Mika 7 - The Holy Bible In Alur (Lur) Revised Orthography

Kura mi Israel Unyothre

¹ Can i wia mire! kum an a calu kinde ma gicoko nying’ cwir, man calu girabeka mi nyingulok mi mwoka: wicne moko mbe ma jucam; ng’eyong’ec para yenyo ubolo m’ular ucek.

² Dhanu ma ayi Mungu ni i kume rwinyo woko kud i ng’om, e ng’atu moko m’atira mbe i kind dhanu: kagi ceke gikanu adhi mi rimo; ku ba dhanu ku ba dhanu ng’atuman dwaru umin ku voi.

³ Cing’gi ni wi gin ma rac kara gitime kud amora; jaditmawijo penjo, man japoklembe bedo ayika mi jamng’om; e ng’atu ma dwong’, eweco lembe ma rac ma ng’eyong’ec pare yenyo: ka kumeno gicwie karacelo.

⁴ Ma beco mi kindgi e calu ukudho; ju m’atira m’usagu gi rac ma sagu gang’ mir arara: nindo mi jukupiny peri, en e lieu peri, uwok; ang’abacwiny migi bibedo nuti kawono.

⁵ Kud wugen wat; kud wugen jarimo; gwok dhu dhogi ni ng’atu m’uvuto i kori.

⁶ Kum wodo kabu yung mi wego, nyaku ai malu kum min, ci wodo kum wang’umire; judegi mi dhanu en e dhanu mi ot pare ma dhe.

Yehova Kelo Der ku Gony

⁷ Ento an, abineno ba Yehova; abikuro Mungu mi both para: Mungu para biwinja.

⁸ Anyong’a kud unegi i kuma, E jadegina: kinde m’apodho, abiai malu; kinde m’abedo i mudho, Yehova bibedo der ira.

⁹ Abiciro ng’ecwiny pa Yehova, kum adubo ire, maram ebikoro ko i lembe para, man etim lembapoka ira: ebiwodha woko ba der, e abineno bedopwe pare.

¹⁰ E jadegina bilund neno maeni, man lewic biumo ng’atu m’uwacu ira kumae, Yehova Mungu peri ni kani? Wang’a bineno yeny ma ia yenyo i wie; kawono jubinyone piny i unzabu mi gengi.

¹¹ I ceng’ ma jubigomo ie gang’kidi peri! i ceng’ maeca kieu bicoro cen bor.

¹² I ceng’ maeca gibibino i beng’i kud i Ascur man kud i adhura mi Misiri, man kud i Misiri cil kum Kulo ma dit, man ugambre ba nam utundo kum nam, man ugambre kum got cil kum got.

¹³ Ento ng’om bibedo ni uvuru ni kum ju m’ubedo i ie, ni nying’ giratima migi.

Ngisi pa Mungu wi Israel

¹⁴ Bim dhanu peri kud uluth peri, udul mir aba peri, m’ubedo kende, i luli i die Karmel: wek gicam i Bacan ku Gilead, calu i nindo ma con.

¹⁵ Calu i nindo mi wokwoko peri kud i ng’om Misiri abinyutho igi gin ma wang’u ijo.

¹⁶ Thek bineno man lewic binegogi kum tek migi ceke; gibiketho cing’gi wi dhoggi; ithgi bidhing’.

¹⁷ Gibinang’u utur calu thwol: calu gin ma lak m’i ng’om gibiai ma kumgi miel kud i kapondo migi: gibibino ku lworo ba Yehova Mungu mwa, man lworo binegogi ni kumi.

¹⁸ Ng’a ma Mungu calu in, ma weko i kier woko, man ma kadhu ku wi gondri mi dong aba pare m’udong’i? ecere wi kwinyo pare nja ngo, kum anyong’a nege kum mer mi bero.

¹⁹ Ngisi binege kendo i kumwa; ebinyono kier mwa the tielo; man ibibayu dubo migi ceke i thuth mi nam.

²⁰ Ibitimo lemandha ni Yakobo, man mer mi bero ni Ibrahim, m’ikwong’o ni kwaru mwa ugambre i nindo ma con.