Marko 16 - The Holy Bible In Alur (Lur) Revised Orthography

Cer pa Yesu

¹ E ka ceng’ sabatu kadhu, Mariamu Magdalene, giku Mariamu ma min Yakobo, man Salome, ging’iewo udok ma ng’wice ng’ar, kara gibin giwire ko.

² E pir kugweno i ceng’ ma kwong’a ma yenga, gibino ba liel ma juroko i cana ka ceng’ uwok.

³ Man giwecri i kindgi kumae, Ng’a ma bing’ielo iwa kidi ku dhugola mi liel ma juroko i cana?

⁴ Man giting’o wang’gi, gineno nia kidi ng’iele cen: kum e dit apila.

⁵ E ka gimondo i liel ma juroko i cana, gineno jalawobi acel ubedo yo ku cing’ ma yor acwic, m’eronyo kendi ma tar; e igi wang’ lii.

⁶ Man ewacu igi kumae, Iwu kud uwang’ lii; wuyenyo Yesu, ma Janazareti, ma jugure: ecer, embe keni: nen ka ma jukethe i ie!

⁷ Ento wucidhi, wuyer ni julubne ku Petro de kumae, Ecidho i weng’wu i Galilaya: wubinene kuca, calu eyero iwu.

⁸ E giwok woko kud i liel ma juroko i cana, giringo: kum mielkum ku wang’uic umakugi: e giyero lembe moko ngo ni ng’atu moko; kum lworo negogi.

Yesu Nyuthre ni Mariamu Magdalene

⁹ Nie kan ecer pir kugweno i ceng’ ma kwong’a ma yenga elar enyuthre ni Mariamu Magdalene, ma yang’ ewodho pajogi abiro i ie.

¹⁰ En de ecidho eyero ni ju ma naka gibedo gikugi, kinde ma can ubenegogi giywak de.

¹¹ E gin de, ka giwinjo nia ebedo kwo, enen ire de, giyio ngo.

Yesu Nyuthre ni Julub Ario

¹² Yo ng’ei gin maeni enyuthre ni juario ku kite ma tung’, ka gibewotho, i yo migi i thim.

¹³ E gicidho giyero ni ju m’udong’: joca de giyio igi ngo.

Yesu Oro Juapar wi Acel

¹⁴ Macen enyuthre ni juapar wi acel ka gibedo dhu cam; man edhau i wigi kum yioyic migi m’umbe kum nwang’ mir adundegi de, kum giyio ngo ni ju m’unene yo ng’ei cer pare.

¹⁵ Man ewacu igi kumae, Wucidh i ng’om yu, wuyer lembanyong’a ma juboth ko ni giracwia ceke.

¹⁶ E ng’atu m’uyio m’umaku baputisi de ebiboth; ento ng’atu m’uyio ngo jubipoko lembe pare rac.

¹⁷ Giranyutha maeni bilubo ju m’uyio: ku nyinga gibiwodho pajogi; gibiweco ku dhok ma nyen;

¹⁸ gibiting’o thwol, man tek gimadhu gin moko ma negojo, ebitimogi rac ki ngo; gibiketho cing’gi kum ju ma kumgi lith, c kumgi bikei.

Yesu Dok i Polo

¹⁹ Ka kumeno Rwoth Yesu, kan edaru yero igi, jujole malu i polo, ejany de yo ku cing’ Mungu ma yor acwic.

²⁰ E gicidho, giyero i kaka ceke, Rwoth utimo kugi, eketho tego kum lembene ku giranyutha m’ulube. Amen.