Mika 2 - The Holy Bible In Alur (Lur) Revised Orthography

Can wi Ju M’udimo Jucan

¹ Can wi ju m’uketho cwinygi kum kier man m’utimo dubo wi kavuto migi mire! kinde ma piny uru, gitime, kum eni i tego mi cing’gi.

² E giketho cwinygi kum pothi, man gigamugi; man udi, e gikabugi: e gisendo dhanu ku juode, en e dhanu kud aba pare.

³ Ka kumeno Yehova wacu kumeni, Nen, apido lembe ma rac kum juot maeni, ma wubikabu ng’utwu ngo kud i bang’e, kadok ku kuhaya de wubiwotho ngo; kum en e nindo ma rac.

⁴ I ceng’ maeca gibiting’o lembabola i kumwu, man gibiywak ku ywak mi can, e gibiwacu kumae, Wanyothra ma gwei: eloko makapiny mi dhanu para: ekabe woko kud i bang’a mire! epoko pothi mwa ni juco.

⁵ Ka kumeno ibibedo ku jumoko ngo ma bibolo tirpiny ku gagi i cokri pa Yehova.

⁶ Kud wueu lembe, giewo kumeni. Gibiewo ni maeni ngo: cac biai ungo.

⁷ E ot pa Yakobo, ebiwacre kumae, Lembe bedo tek ni Tipo pa Yehova? maeni giratima pare? Lembe para timo ber ni ng’atu m’uwotho atira ngo?

⁸ Ento i nindo maeni dhanu para giai calu jadegi: wukabu kendi m’abola ku kum kendi ku kum ju m’ukadhu akadha museme calu dhanu m’ukwero ali.

⁹ Wuriemo mon mi dhanu para woko kud i udi migi ma ber; wukabu dwong’ para ma nja ku ba nyithindho migi m’aradu.

¹⁰ Wuai, man wucidhi; kum maeni kayom mu ngo; kum cilo m’unyotho, en e kum nyoth ma rac.

¹¹ Tek dhanu m’ubewotho i tipo mi ndra cwayu ndra, ewacu kumae, Abiewo iri pi pigulok man pi giramadha ma lake tek; ebibedo jabila mi dhanu maeni.

¹² E Yakobo, abicoki kubeng’i ceke; abicoko dong’ Israel andha; abikethogi karacelo andha calu rombe mi Bothra, calu udul rombe i kind kwac migi; gibitimo woi ma dit ni kum udul dhanu.

¹³ Jamorpiny uidho i wang’gi: gimoro piny man gikadhu ba dhugang’, e giwok woko kudo; man ubimo migi kadhu i wang’gi, man Yehova ni i wigi.