Tic Mi Jukwenda 13 - The Holy Bible In Alur (Lur) Revised Orthography

¹ Nwang’u i kanisa ma Antiokia, jubila pa Mungu ku juponji de ginuti, Barnaba, man Simeon ma julwong’o Niger, man Lukio ma Kurene, ku Manaen m’umin m’apidha pa Herode ma jabim, man Saul.

² E kinde ma gibetimo ni Rwoth, ma giweko ko cam de, Tipo Maleng’ uwacu kumae, Koi ira Barnaba ku Saul kum tic m’alwong’ogi-i kume.

³ E ka giweko cam girwo de giketho cing’gi i wigi, e giorogi.

Julub Uponjo i Kupro

⁴ Kum kumeno joca, ma Tipo Maleng’ uorogi, giloro piny Selukia; e giai keca gicidho Kupro ku yo mi pi.

⁵ Ka gini i Salamini, giyero lem pa Mungu i kacokri mi Juyahudi: gibedo ku Yohana bende ma jatim igi.

⁶ Ka gikadhu kud i cula ceke cil Pafo, ginwang’u ajoga moko, m’e jabila mi ndra, ma Jayahudi, ma nyinge Bar-Yesu;

⁷ ma gibedo karacelo giku jabim, ma Sergio Paolo, e ng’atu m’ung’eyo girang’eya. Ng’atuno lwong’o Barnaba giku Saul i bang’e, man eyenyo ewinj lem pa Mungu.

⁸ Ento Eluma ma ajoga (kum nyinge kumeno ka juloke) ejai igi, m’eyenyo ewing jabim woko kum yioyic.

⁹ Ento Saul, ma julwong’o Paolo bende, ma Tipo Maleng’ urome, etono wang’e i bang’e,

¹⁰ ewacu kumae, In ma thwo ndra ku tic ma rac ceke pong’ ii, i wod wonabali, i jakwoj bedopwe ceke, ibiweko loko wang’ayo ma pwe pa Rwoth ungo?

¹¹ Kawono, nen, cing’ Rwoth ni i kumi, in de ibibedo abinga, ma nindo moko ibineno ko ceng’ ungo. E ndhu ndhu nica utor ku mudho podho i wie; e emaku yenyo ka ng’atu m’upeye ku cinge.

¹² E jabim, kan eneno gin m’utimbre, elund eyio, ma ie wang’ lii kum ponji pa Rwoth.

Paolo ku Barnaba i Antiokia mi Pisidia

¹³ Nie, Paolo giku juwagi gitugo woth kud i Pafo ku yo mi pi, giwok Perga i Pamfulia: e Yohana wekogi edok Yerusalem.

¹⁴ Ento gin, ma giai Perga, giwok Antiokia m’i Pisidia; e ceng’ sabatu gimondo i kacokri, man gibedo piny.

¹⁵ E yo ng’ei somo cik ku jubila judongo mi kacokri gioro lembe i bang’gi, giwacu kumae, Umego, tek wubedo ku lembe moko mi juk ni dhanu, wuwaci.

¹⁶ E Paolo ai malu, eting’o cinge man ewacu kumae: Wu dhanu pa Israel, ku wun ma wulworo Mungu de, wuwinji.

¹⁷ Mungu mi dhanu pa Israel maeni ugoyo wi kwaruwa, eyungo dhanu de ka gibedo ni umondo i ng’om Misiri, man etelo wigi ewodho kogi woko kud i ie ku bote ma tek.

¹⁸ E i nindo ma yenyo romo pier ang’wen etwio cwinye kum tic migi ma i yamba.

¹⁹ E kan enyotho thek abiro m’i ng’om Kanan, emio igi ng’ombe ni aba, mi rundi ma yenyo romo dak ang’wen ku pier abic:

²⁰ yo ng’ei gin maeni emio igi jupoklembe cil kum Samwil ma jabila.

²¹ Ku yo ng’eye gikwayu ubimo: e Mungu mio igi Saul ma wod Kic, en e dhanu mi suru pa Benyamin, mi nindo mi rundi pier ang’wen.

²² E kinde m’ekabe, eting’o Daudi ni ubimo migi; m’enyutho lembe pire bende ewacu kumae, Anwang’u Daudi ma wod Yese, e ng’atu ma ka cwinya, m’ebitimo ceke ma ia yenyo.

²³ Nie Mungu kelo Jalar, Yesu, ni Israel ku kodhi ng’atuni calu eng’olo;

²⁴ ka Yohana lar uyero pi baputisi mi lokocwiny ni dhanu pa Israel ceke ma fokewok ungo.

²⁵ Man ka Yohana betimo tic maka pare, ewacu kumae, Iwu wacu nyo an a ng’a? An a en ungo. Ento nen, ng’atu acel ubebino i ng’eya ma wara pare gonjre ira ngo kum aromo ngo.

²⁶ Umego, nyikwai kodhi Ibrahim, ku ju m’i kindwu ma lworo Mungu bende, lembe mi both maeni juoro iwa.

²⁷ Kum ju ma gibedo Yerusalem, ku jubim migi de, kum ging’eye ngo, kadok dwand jubila ma jusomo ku ba ceng’ sabatu, giketho etimbre kakare ku gonje.

²⁸ E kadok ginwang’u the nek ungo i ie, ento gikwayu Pilato ya junege.

²⁹ E ka gidaru timo gin ceke ma jugoro pire kakare, e gifudhe piny ku kor yen, man gikethe i bel m’aroka i cana.

³⁰ Ento Mungu ketho ecer ku kind ju m’utho:

³¹ ju ma giai kugi Galilaya ma giidho gikugi Yerusalem de ginene wang’ udul, ma kawono gi jumulembe pare ni dhanu.

³² E wakelo iwu rwonglembe ma ber mi lembang’ola ma jumio ni kwaru,

³³ nia Mungu ketho lembene timbre kakare ni nyithindho mwa, kum eketho Yesu cer; calu egore i zaburi mir arionde kumae, In i Woda, tin anyoli.

³⁴ Man pi lembe m’eketho ecer ko ku kind ju m’utho, ma kawono dong’ edwogo kendo ngo ba top, eyero kumae, Abimio iri mugisa pa Daudi ma leng’ mandha de.

³⁵ Kum ewacu i zaburi mange bende kumae, Ibimio Ng’atu Maleng’ peri ngo nineno top.

³⁶ Kum ka Daudi daru timo porolembe pa Mungu i kind dhanu m’i kume, enindo, jukethe ba kwaru mire de, man eneno top:

³⁷ ento ng’atu ma Mungu ketho ecer re k’eneno top ungo.

³⁸ Ka kumeno dong’ wung’ei, umego, nia ni kum ng’atuni jubeyero iwu pi ruc mi dubo:

³⁹ man ku ba dhanu ceke ma giyio, lembe m’i wigi gonjre ni gin ceke, ma jucopo gonyo kowu ngo ku cik pa Musa.

⁴⁰ Ka kumeno, wubed ku weng’wu, kara maeni m’uyere i kitabu mi jubila kud uwok i kumwu ma kumae:

⁴¹ Nen, wu jucac, iwu wang’ lii de, man wurwiny; Kum atimo tic i nindo mu, Tijuno ma wubiyio ki ngo, tek ng’atu moko yero iwu.

⁴² Man ka giwok woko, gikwayu ya juyer igi lembe maeni i ceng’ sabatu ma cen.

⁴³ Nie ka cokri lal, Juyahudi dupa ku ju ma juloko wang’gi ma lworo Mungu gilubo ng’ei Paolo giku Barnaba; gin, ma giweco gikugi, gipiko lembe i igi de ya gibed asu i bero pa Mungu.

⁴⁴ Ceng’ sabatu ma cen adhura ceke coko dhoge kpr kpr ni winjo lem pa Mungu.

⁴⁵ Ento ka Juyahudi neno udul dhanu, ngiri negogi dwanya, e gipiemo lembe ma Paolo yero, giyanyu ayany de.

⁴⁶ Man Paolo giku Barnaba giyero ku fcegocwinygi, giwacu kumae, Maku wakowalar wayer iwu lembe pa Mungu be. Kum wucwale cen kud i kumwu, wupoko giwu ya wuromo ku kwo ma rondo ku rondo ngo, nen, walokra ba Thekdhanumange.

⁴⁷ Kum Rwoth ung’olo iwa kumeno, ewacu kumae, Aketho in ni der mi Thekdhanumange, Kara ibed ni both cil i tung’ ng’om.

⁴⁸ Ka Thekdhanumange giwinjo maeni, anyong’a negogi, e giyungo lembe pa Mungu: e dhanu ceke ma yang’ jukethogi mi kwo ma rondo ku rondo giyio.

⁴⁹ E lembe pa Rwoth uyik tir i ng’ombuno ceke.

⁵⁰ Ento Juyahudi gipiko lembe i mon ma dongo ma lworo Mungu, ku judongo mir adhurane de, e ginyayu ragedo kum Paolo giku Barnaba, man giriemogi woko kud i kieu migi.

⁵¹ Ento gikiro utur m’i tiendgi woko i kumgi, man gibino Ikonio.

⁵² E mutoro ku Tipo Maleng’ de pong’o julub.