Kitabu Mir Ang’wende Pa Musa Wel 17 - The Holy Bible In Alur (Lur) Revised Orthography

Dul pa Harun

¹ Man Yehova yero ni Musa, ewacu kumae,

² Yer, ni nyithindho mir Israel, man igam dul i bang’gi, acel mi udi pa wego kubang’gi kubang’gi, mi judongomawijo migi ceke calku udi pa weggi, dul apar wi ario: gor nying’gi ceke kubang’gi kubang’gi wi dul migi.

³ Man ibigoro nying’ Harun wi dul pa Lawi; kum dul bibedo acel mi wi udi pa weggi kubang’gi kubang’gi.

⁴ Man ibikethogi malu i hema mi cokri i wang’ lembatuca, ka ma wabirombo ie wakudu.

⁵ Man ebitimbre, nia dul pa ng’atu m’abigoyo nyinge wie bikudo: man abiketho ng’ur mi nyithindho mir Israel ujik i kuma, ma ging’ur ko i kumi.

⁶ E Musa yero ni nyithindho mir Israel; man judongomawijo migi ceke mio dul ire, ku ba judongomawijo acel acel, calku udi pa weggi, en e dul apar wi ario: e dul pa Harun ni i kind dul migi.

⁷ Man Musa ketho dul malu i wang’ Yehova i hema mi lembatuca.

⁸ Man etimbre urwone, nia Musa mondo i hema mi lembatuca; man, nen, dul pa Harun mi ot pa Lawi wie kudo, man ewodho kudone, man ethiwo, man ecego nying akpalakpala ma ngbo.

⁹ E Musa wodho dul ceke woko kud i wang’ Yehova ba nyithindho mirjlsrael ceke: e gineno, man giting’o kubang’gi kubang’gi ng’atuman dul pare.

¹⁰ Man Yehova wacu ni Musa kumae, Dwok dul pa Harun i wang’ lembatuca, kara jugwoke ni giranyutha ni nyithindho mi jai; kara ijig ng’ur migi i kuma, kara ku githo.

¹¹ E Musa timo kumeca: calu Yehova ng’olo ire, e etimo kumeca.

¹² Man nyithindho mir Israel giyero ni Musa, giwacu kumae, Nen, watho, wanyothra, wan ceke wanyothra.

¹³ Ku ba dhanu ceke m’ucoro ceng’ni, m’ubino ceng’ni ba hema pa Yehova, etho: kubang’wa ceke wabitho?