Marko 2 - The Holy Bible In Alur (Lur) Revised Orthography

Yesu Keyo Kum Won Tho ma Nego Kum Nding’

¹ Yo ng’ei ceng’ moko kan emondo i Kapernaum kendo, juwinjo nia eni i ot.

² Dupa gicokri karacelo, ketho kabedo mbe igi kendo cil dhugola de mbe: man eyero igi lembe.

³ E gibino, ma gikelo ng’atu ma won tho ma nego kum nding’ i bang’e, ma juang’wen giyeye.

⁴ E ka gicopo tundo ceng’ni i bang’e ngo ni njuru dhanu, e giyeco wi ot kpa ka wie: ka giyeco, giluro ng’atu ma won tho ma nego kum nding’ ku kavuto m’evuto i wie.

⁵ Ka Yesu neno yioyic migi ewacu ni won tho ma nego kum nding’ kumae, Wodo, dubo peri juweko woko.

⁶ Ento jumoko ma kind jugorcik nuti ma gibedo keca, ma giporo lembe i adundegi kumae,

⁷ Ng’atuni weco kumeno nedi? eyero lembacidi kum Mungu: ng’a ma copo weko dubo woko ndhu ng’atu acel, en e Mungu?

⁸ E eni eni Yesu, m’eng’eyo i cwinye nia giporo lembe i igi gigi, ewacu igi kumae, Wuporo lembe maeni i adundewu nedi?

⁹ Makani ma yot ma sagu, wacu ni won tho ma nego kum nding’ kumae, Dubo peri juweko woko; kadi wacu kumae, Ai malu, ting’ kavuto peri iwothi?

¹⁰ Ento kara wung’ei nia Wod dhanu bedo ku ng’ol wi ng’om mi wekodubo woko (ewacu ni won tho ma nego kum nding’ kumae),

¹¹ Awacu iri kumae, Ai malu ting’ kavuto peri, icidh i ot peri.

¹² Man eai malu, eting’o kavuto tho, e ewok woko i wang’gi ceke; ketho kagi ceke igi wang’ lii, man giyungo Mungu, giwacu kumae, Naka fodi waneno wagi eni ki ngo.

Lwong’o pa Lawi

¹³ E ecidho kendo dhu nam; udul dhanu ceke gicidho i bang’e de, e eponjogi.

¹⁴ Kinde m’ebekadhu, eneno Lawi ma wod Alfayo m’ubedo ka ma jujoko ie ajok, man ewacu ire kumae, Lub ng’eya. E eai malu elubo ng’eye.

¹⁵ E etimbre, nia ebedo dhu cam i ot pare man weg ajok ku judubo dupa gibedo piny giku Yesugi man julubne: kum gi dupa, man gilubo ng’eye.

¹⁶ Jugorcik mi Jufarisayo ka gineno nia gibecamu ku judubo ku weg ajok de, giwacu ni julubne kumae, Nedi ecamu emadhu de ku weg ajok ku judubo de?

¹⁷ Ka Yesu winjo maeni, ewacu igi kumae, Ju ma kumgi leng’ can jakeikum negogi ngo, ento ju ma kumgi lith re: abino Lwong’o weg bedopwe ngo, ento judubo re.

Penji pi Kwiro Cam

¹⁸ Julub Yohana ku Jufarisayo de gibekwiro cam: e gibino giwacu ire kumae, Julub Yohana ku julub Jufarisayo gikwiro cam nedi, ka julubni ke gikwiro cam ungo e?

¹⁹ Yesu wacu igi kumae, Wot won ambadha gicopo kwiro cam, ma fodi won ambadha ginuti gikugi? ma fodi ginuti giku won ambadhagi, gicopo kwiro cam ungo.

²⁰ Ento ceng’ bibino, ma jubikabu ie won ambadha woko kud i bang’gi, e gibilund kwiro cam i ceng’ maeno.

²¹ Ng’atu moko mbe ma kwoyo wang’ kendi m’uti ku kurembo ma nyen: kara kurembo bongu ma nyen nica ma juthube ko kud elund eyec m’uti, edwoke rac ma sagu.

²² Ng’atu moko mbe de ma piko pigulok ma nyasa i usaupigulok m’uti; kara pigulok kud ung’eny usaupigulok, pigulok de kud uoi, usaupigulok kud unyothre: ento pigulok ma nyasa jupiko i usaupigulok ma nyen.

Julub Ujaku Jang Cam Ceng’ Sabatu

²³ Man etimbre, nia ebekadhu ku kind podhocam i ceng’ sabatu; e julubne, ka gibecidho, gimaku jaku jang cam.

²⁴ Jufarisayo giwacu ire kumae, Nen, nedi gitimo maeno ma cik uyio ngo ceng’ sabatu?

²⁵ Man ewacu igi kumae, Fodi wusomo ngo gin ma Daudi timo, ka canpiny unege, ku kec de, en, ku ju ma ginuti gikugi de?

²⁶ Maram emondo ko i ot pa Mungu kende ma Abiathar en e jalam ma dit, ecamu kwen mir anyutha, ma cik uyio ngo ya jucam ndhu ni julam, man emio de ni ju ma ginuti gikugi?

²⁷ Man ewacu igi kumae, Jutimo ceng’ sabatu ni dhanu, jutimo dhanu ngo ni ceng’sabatu:

²⁸ kum kumeno Wod dhanu en e rwoth cil mi ceng’ sabatu.