Marko 15 - The Holy Bible In Alur (Lur) Revised Orthography

Yesu i Wang’ Pilato

¹ E pio pio kugweno julam ma dongo ku judongo man jugorcik, ku dilo ceke, gipido lembe, man gitwio Yesu, gitere, gimie ni Pilato.

² E Pilato penje kumae, In i Ubimo mi Juyahudi? Man eloko lembe ewacu ire kumae, Iwacu.

³ Man julam ma dongo gidote kum gin dupa.

⁴ E Pilato penje kendo, ewacu kumae, Idwoko lembe moko ngo? nen maram gibedoti ko ku gin dupa.

⁵ Ento Yesu dwoko lembe moko kendo ngo; ketho i Pilato wang’ lii.

Jung’olo Tho wi Yesu

⁶ Nwang’u naka ebedegonyo igi jakol acel, ma gikwayu i bang’e i agba.

⁷ Nwang’u ng’atu acel nuti ma nyinge Baraba, m’evuto atwia ku ju m’uthubo ali, gi ju ma i aline ginego nek.

⁸ E udul dhanu gicidho malu man gimaku kwaye ya etim calu ma naka ebedetimo igi.

⁹ E Pilato dwoko lembe igi, ewacu kumae, Wuyenyo agony iwu Ubimo mi Juyahudi?

¹⁰ Kum eng’eyo nia kumira e m’uketho julam ma dongo gimie.

¹¹ Ento julam ma dongo gicuno lembe i udul dhanu, ya maku egony Baraba igi.

¹² Pilato loko lembe kendo ewacu igi kumae, Ka kumeno abitimo ang’o kum ng’atu ma wulwong’o Ubimo mi Juyahudi?

¹³ Gikok kendo kumae, Gure.

¹⁴ E Pilato wacu igi kumae, Nedi, etimo ang’o ma raci? Ento gikok apila kumae, Gure.

¹⁵ Man Pilato, m’eyenyo lembe cung ber i udul dhanu, egonyo igi Baraba, emio Yesu de, kan edara fode ku del, ya jugure.

Asikari Cayu Yesu

¹⁶ E asikari gipeye woko i katitlembe, ma en e Odtiti; e gilwong’o udul juwagi ceke karacelo.

¹⁷ Man gironye ku bongu m’uluga, gikiedo jamkermiwic mir ukudho de, gikethe i wie;

¹⁸ e gimaku mothe kumae, Moth iri, Ubimo mi Juyahudi!

¹⁹ E gigoyo wie kud undodi, ging’ulo lau i kume, girum wi cong’gi de girwo ire.

²⁰ E ka gidaru ng’ale, giwodho kendi m’uluga, man gironye ku kendi pare. E gipeye woko, gicigigure.

Maram Juguro Ko Yesu wi Yen M’athara

²¹ Man gicung’o ng’atu acel m’ubekadhu akadha, Simon ma Jakurene, m’uai i thim, m’e won Iskander giku Rufo, ya gici gikugi, kara eyei yen m’athara pare.

²² E gikele ka ma julwong’o Golgotha, ma ka juloke edoko kumae, Karupokowic.

²³ E gimio ire pigulok m’ujebre ku yath: ento egame ngo.

²⁴ Man gigure, gipoko kendi pare i kindgi, gigoye ku jara, kara ginwang’ ju ma bigame.

²⁵ E kinde ma saa doko adek, gigure.

²⁶ E karamblembe mir ado te pare jugoro yo malu kumae, UBIMO MI JUYAHUDI.

²⁷ Man jugure karacelo ku weg ayeki ario; acel i cinge ma yor acwic, acel ke yor acam.

²⁸ Man lembagora pa Mungu timbre kakare, m’uwacu kumae, Man jukwane karacelo ku judubo.

²⁹ Ju ma gibecikukadhu de gicaye, giyengo wigi de, giwacu kumae, Euo! in m’inyotho hekalu, m’igome de ceng’ adek,

³⁰ leri giri, ilor piny de ku wi yen m’athara.

³¹ Julam ma dongo de gicaye kumeca i kindgi gigi ku jugorcik, giwacu kumae, Elaru jumange; ecopo lare gire ngo.

³² Wek Kristu m’Ubimo pa Israel, ulor piny ku kor yen m’athara kawono, kara wanen wayi de. Ju ma jugurogi gikugi de gicaye.

Tho pa Yesu

³³ E kinde ma saa mir abusiende wok, mudho yutho ng’om ceke cil i saa mir abung’wende.

³⁴ E kinde ma saa doko abung’wen Yesu kok ku dwande ma dit kumae, Eloi, Eloi, lama sabakthani? ma, ka juloke edoko kumae, Munguna, Munguna, ikuna nedi?

³⁵ Jumoko ma gicungo i vute, ka giwinjo maeni, giwacu kumae, Nen, elwong’o Elia.

³⁶ E ng’atu acel uringo, epong’o ucoi pong’ ku picwa, ekethe de wi undodi, man emio ire emadhi, ewacu kumae, Wukowuweki; wanenu tek Elia bino wodhe piny.

³⁷ E Yesu kok ku dwande ma dit, man eweko cwinye kadhu.

³⁸ E kusika mi bongu m’i hekalu yec dra doko ario ugambre i wie cik i there.

³⁹ E ka jego, m’ucungo keca i vute, uneno nia eweko cwinye kadhu kumeca, ewacu kumae, Andha ng’atuni en e Wod Mungu.

⁴⁰ Nwang’u mon moko de nuti keca ma gibenene ku cen: Mariamu Magdalene, giku Mariamu ma min Yakobo ma nok ku Yose de, man Salome de gini i kindgi;

⁴¹ ma, kinde m’eni i Galilaya, gilubo ng’eye, gibegitimo ire bende; ku mon mange de dupa ma gibino kugi malu Yerusalem.

Kuny pa Yesu

⁴² E ka piny udoko uthieno, kum en e Yikopiny, en e kumeni, ceng’ m’ular uwok ni ceng’ sabatu,

⁴³ e Yusuf ma Arimathaya, en e ng’atu m’i dilo ma won yung, ma en bende ebekuro ker pa Mungu; emondo ba Pilato ku tegocwinye, man ekwayu avuj Yesu.

⁴⁴ E Pilato ie wang’ lii tek edaru tho: man elwong’o jego i bang’e epenje tek etho ande con.

⁴⁵ E kan eng’eyo maeni ba jego eyio avuje ni Yusuf.

⁴⁶ Man eng’iewo bongu ma nwang’, man efudhe piny, eboye ku bongu ma nwang’ne, man ekethe i liel ma juroko i cana; man eng’ielo kidi kum dhugola mi liel ma juroko i cana.

⁴⁷ E Mariamu Magdalene giku Mariamu ma min Yose gineno ka ma jukethe i ie.