Matayo 14 - The Holy Bible In Alur (Lur) Revised Orthography

Tho pa Yohana ma Jabaputisi

¹ I nindo maeno Herode ma jabim uwinjo pi Yesu,

² man ewacu ni jutic pare kumae, Meni Yohana ma Jabaputisi; ecer kud i kind ju m’utho; kum kumeno tego maeni betimbre i ie.

³ Kum Herode maku Yohana, etwie de, man ekethe i odkol pi Herodias, ma ci umin mire ma Filipo.

⁴ Kum Yohana wacu ire kumae, Cik uyio ngo iri ya ibed kude.

⁵ Man kan eyenyo enege, elworo udul dhanu, kum gikwane calu jabila.

⁶ Ento ka ceng’ ma yang’ junyolo ie Herode tundo, Nyaherodias umiel i kindgi, enyayu mutoro de i Herode.

⁷ Ketho eng’olo ku kwong’ ya ebimio ire gin ceke ma tek ebikwayu.

⁸ E en, ma min ucung’o lembe i ie, ewacu kumae, Mi ira wi Yohana ma Jabaputisi kuni i atangala.

⁹ E can umaku ubimo; ento kum kwong’ m’ekwong’o, kum ju ma gibedo dhu cam gikugi de, eng’olo nia jumie;

¹⁰ man eoro jucijuthumo wi Yohana i odkol.

¹¹ Wiene jukelo i atangala, jumio de ni nyaku: en ke etere ba min.

¹² Julubne de gibino, giting’o avuje, giyike; gici giwacu ni Yesu.

Cam ni Dhanu Rubanga Abic

¹³ Nie ka Yesu winjo maeni, eai ku kakeca ku yei, ecidho cen ka ma ngele: e kan udul dhanu winjo lembene, giai ku i adhura gilubo toke ku tiendgi.

¹⁴ E eai woko, eneno udul dhanu de ma dit, man ngisi nege i kumgi, e ekeyo kum weg tho migi.

¹⁵ E kan uthieno wok julub gibino i bang’e, giwacu kumae, Kakeni ng’om ngele, nindo de daru kadhu: dong’ ilal udul dhanu, kara gicidh i pacu, ging’ieu cam igi.

¹⁶ Ento Yesu wacu igi kumae, Can cidho kamange negogi ngo; wumi igi cam.

¹⁷ Giwacu ire de kumae, Wabedo ku lungu kwen abic kende kakeni, ku rec ario.

¹⁸ Man ewacu kumae, Kelgi kuni i bang’a.

¹⁹ E eng’olo ya udul dhanu gibed piny wi lum; man egamu lungu kwen abic, ku rec ario, eng’ayu wang’e de malu i polo, emio mugisa man eng’weko emio lungu kwen de ba julub, julub ke ni udul dhanu.

²⁰ E kagi ceke gicamu, giyeng’ de: man gicoko dong’ kwen m’ang’weka, upong’o katoko apar wi ario.

²¹ Man dhanu ma gicamu jumaco gi ve rubanga abic, ku mon man nyithindho bende.

Yesu Wotho ku Wi Nam

²² E aruca ruca ecwalu julub ya giidh i yei, gici de lokaca i wang’e, kan edong’ elalu udul dhanu.

²³ Ku yo ng’ei lalu udul dhanu, eidho wi got ka nge nirwo: e ka piny udoko uthieno, ebedo kakeca e kende.

²⁴ Ento yei re wok i die nam, m’ebesendre ku mukura; kum yamu ai yor i wang’gi.

²⁵ I kur mir ang’wende mi diewor ebino i bang’gi, m’ebewotho ku wi nam.

²⁶ Man ka julub ginene m’ebewotho ku wi nam, cwinygi ng’abre, giwacu kumae, En e tipo; man gikok akoka ni lworo.

²⁷ Ento aruca ruca Yesu weco i bang’gi, ewacu kumae, Cwinywu bed tek; meni an; lworo kud unegwu.

²⁸ E Petro loko lembe ire ewacu kumae, Rwoth, tek en e in, wac ira abin i beng’i ku wi pi.

²⁹ Man ewacu kumae, Bin. E Petro gam uloro piny kud i yei, man ewotho ku wi pi ebino ko ba Yesu.

³⁰ Ento kan eneno yamu, lworo make; e kan emaku mwony ekok, ewacu kumae, Rwoth, lara do.

³¹ E ndhu ndhu Yesu rieyo cinge, man emake, ewacu ire kumae, E in ma yioyic peri nok, cwinyi bedo jiji nedi?

³² E ka giidho malu i yei, yamu cungo.

³³ Man ju ma gini i yei girwo ire, giwacu kumae, In i Wod Mungu andha.

Yesu Keyo Kum Weg Tho i Genesareti

³⁴ E ka gikadhu lokaca, gitundo dhu wath, ba Genesareti.

³⁵ E ka dhanu ma kakeca ging’eye, gioro lembe i ng’om maeni ceke mba mba, man gikelo dhanu ma weg tho ndri i bang’e;

³⁶ man gikwaye ya gimul dhu kendi pare kende ci: e dhanu ceke m’umulo kumgi kei.