Marko 4 - The Holy Bible In Alur (Lur) Revised Orthography

Lembabola pi Jacoi Kodhi

¹ Man emaku ponjo dhu nam kendo. Udul dhanu ma dit apila de gicokri i bang’e, ketho eidho i yei, man ebedo i pi; udul dhanu ceke bedo dhu pi i ng’om.

² E eponjogi ku lembe dupa m’abola, ewacu igi kumae, i ponji pare,

³ Wuwinji: Nen, jacoikodhi cidho nicoyo:

⁴ etimbre de, kan ecoyo, nia kodhi moko podho dhu yo, winyo de bino gicame.

⁵ Mange de podho i ng’om ma ie ju kidi, ka ma ng’om dit ungo i ie; e eni eni ecobo, kum dhu ng’om thuth ungo:

⁶ man ka ceng’ uidho, erewe; kum ulage mbe, ener woko.

⁷ Mange ke podho kind ukudho, ukudho dongo, e edeye, man ecego nyinge ngo.

⁸ Mange ke podho i ng’om ma ber, ecego nyinge de, edongo enyai de; man ecego nyinge, acel bang’ pier adek, man acel bang’ pier abusiel, man ke acel bang’ dak.

⁹ Man ewacu kumae, Ng’atu ma ithe nuti m’ewinjo ko, wek ewinji.

Gin M’uketho Eyero ku Lembabola

¹⁰ E kan ebedo kende, ju ma gibedo i vute ku juapar wi ario gipenje kum lembabolane.

¹¹ Man ewacu igi kumae, Giramung’a mi ker pa Mungu jumio iwu: ento ni ju ma gini woko, gin ceke timbre ku lembabola:

¹² kara anena gicopo neno, endre ging’ei ngo; awinja de gicopo winjo, endre ging’ei ngo; kara ku gilokri kendo, man ku juwek dubo migi woko.

Yesu Tuco The Lembabola pa Jacoi Kodhi

¹³ Ewacu igi kumae, Wung’eyo lembabola maeni ngo? wubing’eyo lembabola ceke nenedi?

¹⁴ Jacoikodhi coyo lembe.

¹⁵ Ju maeni gi ju ma gibedo dhu yo, ka ma jucoyo ie lembe; ka giwinjo de, e ndhu ndhu nica Jok ubino, ekabu lembe ma jucoyo i igi woko.

¹⁶ Ju maeni de kumeno gi ju ma jucoyo ka ma ie ju kidi, ma, ka giwinjo lembe, ndhu ndhu nica gijole ku mutoro;

¹⁷ e gibedo umbe ulaggi i igi gigi, ento gibedo nyangba; macen, ka masendi kadi ragedo wok kum lembe, e eni eni gikier.

¹⁸ Jumange ke gi ju ma jucoyogi kind ukudho; joni gi ju m’uwinjo lembe,

¹⁹ e pidoic mi giki mi ng’om, kud awondi mi lonyo, kud awanya ma rac mi gin mange m’umondo i igi, gideyo lembene, man ecego nyinge ngo.

²⁰ Ju maeni ke gi ju ma jucoyogi i ng’om ma ber; gi wagi ju m’uwinjo lembe, gijole de, man gicego nying’gi, acel bang’ pier adek, acel bang’ pier abusiel, acel bang’ dak.

Thala The Katoko

²¹ Man ewacu igi kumae, Jukelo thala y a juum the katoko, kadi the kavuto, ma jukukethe wi kathere ngo?

²² Kum gin moko mbe ma pandre, ento kara enyuthre, kadok ma mungre de, ento kara ewok ka ma leng’.

²³ Tek ng’atu moko ithe nuti m’ewinjo ko, wek ewinji.

²⁴ Ewacu igi kumae, Wubed ku weng’wu kum gin ma wuwinjo: ku mukero ma wuporo ko e ma jubiporo ko iwu bende: jubimedo iwu mange de.

²⁵ Kum ng’atu ma tek ubedo ko, jubimio ire: man ng’atu ma kubedo ko ngo re, jubikabu woko i bang’e cil maeno m’ebedo ko.

Lembabola pi Kodhi M’utwi

²⁶ Man ewacu kumae, Ker pa Mungu de bedo kumeno, calu tek ng’atu moko bolo kodhi i ng’om;

²⁷ man enindo eai de diewor ku dieceng’, e kodhi cobo etwi de, eng’eyo ngo maram etwi ko.

²⁸ Ng’om ucego nyinge gire; elar etwi, macen eng’ok, e kan ecego nyinge thur.

²⁹ Ento ka nyinge cek, e eni eni eketho pala i kume, kum palacam uwok.

Lembabola pi Nying Atingli

³⁰ Man ewacu kumae, Wabiporo ker pa Mungu kud ang’o? kadi wabinyuthe ku lembabola manedi?

³¹ E calu nying atingli, ma ka jucoyo i ng’om, kadok ebedo nok ma sagu kodhi ceke m’i ng’om,

³² ento ka jucoye, edongo de, man edoko dit ma sagu uboko ceke, elodho jange ma dit de; ketho nia winyo ma kor polo gicopo bedo the tipone.

Yesu Ponjo Ru ku Lembabola

³³ Eyero lembe igi ku wagi lembabola ma kumeni dupa, calu ma winjre igi;

³⁴ man eyero igi ngo ma ku lembabola ngo: ento ni julubne ekoro igi there ceke nyalwe.

Yesu Juko Wavuvu

³⁵ Ceng’ nica, ka piny udoko uthieno, ewacu igi kumae, Wakedhu lokaca.

³⁶ E giweko udul dhanu, gicidho kugi ku rambe nica i combo. Nwang’u combo mange de ni i bang’e.

³⁷ E wavuvu ma dit utuk, mukura de maku core i combo, ketho ya combo maku pong’.

³⁸ En ebedo yo the combo, enindo de wi usau: e gicewe, giwacu ire kumae, Japonji, en e lem moko ngo iri ya warwinyi?

³⁹ E eceu, ejuko yamu, ewacu de ni nam kumae, Cungi, bed ling’. E yamu cungo, piny de cungo ti.

⁴⁰ Ewacu igi kumae, Lworo negowu nedi? fodi yioyic umbe kudu?

⁴¹ E lworo negogi dit apila, man giwacu gigi kumae, Ka kumeno ng’atuni ng’a, ma cil yamu ku nam de giwore e?