Kitabu Mir Ang’wende Pa Musa Wel 8 - The Holy Bible In Alur (Lur) Revised Orthography

Harun Utimo Tic mi Thethala

¹ Man Yehova yero ni Musa, ewacu kumae,

² Yer ni Harun, man iwac ire kumae, Kinde m’icwinyo thala, thala abiro birieny i wang’ thethala.

³ E Harun utimo kumeca; ecwinyo thalane kara urieny i wang’ thethala, calu Yehova ng’olo ni Musa.

⁴ Man maeni en e tic mi thethala, ma tic mir afoda mi mola ma kwar; cil kum there, man cil kum thiwe, en e tic mir afoda: calkud ayi ma Yehova nyutho ni Musa, e etimo thethala kumeca.

Dwokrileng’ mi Julawi

⁵ Man Yehova yero ni Musa, ewacu kumae,

⁶ Gam Julawi kud i kind nyithindho mir Israel, man idwokgi leng’.

⁷ Man ibitimo kumeni i kumgi, kara idwokgi leng’: kir pi mi dwokrileng’ i kumgi, man wek gigwar kumgi ceke ku riedi, man gilwok kendi migi, e gidwokri leng’.

⁸ E yo ku ng’eye wek gigam nyathi thwon dhiang’, ku lam mi mogone, mogo ma yom ma jujebo ku mo; man ibigamu nyathi thwon dhiang’ mange ni lam mi dubo.

⁹ Man ibithiero Julawi i wang’ hema mi cokri: man ibicoko udul mi nyithindho mir Israel ceke:

¹⁰ man ibi thiero Julawi i wang’ Yehova. E nyithindho mir Israel biketho cing’gi i kum Julawi:

¹¹ man Harun bithiero Julawi i wang’ Yehova ni lam m’awira, ni kum nyithindho mir Israel, kara ebed migi ya gitim giratima pa Yehova.

¹² Man Julawi biketho cing’gi i wi thwoni dhiang’: man ithier acel ni lam mi dubo, man mucelo ni lam m’awang’a, ni Yehova, kara utim adunya ni Julawi.

¹³ Man ibiketho Julawi i wang’ Harun, man i wang’ wote, man ibithierogi ni lam m’awira ni Yehova.

¹⁴ E ibikoyo Julawi kumeni ku kind nyithindho mir Israel; e Julawi bibedo para.

¹⁵ Man yo ku ng’ei maeni Julawi bimondo kara gitim giratima mi hema mi cokri: e ibidwokogi leng’, man ibithierogi ni lam m’awira.

¹⁶ Kum jumiogi amia ira kud i kind nyithindho mir Israel; i kaka dhanu ceke m’uyabu ic, en e kayu mi nyithindho mir Israel ceke, agamugi ira.

¹⁷ Kum kayu ceke ma kind nyithindho mir Israel gi para, dhanu ku lim de: i ceng’ m’agoyo kayu ceke m’i ng’om Misiri adwokogi leng’ ira.

¹⁸ Man agamu Julawi kaka kayu ceke ma kind nyithindho mir Israel.

¹⁹ Man amio Julawi calu giramia ni Harun man ni wote kud i kind nyithindho mir Israel, kara gitim giratima ni nyithindho mir Israel i hema mi cokri, man kara gitim adunya ni nyithindho mir Israel; kara thong’om moko kud ubed i kind nyithindho rair Israel, kinde ma nyithindho mir Israel gibino ceng’ni ba kamaleng’.

²⁰ Musa, giku Harun, man udul ceke mi nyithindho mir Israel, gitimo kumeca kum Julawi: calku gin ceke ma Yehova ng’olo ni Musa pi Julawi, nyithindho mir Israel gitimo kumeca i kumgi.

²¹ E Julawi gidwokri gigi leng’ ni dubo, man gilwoko kendi migi: man Harun uthierogi ni lam m’awira i wang’ Yehova; e Harun utimo adunya igi kara udwokgi leng’.

²² Man yo ku ng’ei maeno Julawi mondo kara gitim giratima migi i hema mi cokri i wang’ Harun, man i wang’ wote: calu Yehova ng’olo ni Musa pi Julawi, e gitimo kumeca i kumgi.

Rundi mi Tic mi Julawi

²³ Man Yehova yero ni Musa, ewacu kumae,

²⁴ Maeni en e gin ma mi Julawi: ugambre kum rundi pier ario wi abic ku ma sagu gibimondo kara gikur giratima i tic mi hema mi cokri:

²⁵ man ugambre ma rundi migi pier abic gibiweko kuro tic, man gibitimo kendo ngo,

²⁶ ento gibitimo karacelo ku utumeggi i hema mi cokri, kara gigwok kur, e gibitimo giratima ngo. Ibitimo kumeni ni Julawi pi kur migi.