Matayo 11 - The Holy Bible In Alur (Lur) Revised Orthography

Jukwenda M’uai ba Yohana ma Jabaputisi

¹ Etimbre de ka Yesu daru ciko julubne apar wi ario, eai kakeca kara eci ponji eyer lembanyong’a de i adhura migi.

² Nwang’u ka Yohana winjo pi tic pa Kristu kud i odkol, eciko lembe dhu julubne

³ man ewacu ire kumae, In i ng’atu m’ubebino, kadi wakur ng’atu mange?

⁴ Man Yesu loko lembe ewacu igi kumae, Wuci yer ni Yohana pi gin ma wuwinjo ku ma wuneno de:

⁵ ju ma abinga maku nenopiny, weg abala bende gibewotho, weg joi de kumgi lony, ju ma ithgi dhing’ bende giwinjo, ju m’utho ndhu de gicer, jucan bende jubeyero igi lembanyong’a ma juboth ko.

⁶ Man ng’atu ma tek binwang’u gin moko mbe i ia m’uketho ekier, mugisa ire.

⁷ Man ka joni gicidho migi, Yesu maku penjo udul dhanu pi Yohana kumae, Wucidho woko i yamba nineno ang’o? undodi acel m’uyengre ku yamu?

⁸ Ento wucidho woko nineno ang’o? ng’atu m’uronjre ku kendi ma yomi? Nen, ju m’ukendo kendi ma yom gini i udi mir ubimo.

⁹ Ento wucidho woko mir ang’o? nineno jabila pa Mungu’ Eyo, awacu iwu, man m’usagu jabila dit.

¹⁰ Maeni ng’atu, ma yang’ pire gore kumae, Nen, aoro jakwenda para i weng’i, Ma biyiko yo peri i weng’i.

¹¹ Andha awacu iwu kumae, Kud i kind dhanu ma mon unyolo ng’atu moko mbe m’uwok ma dit ma sagu Yohana ma Jabaputisi: ento ng’atu ma en e nok i ker m’i polo e ma dit ma sage.

¹² Ugambre i ceng’ pa Yohana ma Jabaputisi cil ku kawono de ker m’i polo rombo ku tego, dhanu ma jukero de gigame ku kero.

¹³ Kum jubila ceke ku cik de giewo cil kum Yohana.

¹⁴ Man tek wuyio wujol maeni, maeni en e Elia, ma bibino.

¹⁵ Ng’atu m’ubedo ku ithe m’ewinjo ko, wek ewinji.

¹⁶ Ento abiporo dhanum’utuk maeni kud ang’o’ Epore ku nyithindho m’ubedo i katali, m’ulwong’o juwadi,

¹⁷ m’uwacu kumae, Wakudho ungbalu iwu, wumiel de ngo; wawero wejawu, e can unegowu de ngo.

¹⁸ Kum Yohana bino ku camu cemo ngo kadi ku madhu de ngo, man giwacu kumae, En e won pajogi.

¹⁹ Wod dhanu bino ku camu ku madhu bende, e giwacu kumae, Nen, ng’atu ma jambo kud andrej pigulok, jarimb weg ajok ku judubo de! E rieko doko pwe ni kum tic pare.

Can wi Adhura ma Gilokri Ngo

²⁰ Elund emaku dhau bang’ adhura ka ma tic pare ma tek utimbre i ie dit, kum giloko cwinygi ngo.

²¹ Can i wii, Korazin! can i wii, Bethsaida! kum tek wagi tic mi musana m’utimbre i iwu utimbre i Turo ku Sidon kuno di giloko cwinygi con ku kendo usuba ku vuru.

²² Ento awacu iwu, nia pokolembe pa Turo ku Sidon bibedo ber ma sagu mu i ceng’ pokolembe.

²³ In de, Kapernaum, jubiyungi malu i polo’ ibicidho piny i Hadeya: kum tek tic ma tek m’utimbre ii utimbre i Sodom, kuno di enuti cil eni.

²⁴ Ento awacu iwu nia pokolembe mi ng’om Sodom bibedo yot ma sagu peri, i ceng’ pokolembe.

Bin i Bang’a man Iyom

²⁵ I nindo maeno Yesu loko lembe ewacu kumae, Afoi, E Vwa, Rwoth m’i polo ku ng’om, nia ipanu gin maeni ni jurieko ku jung’eilembe bende, inyuthogi de ni mukere:

²⁶ eyo, Vwa, kum kumeno enyayu mutoro i weng’i.

²⁷ Vwa mio ira gin ceke: ng’atu moko mbe de m’ung’eyo Wod, ndhu Wego re; kadok Wego de ng’atu moko mbe m’ung’eyo, ndhu Wod, man ng’atu ma tek Wod uyenyo enyuthe ire.

²⁸ Wubin i bang’a, kewu ceke ma wumulu ku tic ma ter ma pek unurowu, man abimio iwu yom.

²⁹ Wuting’ mberembere para i wiwu, wumak ponji de i bang’a; kum an a ming’ a mol de i adunde: e wubinwang’u yom i ng’eyong’ec mu.

³⁰ Kum mberembere para e yot, ter para de foka foka.