Kitabu Mir Ang’wende Pa Musa Wel 5 - The Holy Bible In Alur (Lur) Revised Orthography

Juwodho Ju m’ucido Woko kud i Kagonjo

¹ Man Yehova yero ni Musa, ewacu kumae,

² Ng’ol ni nyithindho mir Israel nia giwodh weg joi woko kud i kagonjo kubang’gi kubang’gi, naan ku ba dhanu ceke ma weg kasinono, man ng’atu ma tek ucido ni kum avu:

³ wubiwodho co ku mon de woko, wubikethogi ng’ei kagonjo; kara ku gicid kagonjo migi, m’abedo i kinde.

⁴ E nyithindho mir Israel gitimo kumeca, e giwodh ogi woko ng’ei kagonjo; calu Yehova yero ni Musa, e nyithindho mir Israel gitimo kumeca.

Cik mi Culocul

⁵ Man Yehova yero ni Musa, ewacu kumae,

⁶ Ver ni nyithindho mir Israel kumae, Kinde ma nico kadi dhaku bidubo lembe moko calu dhanu dubo, ketho nia gikier ni Yehova, man ng’eyong’ec maeno bedo ma lembe ni i wie;

⁷ ebilund tuco dubo pare m’edubo: man ebiculo pi dubo pare kpo, man ebimedo ng’ete mir abije i kume, man ebimie ni ng’atu m’edubo ire.

⁸ Ento tek wadi ng’atu ma jucul ire mbe, cul ma juculo ni Yehova pi dubo bibedo pa jalam; umed nyog rombo mir adunya, ma jubitimo kudo adunya pire.

⁹ Man ku ba lam m’ating’a mi gin ceke ma leng’ mi nyithindho mir Israel, ma githiero ni jalam, bibedo pare.

¹⁰ Man gin ma leng’ mi dhanu kubang’gi kubang’gi bibedo pare: gin ceke ma tek ng’atu moko mio ni jalam, ebibedo pare.

Cik pi Nyeko

¹¹ E Yehova yero ni Musa, ewacu kumae,

¹² Yer ni nyithindho mir Israel, man iwac igi kumae, Tek dhaku pa ng’atu moko kier, man edubo ire,

¹³ man nico moko vuto kude mi tarwang’, man ebedo apana ni wang’ cware, e ebedo amung’a, man ecido, man jamulembe moko mbe i kume, man jurube ngo i lembene;

¹⁴ man tipo mi nyeko bino i wie, man nyeko time kum dhaku pare, e ecido: kadi tek tipo mi nyeko bino i wie, man nyeko time kum dhaku pare, man ecido ngo:

¹⁵ e nicone bilund tero dhaku pare ba jalam, man ebitero girathiera pare pire, ma en e ng’ete mir apaje m’i katoko mi mogo nganu ma tung’; ebikonjo mo i wie ngo, kadi ebiketho udok ma ng’wice ng’ar de ngo i wie; kum en e lam mi mogo mi nyeko, lam mi mogo mi poi, ma jupoyo ko pi dubo.

¹⁶ Man jalam bikele ceng’ni, man ebikethe i wang’ Yehova:

¹⁷ man jalam bigamu pi ma leng’ i agulu mir ulobo; e jalam bigamu kum utur ma ni i die hema, man ebikethe i pi.

¹⁸ E jalam biketho dhakune i wang’ Yehova, man ebigonyo yuk wi dhakune, e ebiketho lam mi mogo mi poi i cinge, ma en e lam mi mogo mi nyeko: man jalam bibedo ku pi ma kec ma kelo kwong’ i cinge.

¹⁹ Man jalam biketho ekwong’o kwong’, man ebiwacu ni dhakune kumae, Tek ng’atu moko ma nico vuto kudi ngo, man tek ikier ungo ku kum acidi, m’ibedo the cing’ cweri, ibed agonya ni pi ma kec maeni ma kelo kwong’.

²⁰ Ento tek ikier, m’ibedo the cing’ cweri, man tek icido, e nico mange vuto kudi ma cweri ngo:

²¹ jalam bilund ketho dhakune kwong’o kwong’ mi lam, man jalam biwacu ni dhakune kumae, Yehova dwoki ni lam man kwong’ i kind juthu, kinde ma Yehova talu bembi, man ekwodo ii;

²² man pi maeni ma kelo kwong’ bimondo i cind ii, man ebikwodo ii, man ebitalu bembi. E dhakune biwacu kumae, Amen, Amen.

²³ E jalam bigoro kwong’ maeni i kitabu, man ebikabugi woko i pi ma kec:

²⁴ man ebiketho dhakune madhu pi ma kec ma kelo kwong’; e pi ma kelo kwong’ bimondo i ie man ebidoko kec.

²⁵ Man jalam bigamu lam mi mogo mi nyeko kud i cing’ dhakune, man ebiwiro lam mi mogo i wang’ Yehova, man ebikele ba pemblam:

²⁶ e jalam bigamu lam mi mogo pong’ cing’ acel, ni poine, man ebiwang’e wi pemblam, man yo ku ng’eye ebiketho dhakune madhu pige.

²⁷ E lande m’eketho emadhu pige, ebilund timbre, tek ecido, man ekier ni cware, nia pi ma kelo kwong’ bimondo i ie man ebidoko kec, e ie bikwot, man bambe bital: e dhakune bibedo ni lam i kind juthugi.

²⁸ Man tek dhakune cido ngo, ento ebedo leng’; ebilund bedo agonya, man ebigamu ie.

²⁹ Maeni cik mi nyeko, kinde ma dhaku, ma ni the cing’ cware, ekier, man ecido;

³⁰ kadi kinde ma tipo mi nyeko wok wi nico, man nyeko time kum cege; ebilund ketho dhaku i wang Yehova, e jalam bitimo cik maeni ceke i kume.

³¹ Man nico bibedo umbe dubo, man dhaku maeno biyeyo dubo pare.