Mika 5 - The Holy Bible In Alur (Lur) Revised Orthography

¹ Kawono ibicokri giri ni njuru, E nya njuru: etiekowa kud ali; gibigoyo japoklembe mir Israel ku dul i limbe.

Bimobim pa Jalar mi Beth-lehem

² Ento in, Beth-lehem Efratha, m’i nok m’ibedo kind rubanga mi Yuda, ng’atu moko biwok i bang’a kud ii ma bibedo jabim i Israel; ma wokwoko pare gambre con, ugambre mi nja.

³ Ka kumeno ebimiogi, maram nindo wok ko ma ng’atu m’usendre ku nyodo nyol i ie: e dong’ utumin m’udong’ bilund dwogo ba nyithindho mir Israel.

⁴ Man ebicungo e ebikwayu udul pare ku tego pa Yehova, ku dwong’ mi nying’ Yehova Mungu pare: e gibibedo; kum kawono ebibedo dit cil i tung’ng’om.

⁵ E ng’atu maeni bibedo kwiocwiny mwa. Kinde ma Jaascuri bimondo i ng’om mwa, man kinde m’ebiwotho i udiker mwa, e wabilund ting’o jukwac abiro i kume, man judongomawijo abora.

⁶ E gibinyotho ng’om mir Ascur ku palamularu, ku ng’om mi Nimrod i kamondone: man ebibodhowa ni Jascuri, kinde m’emondo i ng’om mwa, man kinde m’ewotho yor i kieu mwa.

⁷ Man dong’ Yakobo bibedo i kind kodhif dhanu dupa calu thoi m’uai ba Yehova, calu koth wi lum, ma galu ngo ni dhanu, kadi kuro wot dhanu de ngo.

⁸ Man dong’ Yakobo bibedo i kind thek, i die kodhidhanu dupa, calu umvor i kind yedi m’i luli, calu nyathin umvor i kind udul rombe; ma, tek ekadhu akadha, enyono piny man eyeco nziki nziki, e ng’atu moko mbe ma laru.

⁹ Wek cingi tingre malu wi jusend peri, man wek judegi peri ceke thumbri woko.

¹⁰ Man ebitimbre i ceng’ maeca, Yehova wacu, nia abikabu riuni peri woko kud i kindi, man abinyotho magali peri:

¹¹ man abikabu adhura mi ng’om peri woko, man abing’ielo ka ma tek peri ceke.

¹² Man abikabu ajoga woko kud i cingi; e ibibedo ku jubila mi ndra kendo ngo:

¹³ man abikabu ayi gin m’acwia peri m’ang’ika ku mbegi peri kud i kindi; e ibirwo ni tic mi cingi kendo ngo;

¹⁴ e abikabu mungu m’araga peri kud i kindi; man abinyotho adhura peri.

¹⁵ Man abiculo kwor ku ng’ecwiny man kwinyo wi thek m’uwinjo ngo.