Marko 3 - The Holy Bible In Alur (Lur) Revised Orthography

Ng’atu ma Cinge Lindre

¹ Man emondo kendo i kacokri: e ng’atu moko ni keca ma cinge lindre.

² E gikie, tek ebicange i ceng’ sabatu: kara gidote.

³ Man ewacu ni ng’atu ma cinge lindre kumae, Cung i diere.

⁴ Ewacu ni joca kumae, Cik uyio i ceng’ sabatu ya jutim beri, kadi raci? bodho kwo, kadi nego? Ento giling’.

⁵ E kan eng’iogi gbe ma ng’ecwiny unege, ma can de nege kum adundegi m’udoko nwang’, ewacu ni ng’atuno kumae, Riei cingi. E erieye; man cinge dok kakare.

⁶ Jufarisayo de giwok woko, man aringa ringa nica gimaku poro lembe giku Juherodiano i kume, rama gicopo nyothe ko.

Udul Dhanu Ditu Nam

⁷ E Yesu giku julubne giai gicidho dhu nam: man udul dhanu ma dit giai i Galilaya gilubo ng’eye; ku i Yahudi de,

⁸ ku i Yerusalem de, man ku i Idumaya, ku ma loka Yordan, ku ma ng’et Turo ku Sidon de, udul dhanu ma dit ma giwinjo gin ma dit m’etimo, gibino i bang’e.

⁹ Man eyero ni julubne, nia nyatbi yei ubed ayika ire ni njuru dhanu, kara ku gidie:

¹⁰ kum ekeyo kum dhanu dupa; ketho dhanu ceke ma gi weg tho gicungri i kume kara gimul kume.

¹¹ Tipo m’ucido de, ka ginene, gipodho piny i wang’e, gikok akoka, giwacu kumae, In i Wod Mungu.

¹² Man eng’olo igi ma tek ya ku giketh jung’eye.

Yesu Caku Jukwenda Apar wi Ario

¹³ Man eidho malu wi got, e elwong’o ju ma ie yenyo en i bang’e; e gicidho i bang’e.

¹⁴ Eketho juapar wi ario de kara gibed gikugi, kara eorgi gicigiyer,

¹⁵ man gibed ku ng’ol ma giwodh ko pajogi:

¹⁶ Simon ecaku nyinge Petro;

¹⁷ Yakobo ma wod Zebedayo, ku Yohana m’umin Yakobo; e ecaku nying’ joni Boanerge, thelembene kumae, Wot morpolo:

¹⁸ man ke Andrea, ku Filipo, ku Bartolomayo, man Matayo, man Thoma, man Yakobo, wod Alfayo, man Thadayo, ku Simon ma Jakanani.

¹⁹ Man Yuda Iskariote, m’ucibe bende. Man emondo i ot.

Yesu ku Beelzebul

²⁰ E udul dhanu gicokri karacelo kendo, ketho nia kadok kwen de gicopo camu ngo.

²¹ Ka jurimbe giwinjo maeni, giwok gicimake: kum giwacu kumae, Abelu make.

²² E jugorcik ma giai Yerusalem giloro piny giwacu kumae, Wie ju Beelzebul, man ke kumae, Ebewodho pajogi ni kum jadit mi pajogi.

²³ Man elwong’ogi i bang’e, ewacu igi ku lembabola kumae, Jok copo wodho Jok nenedi?

²⁴ Man tek ker upokre i kume gire, kerne copo cungo ngo.

²⁵ Man tek ot upokre i kume gire, ode bicopo cungo ngo.

²⁶ Man tek Jok uai i kume gire, epokre de, ecopo cungo ngo, ento ejik.

²⁷ Ento ng’atu moko copo mondo ngo i ot pa ng’atu ma tek, enyoth piny pare de, ma k’elar etwio ng’atu ma tek ungo; kan ebilund nyotho ot pare.

²⁸ Andha awacu iwu kumae, Dubo mi wot dhanu ceke, jubiweko woko igi, man lembacidi migi ma gicido ko Mungu de:

²⁹ ento ng’atu ma tek biyero lembacidi kum Tipo Maleng’ dubo pare jubiweko woko ire ki ngo, ento dubo ma rondo ku rondo ni i wie:

³⁰ kum giwacu kumae, E won tipo m’ucido.

Min ku Utumin Yesu

³¹ E min mire ku utumin de gibino; man gicungo woko, gioro lembe i bang’e, ma guwong’e ko.

³² Udul dhanu de gibedo gitieke; giwacu ire kumae, Nen, meru ku utumeru gini woko giyenyi.

³³ E eloko lembe igi ewacu kumae, Ma ku utumira de gi ng’agi?

³⁴ Kan eng’io ju ma gibedo gikugi, ewacu kumae, Nen, ma ku utumira de!

³⁵ Kum ng’atu ma tek bitimo yeny ma i Mungu yenyo, ng’atuca en e umira, ku nyamira, ku ma de.