Mika 4 - The Holy Bible In Alur (Lur) Revised Orthography

Bim mi Kwiocwiny pa Yehova wi Thek Ceke

¹ Ento ebitimbre i ceng’ ma cen, nia got mi ot pa Yehova bicungo wi usimbru gudi, man ebidodre malu wi ungulu gudi; man kodhidhanu bicori i ie.

² Man thek dupa bicidho man gibiwacu kumae, Wubin, wacidhu waidhu ba got pa Yehova, man ba ot pa Mungu pa Yakobo; e ebiponjo wa ku yo pare, man wabiwotho i yo pare. Kum cik biwok kud i Sayuni, man lembe pa Yehova kud i Yerusalem;

³ man ebipoko kind kodhidhanu dupa, man ebipoko lembe ni thek ma jukero bor ngbir: e gibithiedho palamularu migi ni kwejdhiang’, man tong’ migi ni uligu; thek biting’o palamularu kum thek ungo, kadok ponjo ng’eyo ali de gibiponjo kendo ngo.

⁴ Ento gibibedo kubang’gi kubang’gi ng’atuman the yendulok pare man the yendubolo pare; e ng’atu moko mbe ma binyayu lworo i igi: kum dhu Yehova mir udul uyero maeni.

⁵ Kum kodhidhanu ceke wotho kubang’gi kubang’gi man i nying’ mungu pare: man wabiwotho ku nying’ Yehova Mungu mwa rondo ku rondo.

War mi Israel kud i Ng’eca

⁶ I ceng’ maeca, Yehova wacu, abicoko m’abala ni i kume, man abicoko ju ma juriemogi, ku ju m’asendo;

⁷ man abiketho m’abala ni i kume ni donge, man ma jubayu ni thek ma tek: man Yehova bicamu ker i wigi wi got Sayuni ugambre i nindo maeca cil rondo ku rondo.

⁸ Man in, E odkur mir udul, ungulu got pa nya Sayuni, ebibino i beng’i, eyo, camuker ma kwong’a bibino, en e ker pa nya Yerusalem.

⁹ Nedi ikok ma teki? Ubimo moko mbe ii, japorlembe peri rwinyo, ma nia remokum umeki calu dhaku ma ceng’ni nyoli?

¹⁰ Bed i remokum, man isendri kara inyol, E nya Sayuni, calu dhaku ma ceng’ni nyol; kum kawono ibicidho woko kud i adhura, man ibibedo i podho, e ibibino cil ba Babeli: jubibodhi kuca; Yehova biweri ku kuca kud i cing’ judegini.

¹¹ E kawono thek dupa gicokri i wii, man giwacu kumae, Wek ecidre, man wek wang’wa nen kayeny mwa wi Sayuni.

¹² Ento ging’eyo pidoic pa Yehova ngo, kadok lembapora pare de ging’eyo ngo; kum ecokogi calu kumna ba lela mi fodo.

¹³ Ai man ifodi, E nya Sayuni; kum abidwoko tung peri ni nyunyu, man abidwoko utweng tiendi ni mola; man ibigoyo kodhidhanu dupa nziki nziki: e abikoyo kuloka migi ni Yehova, man piny migi ni Rwoth mi ng’om ngung’.