Marko 6 - The Holy Bible In Alur (Lur) Revised Orthography

Yung Umbe ni Yesu i Nazareti

¹ Man eai woko ku keca; ewok i ng’om ma thugi ma dhe; julubne de gilubo ng’eye.

² E ka ceng’ sabatu wok, emaku ponjo i kacokri: dupa ka giwinje igi wang’ lii, giwacu kumae, Ng’atuni nwang’u gin maeni kani? man, rieko ang’o ma jumio ni ng’atuni, ku tic ma tek ma kumeni m’ubetimbre ku cinge e?

³ Maeni jabodho mi bau ngo, ma wod Mariamu, umin mire ke Yakobo, ku Yose, man Yuda, ku Simon de? nyimin mire bende gini i bang’wa ngo? E gikier ni kume.

⁴ E Yesu wacu igi kumae, Jabila bedo umbe yung ungo ento i ng’om thugi ma dhe re, man i kind jupagi, kud i ot pare bende ma dhe.

⁵ Man tic ma mi tego copo timbre ire ngo keca, ento eketho cinge kum weg tho ma lam, man ekeyo kumgi.

⁶ E ie wang’ lii kum yioyic migi m’umbe. Man etieko pacu gbur ku ponji.

Yesu Oro Juapar wi Ario ku Ng’ol

⁷ E elwong’o juapar wi ario i bang’e, emaku orogi de ario ario; emio igi ng’ol de kum tipo m’ucido;

⁸ eng’olo igi de ya ku giting’ gin moko mi woth migi, ndhu uluth kende; kadok kwen, kadi akpo, kadok sente de i gbethe migi;

⁹ wara re ma giroi: man, ewacu ya ku gikend kanzu ario.

¹⁰ Man ewacu igi kumae, Ka ma tek wumondo i ie i ot, wubed keca ram wuai ko woko.

¹¹ Ka ma tek jujolowu i ie ngo, man giwinjowu ngo, ka wuai keca, wukir utur ma the tiendwu woko ni lembatuca igi.

¹² E giai, giyero ya dhanu gilok cwinygi.

¹³ Giwodho pajogi dupa, giwiro mo de kum dhanu dupa ma kumgi lith, gikeyo kumgi de.

Tho pa Yohana ma Jabaputisi

¹⁴ E ubimo Herode winjo pire; kum nyinge yik: e ewacu kumae, Yohana ma Jabaputisi cer ku kind ju m’utho, ka kumeno tego maeni betimbre i ie.

¹⁵ Ento jumange wacu kumae, En e Elia. Jumange wacu kumae, En e jabila calu acel ma kind jubila.

¹⁶ Ento Herode, kan ewinjo pire, ewacu kumae, Yohana, m’athumo wie, ecer.

¹⁷ Kum en e Herode eoro jucijumaku Yohana, jutwie de i odkol pi Herodia, ma ci umin mire ma Filipo: kum egome.

¹⁸ Kum Yohana wacu ni Herode kumae, Cik uyio ngo iri ya ibed ku ci umeru.

¹⁹ E Herodia kece, eyenyo enege; ento ecopo ngo;

²⁰ kum Herode lworo Yohana, kum eng’eyo nia en e ng’atu ma pwe, ma leng’ de, man egwoke cu. Kan ewinje de, ie pido dit; ewinje de ku mutoro.

²¹ E ka ceng’ m’ubedo ber ni Herode wok, en e ceng’ ma yang’ junyole i ie etedo cemo mir uthieno ni judongo pare, ku jego pare ma dongo, ku judongo m’i ng’om Galilaya de;

²² e ka nya Herodiane mondo emiel de, enyayu mutoro i Herode ku ju ma gibedo gikugi dhu cam de; e ubimo wacu ni nyaku kumae, Kwai gin ma tek iyenyo, e abimio iri.

²³ Man eyero ire ku kwong’ kumae, Gin ma tek ikwaya ko, abimie iri, kadok ng’et ker para.

²⁴ E ewok woko, ewacu ni min mire kumae, Akwai ang’o? Ewacu kumae, Wi Yohana ma Jabaputisi.

²⁵ E eni eni emondo tho bang’ ubimo, ekwayu, ewacu kumae, Ayenyo ya imi ira wi Yohana ma Jabaputisi kawono i atangla.

²⁶ E can unego ubimo dit apila; ento kum kwong’ pare, ku ju ma gibedo dhu cam de, eyenyo ngo ekwere.

²⁷ E sieu maeni ubimo oro asikari acel ma kind ju ma kuro kume, eng’olo de ya ecidh ekel wie: man ecidho ethumo wie i odkol,

²⁸ man ekelo wiene i atangla, emie de ni nyaku; nyaku ke mie ni min mire.

²⁹ E ka julubne giwinjo pire, gibino giting’o avuje, man gikethe i odliel.

Cam ni Dhanu Rubanga Abic

³⁰ E jukwenda gicokri karacelo ba Yesu: e giyero ire pi gin ceke ma gitimo, ku gin ceke ma giponjo de.

³¹ Man ewacu igi kumae, Wun giwu wubin cen ka ma ngele, wuyom tundu. Kum dupa gicikubino gicidho de, e kinde moko mbe igi kadok ma gicam ie cam de.

³² E giai ku combo gicidho i ka ma ngele kakendgi.

³³ Dhanu de neno gibecidho, dupa de ging’eyogi, man giringo karacelo kuca ku i adhura ku tiendgi, e gilar gitundo igi.

³⁴ Eai woko eneno udul dhanu ma dit de, e ngisi nege i kumgi, kum gibedo calu rombe ma jakwac migi mbe: man emaku ponjogi ku gin dupa.

³⁵ Kinde ma ceng’ uvoc, julubne gibino i bang’e, giwacu kumae, Kakeni bedo ng’om ngele, kawono ceng’ de voc;

³⁶ lalgi, kara gicidh i thim man i pacu gbe gbe, ging’ieu giracama moko igi gigi.

³⁷ Ento eloko lembe ewacu igi kumae, Wumi igi cam. Giwacu ire kumae, Waciwang’ieu igi kwen ku denarii dak ario, wami igi gicami’?

³⁸ Ewacu igi kumae, Lungu kwen adi ma ni i beng’wu? wuci wunen. Ka ging’eyo, giwacu kumae, Abic, ku rec ario.

³⁹ Eng’olo igi nia kagi ceke gibed piny wi lum ma numu ni ungu ungu.

⁴⁰ E gibedo piny ku thek, man dak, man pier abic.

⁴¹ Man eting’o lungu kwen abic ku rec ario de, e eneno malu i polo, emio mugisa, man eng’weko i kwen de; emio ni julub giketh i wang’gi; rec ario de epoko i kindgi ceke.

⁴² E kagi ceke gicamu, giyeng’ de.

⁴³ Gikwanyu kodine, upong’o katoko apar wi ario, ku mi rec bende.

⁴⁴ Ju ma gicamu lungu kwen gi jumaco rubanga abic.

Yesu Wotho ku wi Nam

⁴⁵ E aruca ruca nica ecwalu julubne giidho i combo, gicidho lokaca i wang’e Bethsaida, kinde ma en ebelalu udul dhanu woko.

⁴⁶ E kan ecikogi, eidho wi got nirwo.

⁴⁷ E ka piny udoko uthieno, combo wok i die nam, edong’ e kende i ng’om.

⁴⁸ Man kan eneno gibesendri ku kiewo, kum yamu beai yor i wang’gi, e ecidho i bang’gi ku diewor mi kur mir ang’wende, m’ebewotho ko ku wi pi; calu ebeyenyo kadhugi:

⁴⁹ ento gin, ka ginene m’ebewotho ku wi pi; giwacu nyo en e ulelu, e gikok akoka;

⁵⁰ kum kagi ceke ginene, e cwinygi ng’abre. Ento eni eni eweco i bang’gi, ewacu igi kumae, Cwinywu bed tek: meni an; lworo kud unegwu.

⁵¹ E eidho i bang’gi i combo; yamu de cungo: man igi wang’ lii yor i igi;

⁵² kum ging’eyo ngo pi lungu kwen, ento adundegi doko nwang’.

Yesu Keyo Kum Weg Tho i Genesareti

⁵³ E ka gikadhu lokaca, giwok dhu wath i ng’om Genesareti, man ginyiko dhu wath.

⁵⁴ E ka giai kud i combo, e ndhu ndhu nica dhanu ging’eye.

⁵⁵ E giringo i ng’ombuno ceke gbe gbe, gimaku yeyo dhanu ma kumgi lith ku kavuto migi, ka ma giwinjo eni i ie.

⁵⁶ Ka ma tek emondo i ie ceke, i pacu, kadi i adhura de, kadi i thim, gipielo ju ma kumgi lith i katali, man gikwaye ya gimul kadok dhu kendi pare ci: e ju m’umulo kume ceke kumgi kei kubang’gi kubang’gi.