Kitabu Mir Ang’wende Pa Musa Wel 19 - The Holy Bible In Alur (Lur) Revised Orthography

Dwokrileng’ mi Ju ma Gicido

¹ Man Yehova yero ni Musa man ni Harun, ewacu kumae,

² Maeni lembang’ola mi cik ma Yehova ciko, ewacu kumae, Yer ni nyithindho mir Israel, nia gikel iri rwaya ma landu m’ubedo ndhu cu, ma mulima mbe i kume, ma fodi jukuketho mberembere ngo i ng’ute.

³ Man wumie ni Eleazar ma jalam, e ebitere woko yo ng’ei kagonjo, man ng’atu moko binege i nyime:

⁴ man Eleazar ma jalam bigamu kum rimbe ku lwete, man ebikiro rimone yor i wang’ hema mi cokri wang’ abiro.

⁵ E ng’atu moko biwang’u rwayane i wang’e; ebiwang’u lawe, ku ringe, ku rimbe, karacelo ku weine de:

⁶ man jalam bigamu yend musonge, man alagi ku gin ma kwar ngbo, man ebibologi i kind wang’ ma rwaya wang’ ko.

⁷ Jalam bilund lwoko kendi pare, man ebijomo kume ku pi, e yo ku ng’eye ebimondo i kagonjo, man jalam bibedo m’ecido cil uthieno.

⁸ Man ng’atu m’uwang’e bilwoko kendi pare ku pi, man ebijomo kume ku pi, man ebibedo m’ecido maram uthieno wok ko.

⁹ Man ng’atu ma leng’ bicoko vuru mi rwaya, man ebikethe malu yo ng’ei kagonjo i kamaleng’; man jubigwoko vurune ni udul mi nyithindho mir Israel ni pi mi cilo: en e lam mi dubo.

¹⁰ Man ng’atu m’ucoko vuru mi rwaya bilwoko kendi pare, man ebibedo m’ecido cil uthieno: man ebibedo ni nyithindho mir Israel, man ni jawirok m’ubedo i kindgi, ni cik mi nja.

¹¹ Ng’atu m’umulo avu dhanu bibedo m’ecido ceng’ abiro:

¹² ng’atuno bidwokre gire leng’ kudo i ceng’ mir adege, man ebibedo leng’ i ceng’ mir abirone: ento tek edwokre gire leng’ i ceng’ mir adege ngo, e i ceng’ mir abirone ebibedo leng’ ungo.

¹³ Ku ba dhanu ceke ng’atu ma tek umulo avu dhanu, kum dhanu m’utho, man edwokre gire leng’ ungo, ecido hema pa Yehova; man iig’eyong’ec maeno jubikabu woko ku bang’ Israel: kum jukiro pi mi cilo i kume ngo, ebibedo m’ecido; cilo pare fodi ni i kume.

¹⁴ Maeni cik kinde ma dhanu tho i hema: ku ba dhanu ku ba dhanu m’umondo i hema, man ku ba dhanu ku ba dhanu ma ni i hemane, bibedo m’ecido ceng’ abiro.

¹⁵ Man ku bang’ agulu m’ubedo ayaba, ma jutwio girauma i kume ngo, de ecido.

¹⁶ Man ku ba dhanu cekeng’atu ma tek umulo ng’atu ma junego ku palamularu i thim, kadi avu, kadi cogo dhanu, kadi liel, bibedo m’ecido ceng’ abiro.

¹⁷ Man gibigamu ng’et vuru mi wang’ ma juwang’u mi lam mi dubo pi ng’atu m’ucido; e jubiketho pi m’umol ba vurune i agulu:

¹⁸ man ng’atu ma leng’ bigamu alagi man ebiluthe i pige, man ebikire wi hema, man wi agulu ceke, man wi dhanu ma ni keca, man wi ng’atu m’umulo cogo, kadi ju ma junego, kadi avu, kadi liel:

¹⁹ e ng’atu ma leng’ bikiro wi ng’atu m’ucido i ceng’ mir adege, man i ceng’ mir abirone: man i ceng’ mir abirone ebidwoke leng’; man ebilwoko kendi pare man ebijombre gire ku pi, e ebibedo leng’ uthieno.

²⁰ Ento ng’atu ma bicido, man ebidwokre gire leng’ ungo, jubikabu ng’eyong’ec maeno woko kud i kind cokri, kum ecido kamaleng’ pa Yehova: jukiro pi mi cilo i wie ngo; ecido.

²¹ Man ebibedo igi ni cik mi nja: man ng’atu m’ukiro pi mi cilo bilwoko kendi pare: e ng’atu m’umulo pi mi cilo bicido maram uthieno wok ko.

²² E gin ceke ma ng’atu m’ucido mulo ebicido; e ng’atu m’umule ebicido maram uthieno wok ko.