Tic Mi Jukwenda 11 - The Holy Bible In Alur (Lur) Revised Orthography

Petro Dwoko Lembe ni Kanisa i Yerusalem

¹ Nie jukwenda kud umego ma ni i Yahudi giwinjo nia Thekdhanumange bende gijolo lem pa Mungu.

² E ka Petro idho Yerusalem, ju ma gi weg yaa gipiemo gikugi,

³ giwacu kumae, Imondo ba dhanu ma weg yaango, wucamu wukugi de.

⁴ Ento Petro theko, man ekoro igi lembe ceke m’utimbre ku there, ewacu kumae,

⁵ Nwang’u ani i adhura mi Yopa aberwo: e ka piny urwinyo kuda biti aneno ginmawokiwang’, gin moko beloro, calu bongu ma dit ma julure kud i polo ku gunde ang’wen; ram etundo ko cu i bang’a:

⁶ e kan aneno gica tel, ia pido pire de, aneno lim m’i ng’om ma tiendgi ang’wen ang’wen ku yedi m’i thim ku gin ma lak i ng’om man winyo ma kor polo de.

⁷ E awinjo dwal bende m’uwacu ira kumae, Ai malu, Petro; ineg icam.

⁸ Ento awacu kumae, Kumeno ngo, Rwoth: kum fodi gin ma sai kadi gin m’ucido de kumondo i dhoga ngo.

⁹ Ento dwal udwoko lembe kud i polo wang’ arionde kumae, Gin ma Mungu lonyo, kud idwoke ni gin ma sai.

¹⁰ Gica timbre wang’ adek: e juywaye kendo pet i polo.

¹¹ Man nen, ndhu ndhu nica dhanu adek gicungo nyim ot ma wabedo i ie, ma juoro i bang’a uai i Kaisaria.

¹² E Tipo wacu ira ya waci wakugi, dhanu kud ubed tung’ tung’ i wang’a. E umego abusiel maeni de wacidho wakugi; wamondo de i ot pa ng’atuca wakugi:

¹³ man ewacu iwa maram eneno ko malaika m’ucungo i ot pare, m’uwacu kumae, Or kwenda cidh i Yopa, ulwong’ Simon, ma julwong’o Petro;

¹⁴ m’ebiyero iri lembe, m’ibiboth kudo, in ku juodi ceke.

¹⁵ E kan amaku yero, Tipo Maleng’ upodho i wigi, cil calu epodho i wiwa ku kwong’a.

¹⁶ E apoi pi lembe pa Rwoth, maram ewacu ko kumae, Yohana mio baputisi andha ku pi; ento wun re wubimaku baputisi ku Tipo Maleng’.

¹⁷ Ka kumeno tek Mungu mio igi giramia ma calku ma yang’ emio iwa bende, kinde ma wayio ni Rwoth Yesu Kristu, ka an ke an a ng’a, m’acopo jai ni Mungu e?

¹⁸ E ka giwinjo gin maeni, giling’, man giyungo Mungu, giwacu kumae, Kara Mungu mio lokocwiny ma ni kwo ni Thekdhanumange bende.

Kanisa i Antiokia

¹⁹ Ka kumeno ju ma julalugi nge nge kum masendi m’uwok kum Stefano gicidho cil i Foiniki, ku Kupro, man i Antiokia, ma giyero ko lembene ni jumange ngo ndhu ni Juyahudi kendgi.

²⁰ Ento jukucel m’i kindgi, gi dhanu mi Kupro ku mi Kurene de, ma, ka gibino Antiokia, giyero ni Juyunani bende, e giponjogi ku pi Rwoth Yesu.

²¹ Cing Rwoth de ni i bang’gi: e udul mi ju m’uyio gilokri ba Rwoth.

²² E rwonglembe migi tuc i ith kanisa ma ni i Yerusalem: e gioro Barnaba agbele i Antiokia:

²³ ma, kinde m’ewok, eneno bero pa Mungu de, mutoro nege; edong’ eponjogi ceke nia ku tego mir adundegi gimok ndhu kum Rwoth:

²⁴ kum en e ng’atu ma ber, man Tipo Maleng’ urome ku yioyic bende: e dhanu dupa gimedri ba Rwoth.

²⁵ E ecidho Tarso ku yenyo Saul;

²⁶ e kan enwang’e edwogo kude Antiokia. Etimbre de, nia gibegicoko dhoggi karacelo ku jukanisa rundi acel bo, e giponjo dhanu dupa; e jular julwong’o julub Jukristu i Antiokia.

²⁷ Nie ceng’ nica jubila giai i Yerusalem giloro piny Antiokia.

²⁸ Ng’atu acel m’i kindgi ma nyinge Agabu ai malu, man eewo ku Tipo nia ndru ma dit bipodho i ng’om ngung’: etimbre de i ceng’ pa Klaudio.

²⁹ E julub kubang’gi ceke gikeco ya gior piny ma kakorgi bang’ umego ma gini i Yahudi

³⁰ ma gitimo bende, gioro ba judongo ku cing’ Barnaba giku Saul.