Matayo 17 - The Holy Bible In Alur (Lur) Revised Orthography

Kit Yesu Lokre

¹ Man yo ng’ei ceng’ abusiel Yesu gamu Petro, giku Yakobo, man Yohana m’umin mire; man eterogi malu ka nge wi got ma wiu:

² e kite lokre i wang’gi; wang’e de rieny pami ceng’, kendi pare de doko tar calu der.

³ Man nen, Musa gikud Elia giwok i bang’gi gibeweco gikugi.

⁴ Petro de loko lembe, ewacu ni Yesu kumae, Rwoth, en e ber iwa kum wani keni: tek iyenyo, abigomo odbak adek keni; acel iri, acel ni Musa, acel ke ni Elia.

⁵ Kinde m’ebeweco, nen, afuru m’urieny uketho tipo i wigi: man nen, dwal uwacu ku i afuru kumae, Meni Woda ma jamerna, ma anyong’a nega i kume; wuwinje.

⁶ Ka julubne giwinjo maeni, gipodho arieba wang’gi, lworo de makugi dit.

⁷ E Yesu bino emulo kumgi de man ewacu kumae, Wuai malu, lworo kud unegwu.

⁸ E ka ging’ayu wang’gi malu, gineno ng’atu moko ngo, ndhu Yesu kende.

⁹ E ka gibeloro piny ku wi got, Yesu ng’olo igi, ewacu kumae, Kud wuyer pi ginmawokiwang’ ni ng’atu moko, ma fodi Wod dhanu kucer ungo ku kind ju m’utho.

¹⁰ Julubne de gipenje kumae, Ka kumeno jugorcik giwacu nedi nia Elia bikolarbino be?

¹¹ Man eloko lembe ewacu kumae, Elia bino andha, man ebidwoko gin ceke:

¹² ento awacu iwu, nia Elia daru bino, endre ging’eye ngo, ento gitimo gin ceke ma giyenyo i kume. Wod dhanu bende bisendre igi kumeca.

¹³ Julubne gilund ging’eyo nia eyero igi pi Yohana ma Jabaputisi.

Yesu Wodho Pajogi kud i Nyathin

¹⁴ Man ka giwok bang’ udul dhanu, e ng’atu moko bino i bang’e, erum ire, ewacu kumae,

¹⁵ Rwoth, bed ku kisa kum woda: kum en e won thimbu, man ebesendre dit; kum wang’ udul epodho i mac, man wang’ udul i pi.

¹⁶ E akele ba julubni, man gicopo keyo kume ngo.

¹⁷ Yesu loko lembe ewacu kumae, E dhanum’utuk m’umbe yic ma juco bende, wabibedo wakudu rokani? abisendra kudu rokani? kele i bang’a ku.

¹⁸ Man Yesu juke; pajogi de ai woko kud i ie: e nyiruno kume kei i saa nica.

¹⁹ Julubne gilund gibino ba Yesu ka nge, giwacu kumae, Ewodhre woko iwa ngo nedi?

²⁰ Man ewacu igi kumae, Kum yioyic mu bedo nok: kum awacu iwu andha kumae, Tek wubedo ku yioyic ma ro ku nying atingli, wubiwacu ni got maeni kumae, Ai kakeni ci kuca; e ebiai: gin moko mbe de ma bicopre iwu ngo.

²¹ Ento wagi maeni ai ungo ndhu ku rwo ku weko cam de.

Yesu Nyutho pi Tho Pare Kendo

²² E kinde ma gibedo i Galilaya Yesu wacu igi kumae, Jubimio Wod dhanu i cing’ dhanu:

²³ e gibinege, man i ceng’ mir adege ebicer. E can ma dit apila makugi.

Jumio Ajok

²⁴ E ka giwok Kapernaum, ju ma gamu ng’et sente gibino ba Petro, giwacu kumae, Japonji peri mio ng’et sente ngo?

²⁵ Ewacu kumae, Eyo. E kan ebino i ot, Yesu kwong’o yero ire, ewacu kumae, Ii bepido nik ang’o, Simoni? ju m’ubimo m’i ng’om gigamu jambng’om kadi ajok de ba ng’a? ba wotgi, kadi bang’ umondo?

²⁶ Kan ewacu ire kumae, Bang’ umondo, Yesu wacu ire kumae, Ka kumeno wot gibedo agonya.

²⁷ Ento kara ku waketh gikier, cidh i nam, ibol gol de, man ijak rec m’ular uwok; kan iyabu dhoge de, ibinwang’u sente; iting’ maeno, imi igi kakara wakudi de.