Tic Mi Jukwenda 12 - The Holy Bible In Alur (Lur) Revised Orthography

Junego Yakobo man Juketho Petro i Odkol

¹ Nie calu nindo maeno Herode m’ubimo rieyo cinge esendo ko jumoko mi kanisa.

² E enego Yakobo m’umin Yohana ku palamularu.

³ E kan eneno nia maeni nyayu mutoro i Juyahudi, eyenyo nik emak Petro bende. Ceng’ nino en e ceng’ kwen ma thobi mbe i ie.

⁴ E kan emake de, ekethe i odkol, emie de ni thek asikari ang’wen ang’wen ya gikure; ie wacu ya ebiwodhe ni dhanu yo ng’ei cemo mi Kadhukuwijo.

⁵ Ka kumeno jukuro Petro i odkol: ento kanisa giguro rwo ma tek ni Mungu pire.

Jugonyo Petro kud i Odkol

⁶ E kinde ma Herode yenyo ewodhe woko, nie dieworne nwang’u Petro nindo kind asikari ario, m’ebedo atwia ku nyoro ario: jukur de ma nyim dhugola gjkuro odkol.

⁷ Man nen, malaika pa Rwoth ucungo i vute, der de caru i kusika: man epadu Petro i ng’ete, ecewe ko, ewacu kumae, Ai malu pio. E nyoro gony lwany kum cinge.

⁸ Malaika wacu ire kumae, Twiri, roi wara peri de. E etimo kumeno. Man ewacu ire kumae, Bol kendi peri i kumi, man ilub ng’eya.

⁹ E ewok woko, elube de; ere eng’eyo ngo nia gin ma malaika timo e ya andha, ento ewacu nyo eneno ginmawokiwang’.

¹⁰ E ka gikadhu thek jukur ma kwong’ane ku mir arionde, giwok dhugang’ mi nyunyu ma mondo i adhura; m’uyabre igi gire kende: e giwok woko, gikadhu kud i yo acel: e eni eni malaika weke.

¹¹ E ka wang’ Petro lero, ewacu kumae, Kawono apoi ng’eyo andha, nia Rwoth uoro malaika pare ulara kud i cing’ Herode, man kud i genogen ceke mi dhanu mi Juyahudi.

¹² E ka ie pido pi lembene, ewok kum ot pa Mariamu ma min Yohana ma julwong’o Marko; ka ma dhanu dupa gicoko ie dhoggi giberwo.

¹³ E kinde m’ebedwong’o dhugola ma dhugang’, nyaku acel ma nyinge Roda ubino winjo.

¹⁴ E kan eng’io dwand Petro, eyabu dhugola ngo ni anyong’a m’unege, ento eringo emondo, ewacu ya Petro cungo dhugang’.

¹⁵ E giwacu ire kumae, In i avake. Ento eyero asu nia kumeni andha. Gidong’ giwacu kumae, En e malaika pare.

¹⁶ Ento Petro bedwong’o asu: e ka giyabu, ginene de, igi wang’ lii.

¹⁷ Ento en, m’ejukogi ku cinge nia gibed ling’, egonyo igi maram Rwoth uwodhe ko kud i odkol. Man ewacu kumae, Wuyer lembe maeni ni Yakobo, kud umego bende. E eai, ecidho kamange.

¹⁸ Nie kinde ma piny uru, asikari igi bepido dit kum Petro, ya eni kani.

¹⁹ E ka Herode yenye, enwang’e de ngo, erondo jukur, man eng’olo ya juneggi anega. Man eai i Yahudi eloro Kaisaria, ebedo kuca de.

Tho pa Herode

²⁰ Nie ebedo ku thungo kum dhanu mi Turo ku Sidon: e gibino i bang’e ku cwinygi m’uripo acel, man, ka gidaru camu rimo ku Blasto ma jakur kusika p’ubimo, gipenjo ya ng’om ukwi, kum ng’om ma thugi tungre ni kum ng’om p’ubimo.

²¹ Nie i ceng’ ma jung’olo Herode ronjre ku kendi mi ker, ejany ko wi komker de, man eting’o lembayera igi.

²² Dhanu gigoyo muzira, giwacu kumae, Meni dwand mungu, mi dhanu ngo.

²³ E ndhu ndhu nica malaika pa Rwoth ugoye, kum emio dwong’ ni Mungu ngo: man ukoko came, cwinye de mwony ndhu.

Barnaba giku Saul

²⁴ Ento lembe pa Mungu meu man emedre.

²⁵ E Barnaba giku Saul giai Yerusalem, kinde ma gidaru timotim migi kakare, e gigamu Yohana ma julwong’o Marko gidwogo gikugi.