Kitabu Mir Ang’wende Pa Musa Wel 6 - The Holy Bible In Alur (Lur) Revised Orthography

Cik pa Janaziri

¹ Man Yehova yero ni Musa, ewacu kumae,

² Yer ni nyithindho mir Israel, man iwac igi kumae, Kinde ma nico kadi dhaku timo lembang’ola ma dit, lembang’ola pa Janaziri, kara ekoire gire ni Yehova,

³ ebikoire gire ni pigulok ku giramadha ma lake tek; ebimadhu cwa mi pigulok ungo, kadi cwa mi giramadha ma lake tek de ngo, kadok pi nying ulok ebimadhu ngo, kadi nying ulok ma nyen kadi m’uthwo de ebicamu ngo.

⁴ Nindo mi koiri pare ceke ebicamu gin moko ngo ma jutimo kud ulok, ugambre kum nyinge cu kum apokane.

⁵ Nindo ceke mi lembang’ola pare mi koiri riedi moko biwok ungo i wie: maram niodone bitimbre ko kakare m’ekoire i ie ni Yehova, ebibedo leng’; ebiweko nying yukwie wobi.

⁶ I nindo ceke m’ekoire i ie gire ni Yehova ebirundo ceng’ni ava ngo.

⁷ Ebicidre gire ngo pi won, kadi min de, pir umin, kadi pi nyamin, ka githo; kum koiri pare ma ni Mungu ni i wie.

⁸ Nindo ceke mi koiri pare en e leng’ ni Yehova.

⁹ Man tek ng’atu moko ng’ol ang’ola i vute m’etho ko, man ecido wie mi koiri pare, ebilund gwaru wie i ceng’ mi dwokrileng’ pare, i ceng’ mir abirone ebigware.

¹⁰ Man i ceng’ mir aborane ebikelo akuru nyangala ario, kadi nyithindh akuru nyathuk ario, ba jalam, ba dhugola mi hema mi cokri:

¹¹ e jalam bithiero acel ni lam mi dubo, man mucelo ni lam m’awang’a, e ebitimo adunya pire kum dubo ni kum avu, man ebidwoko wie leng’ i cenguno.

¹² Man ebikoyo ceng’ mi koiri pare ni Yehova, man ebikelo nyathi nyog rombo ma rundine acel ni lam mi kier: ento nindo ma kwong’a jubikwanu ngo, kum koiri pare cido.

¹³ Man maeni cik ma ni Janaziri, kinde ma nindo mi koiri pare romo kakare: jubikele ba dhugola mi hema mi cokri:

¹⁴ man ebithiero girathiera pare ni Yehova, en e nyathi nyog rombo acel ma rundine acel m’umbe mulima ni lam m’awang’a, man vong’ rombo acel ma rundine acel m’umbe mulima ni lam mi dubo, man nyog rombo m’umbe mulima ni lam mi kwiocwiny,

¹⁵ man katoko mi kwen ma thobi mbe i ie, kwen m’ang’ina mi mogo ma yom m’ujebre ku mo, man kwen m’apada ma thobi mbe i ie ma juwiro ku mo, ku lam mi mogo migi, man lam m’amadha migi.

¹⁶ E jalam bithierogi i wang’ Yehova, man ebithiero lam pare mi dubo, ku lam pare m’awang’a:

¹⁷ man ebithiero nyog rombo ni lam mi girathiera mi kwiocwiny ni Yehova, karacelo ku katoko mi kwen ma thobi mbe i ie: jalam bende bithiero lam mi mogone, ku lam m’amadhane.

¹⁸ Man Janaziri bigwaru wie mi koiri pare ba dhugola mi hema mi cokri, man ebigamu yuk wie mi koiri pare, man ebikethe i mac ma the lam mi girathiera mi kwiocwiny.

¹⁹ Man jalam bigamu bot nyog rombo m’ateda, ku kwen m’ang’ina ma thobi mbe i ie acel ku i katoko, ku kwen m’apada acel ma thobi mbe i ie, man ebikethogi i cing’ Janaziri, yo ng’ei wie mi koiri pare m’egwaru;

²⁰ e jalam biwirogi ni lam m’awira i wang’ Yehova; maeni e leng’ ni jalam, karacelo ku kor m’awira ku bam m’ating’a: e yo ng’ei maeno Janaziri copo madhu pigulok.

²¹ Maeni en e cik pa Janaziri m’ung’olo lembe, man mi girathiera pare ni Yehova pi koiri pare, umedo gin m’ecopo gamu: calku lembang’ola pare m’eng’olo, dong’ etim kumeca be calku cik mi koiri pare.

Mugisa ma Julam Bimio

²² E Yehova yero ni Musa, ewacu kumae,

²³ Yer ni Harun man ni wote, wac kumae, Wubimio mugisa ni nyithindho mir Israel kumeni: wubiwacu igi kumae,

²⁴ Yehova mi mugisa iri, man egwoki:

²⁵ Yehova keth wang’e rieny i wii, man etim i beng’i ku bero:

²⁶ Yehova ting’ wang’e i wii, man emi iri kwiocwiny.

²⁷ Gibiketho nyinga kumeni wi nyithindho mir Israel; e abimio mugisa igi.