. E ecerowa.

Paologi i Odkol i Filipi

¹⁶ Man etimbre, kinde ma wabecidho karwo, ya warombo ku nyaku ma won tipo mi ewo giraewa, m’ekelo piny dit ni wegi kum lembe m’ebedeewo.

¹⁷ Nyano kan ebelubo tokwa waku Paologi ekok akoka, ewacu kumae, Joni gi jumiru pa Mungu ma Malu Ngbir, ma giyero iwu yo mi both.

¹⁸ Etimo maeni ceng’ dupa. Ento Paolo, can umake dit, elokre ewacu ni tipo kumae, Ang’olo iri ku nying Yesu Kristu nia iwok woko kud i ng’atuni. E eai woko i saa maeni nini.

¹⁹ Ento ka wegi gineno nia genogen mi kuloka migi ai, gimaku Paolo giku Sila, man giywayugi aywaya gicidho kugi i katali i wang’ jubim,

²⁰ e ka gikelogi i wang’ jupoklembe, giwacu kumae, Joni, ma gi Juyahudi, gisendo adhura mwa dit apila.

²¹ Man giketho kura ma cik uyio ngo nia wajol, kadi wawor, wan ma wa Jurumi.

²² E udul dhanu ceke giai i kumgi karacelo: e jupoklembe giyeco kendi mi joca woko, man ging’olo ya jufodgi ku dul.

²³ E ka gigoyogi wang’ udul, gicwalugi i odkol, ging’olo ni jakur odkol ya ekurgi kr:

²⁴ en de, kan egamu ng’ol ma kumeno, ecwalugi i kusika ma yo the odkol, eroyo kol de i tiendgi.

²⁵ Ento kinde ma piny udoko diewor ma ling’, nwang’u; Paolo giku Sila giberwo gibewero wer de ni Mungu, jukol de gibewinjogi;

²⁶ e eni eni digidi ma dit uwok, ketho the odkol umaku yengre: e ndhu ndhu nica dhugola ceke yabre; e twic mi jukol de ceke gonjre.

²⁷ Man jakur mi odkol, uceu ku wang’ nindo e kan eneno dhugola mi odkol ubedo thwolo, eting’o palamularu pare nik enegre ko, ewacu nyo jukol upiei.

²⁸ Ento Paolo kok ku dwande ma tek, ewacu kumae, Kud itim gin moko i kumi: kum wan ceke wanuti keni.

²⁹ E elwong’o mac man epiei i ie de, ma kume bemiel ku lworo, epodho piny i wang’ Paolo giku Sila,

³⁰ man ewodhogi woko ewacu kumae, Paco, akoatim ang’o be ketho abothi?

³¹ Man giwacu kumae, Yi Rwoth Yesu, e ibiboth, in ku juodi de.

³² E giyero lembe pa Rwoth ire, ku dhanu ceke ma ni i ot pare de.

³³ E ecokogi ndhu i saa mi diewor nica, man elwoko wang’ goc mi kumgi; e jumie baputisi ndhu ndhu nica, giku juode kpo.

³⁴ Man eterogi malu i ot pare, eketho cam de i wang’gi, e anyong’a nege dit, giku juode ceke, ma giyio Mungu.

³⁵ Ento kinde ma piny uru, jupoklembe gioro asikari, giwacu kumae, Wuwek joni cidhi.

³⁶ E jakur odkol uyero lembene ni Paolo, ewacu kumae, Jupoklembe gioro ya juwek wucidhi: nie dong’ wuwoki, wuci ma cwinywu kwio.

³⁷ Ento Paolo wacu igi kumae, Gifodowa i wang’ dhanu, ma jukupoko lembe mwa rac ungo, ma wan ke wa Jurumi, man gicwaluwa i odkol; e kawono gibewodhowa ling’i? ungone; ento wek gibin giwodhwa woko gin.

³⁸ E asikari gidwoko lembe maeni ni jupoklembe: e lworo negogi ka giwinjo nia gi Jurumi;

³⁹ e gibino gipaku dhoggi igi; e ka giwodhogi woko, gipenjogi ya giai woko kud i adhura.

⁴⁰ E giai woko kud i odkol gici gimondo i ot pa Ludia: e ka gineno umego, gijukogi, man gicidho.