Ruth 2 - The Holy Bible In Alur (Lur) Revised Orthography

Ruth Ubeko Kund Cam i Podho pa Boaz

¹ Nwang’u Naomine ng’atu moko nuti i kind payoce, en e ng’atu ma dit ma jalonyo, ma kind wat pa Elimelek; man nyinge Boaz.

² E Ruth ma Nyamoabi wacu ni Naomi kumae, Wek acidh kawono i podho, abek kund cam i kind kumna cam yo tok ng’atu m’abinwang’u bero i wang’e. Man ewacu ire kumae, Cidhi, nyara.

³ E ecidho, man ebino beko kund cam i podho i ng’ei jukai: etimbre ire nia ewok i ng’et podho ma en e piny pa Boaz, ma en e wat pa Elimelek.

⁴ Man, nen, Boaz uai Beth-lehem, man ewacu ni jukai kumae, Yehova bed kudu. Gidwoko ire lembe kumae, Yehova mi mugisa iri.

⁵ Boaz ulund uwacu ni jatic pare ma juketho wi jukai kumae, Nyaku maeni pa ng’a?

⁶ E jatic ma juketho wi jukai uloko lembe man ewacu kumae, En e nyaku ma Nyamoabi ma gidwogo giku Naomi kud i ng’om Moab:

⁷ manewacu kumae, Apenji, ng’ol ira abek kund cam man acok i ng’ei jukai cam i kind kumna ma jutwio. Kum kumeno ebino, man ebedo ugambre kugweno cil ku kawono, ento ebedo nyanok i ot.

⁸ Boaz ulund uwacu ni Ruth kumae, Iwinjo ngo, nyara? Kud icidh ibek kund cam i podho mange, kadi kud iai ku keni, ento bed ndhu kakeni ba jutic para ma nyir.

⁹ Dong’ weng’i bed i podho ma gikayu, man ilub ng’eigi: ang’olo ngo ni awobi nia ku gimul kumi? man ka rieupi negi, ci bang’ agulu, man imadh maeno ma awobi twomo.

¹⁰ Elund epodho arieba wang’e, man egung’ gire i ng’om, man ewacu ire kumae, Anwang’u bero i weng’i nedi, ketho iparu pira, ma an a nya kamange?

¹¹ E Boaz uloko lembe man ewacu ire kumae, Gin ceke m’itimo ni wang’u, ugambre kum tho pa cweri, unyuthre ira kpo; man maram iweko ko wuru ku meru, ku ng’om ma junyoli i ie, man iwok ba dhanu m’ing’eyo ngo ugambre con.

¹² Yehova udwok wang’ tic peri, man sukulia ma cu umire iri ku ba Yehova, Mungu mir Israel, m’ibino ninwang’u kagonjo the bombe.

¹³ Elund ewacu kumae, Wek anwang’ bero i weng’i, Rwoth para; kum ijuka, kum iweco ber ba jatic peri ma nyaku, kadok abedo ngo calu ng’atu acel m’i kind jutic peri ma nyir.

¹⁴ Man i kinde mi cemo Boaz uwacu ire kumae, Bin kue, man icam kum kwen maeni, igwi picwa ku kwen m’ing’wenyo. Man ebedo ng’et jukai; man giting’o ire nganu m’acela, de emwodo, man eyeng’, e eweko donge.

¹⁵ E kan eai malu nibeko kund cam, Boaz ung’olo ni awobi pare, ewacu kumae, Wek ebek kund cam cil kind kumna cam, man kud wujuke.

¹⁶ Man wuwodh moko ire bende kud i kanga, e wuweke, man wuwek ebek kunde man kud wukwere.

¹⁷ Ka kumeno ebeko kund cam i podho cil uthieno; man efodo maeno m’ebeko, man eyenyo romo katoko acel mi nganu.

¹⁸ E eting’e, man ecidho i adhura; wang’u mire de neno gin m’ebeko: man ewodho donge m’udong’ nwang’u eyeng’ emio ire.

¹⁹ Man wang’u mire penje kumae, Tin ibeko kani? itimo tic kani? mugisa ukwany ng’atu m’uparu piri. Man ewacu ni wang’u mire nying’ ng’atu ma gitimo tic kude, man ewacu kumae, Nying’ ng’atu ma watimo tic wakude tin en e Boaz.

²⁰ E Naomi wacu ni ci wode kumae, Mugisa pa Yehova ukwany ng’atu ma kuweko timo ber ungo kum ju ma kwo ku ju m’utho bende. Man Naomi uwacu ire kumae, Ng’atuno en e wat mwa ma ceng’ni, en e ng’atu ma kind payocwa.

²¹ E Ruth ma Nyamoabi wacu kumae, Eyo, ewacu ira kumae, Imok bang’ awobi para, cil ma gidaru mwoka para ceke.

²² E Naomi wacu ni Ruth ma ci wode kumae, En e ber, nyara, nia ici ku jutic pare ma nyir, man ku ginweng’i i podho moko mange.

²³ Kum kumeno emoko kum jutic ma nyir pa Boaz, nibeko kund cam cil i kajik mi mwoka nganu ku mi mwoka nganu ma tung’; e ebedo karacelo ku wang’u mire.