Mika 3 - The Holy Bible In Alur (Lur) Revised Orthography

Jukwero Jutelwic mi Israel

¹ Man awacu kumae, Wuwinji, akwayuwu, wu juwic pa Yakobo, man jubim mi ot mir Israel: en e iwu ngo nia wung’ei pokolembe?

² wun ma wudagu gin ma ber, man wumaru gin ma rac; wun ma wukabu dendkumgi kud i kumgi man ring’kumgi ku kum cogogi;

³ ma wucamu ring’kum dhanu para bende, man wuyang’u dendkumgi kud i kumgi, man wuturo cogogi de, wutong’ogi de nziki nziki, calu mir agulu, man calu ring’kum i agulu.

⁴ Gibilund ywak ba Yehova, ento ebiloko igi lembe ngo; eyo, ebipanu wang’e igi i nindo maeca, calu ma gitimo rac i giratima migi.

⁵ Yehova wacu kumeni pi jubila m’uketho dhanu para kier; m’ukayu ku lakgi, m’uwacu de kumae, Kwiocwiny; man ng’atu ma tek uketho i dhoge ngo, giyiko ali i kume:

⁶ Ka kumeno ebibedo diewor iwu, kara kud wubed ku ginmawokiwang’; e ebibedo mudho i iwu, kara kud wueu lembe; e ceng’ bimwony wi jubila, man ceng’ bibedo col i wigi.

⁷ Man jubinyayu lewic wi jueulembe, man cwiny ajoga bing’abre; eyo, kagi ceke gibiumo dendhoggi, kum dwokolembe pa Mungu mbe.

⁸ Ento an, apong’ ku tego ku Tipo pa Yehova, man ku pokolembe, man ku tego, kara ayer ni Yakobo pi gondri pare, man ni Israel pi dubo pare.

⁹ Wuwinj maeni, akwayuwu, wu juwic mi ot pa Yakobo, man jubim mi ot mir Israel, ma wudagu pokolembe, man ma wuroco lem m’atira ceke.

¹⁰ Gigomo Sayuni ku rimo, man Yerusalem ku kier.

¹¹ Juwicne poko lembe kum jamng’om, man julamne ponjo mi sukulia, jubilane de ewo lembe mi sente: ento gijengri kum Yehova, man giwacu kumae, Yehova ni i kindwa ngo? gin ma rac moko mbe ma bibino i kumwa.

¹² Ka kumeno jubifuro Sayuni calu podho, man Yerusalem bidoko ni uvuru, got mi ot de calu ka ma malu mi luli.