Marko 14 - The Holy Bible In Alur (Lur) Revised Orthography

Jutelwic Uporo Lembe kum Yesu

¹ Nie yo ng’ei ceng’ ario agba mi kadhukuwijo man kwen ma thobi mbe i ie wok: e julam ma dongo ku jugorcik giyenyo maram gimake ko ku rieko, ginege de:

² kum giwacu kumae, I ceng’ mir agba ngo, rop umaru nyai i kind dhanu.

Dhaku Moko Ukonjo Mo wi Yesu i Bethania

³ E kan eni i Bethania i ot pa Simon ma won joi, kinde m’ebedo dhu cam, dhaku moko bino ma won cupa ma ber ma ie ju mo ma ng’wice ng’ar ma ng’ieune tek dit; enego cupane, ekonjo moje de i wie.

⁴ Ento jumoko nuti ma ging’ur i kindgi gigi, giwacu kumae, Junyotho mo maeni nedi?

⁵ Kum mo maeni jucopo loko ku denarii ma sagu dakadek, jumio de ni jucan. E ging’ur i kume.

⁶ Ento Yesu wacu kumae, Wuweke; wunyayu can i ie nedi? etimo tic ma dre i kuma.

⁷ Kum wubedo ku jucan thiri thiri i beng’wu, man ka wuyenyo wucopo timo ber i bang’gi: ento an wabedo wakudu thiri thiri ngo.

⁸ Etimo gin m’ecopo: elar ewiro mo i kuma mi kuny.

⁹ Andha awacu iwu kumae, Ka ceke ma tek jubiyero ie lembanyong’a ma juboth ko i ng’om ngung’, maeno bende ma dhaku maeni timo biyere ni poi pare.

Yuda Yio Nicibo Yesu

¹⁰ Yuda Iskariote, en e ng’atu acel ma kind juapar wi ario, ecidho ba julam ma dongo, kara ecibe igi.

¹¹ E ka giwinjo maeni, anyong’a negogi, man ging’olo ya gibimio ire sente. Man eyenyo maram ecopo cibe ko igi lwe.

Yesu Camu Kadhukuwijo ku Julubne

¹² I ceng’ ma kwong’ane mi kwen ma thobi mbe i ie, kinde ma gilamu kadhukuwijo, julubne giwacu ire kumae, Iyenyo waci wayik ka m’ibicamu ie kadhukuwijo kani?

¹³ Man eoro julubne ario, ewacu igi kumae, Wuci i adhura, e wubirombo ku ng’atu acel m’uyeyo agulu pi: wulub ng’eye;

¹⁴ ka ma tek ebimondo i ie, wuyer ni won ode kumae, Japonji wacu kumae, Kusika mi welo ma ira, m’abicamu ie kadhukuwijo ku julubna, nikani?

¹⁵ E en ebinyutho iwu kusika ma malu m’ulwar m’ubedo ku gin ceke i ie, ayika de: wuyik iwa kakeca.

¹⁶ E julubne gicidho, giwok i adhurane, e ginwang’u calu ewacu igi: man giyiko kadhukuwijo.

¹⁷ E ka piny udoko uthieno ebino ku juapar wi ario.

¹⁸ E kinde ma gibedo gibecamu, Yesu wacu kumae, Ayero iwu andha, Acel m’i kindwu biciba, cil ng’atu ma wacamu wakude.

¹⁹ E can umaku negogi, man giwacu ire acel acel, En e ani?

²⁰ Ewacu igi kumae. En e ng’atu acel m’i kind juapar wi ario, ma wagwio bwa wakude i tabu.

²¹ Kum Wod dhanu bicidho, cil calu ma pire gore: ento can ni ng’atu maeno ma Wod dhanu cibre ni kume! ber ni ng’atuca tek jukunyole ngo.

Thekri mi Cemo pa Rwoth

²² Man kinde ma gibecamu, eting’o kwen, e kan emio mugisa, eng’weko ie, emio igi de, ewacu kumae, Wugam: maeni kuma.

²³ Man eting’o kikombe, e kan emio foc, emio igi: kagi ceke gimadhu kume moko.

²⁴ Man ewacu igi kumae, Maeni rimba mi lembariba, m’uthwogre pi dhanu dupa.

²⁵ Andha ayero iwu kumae, Abimadhu kum pigulok kendo ngo, cil i ceng’ m’abimadhe ie nyen i ker pa Mungu.

²⁶ E ka giwero wer, gicidho ba got Zeituni.

Yesu Nyutho Maram Petro Bikwere Ko

²⁷ E Yesu wacu igi kumae, Kewu ceke wubikier: kum egore kumae, Abigoyo jakwac, rombe de bilal mba.

²⁸ Ento, yo ng’ei cer para, abicidho i weng’wu i Galilaya.

²⁹ Ento Petro wacu ire kumae, Kadok ceke bikier, an re abikier ungo.

³⁰ Yesu wacu ire kumae, Andha awacu iri, nia in tinuni, i diewor maeni, ka fodi kulok kukok wang’ ario ngo, ibikwera wang’ adek.

³¹ Ento eyero ma tek apila kumae, Kadok akotho be wakudi ngi, abikweri ngo. Kagi ceke de giwacu kumeno.

Yesu Rwo i Gethsemane

³² E gibino i ka ma nyinge Gethsemane: ewacu de ni julubne kumae, Wubed keni, ma fodi acirwo.

³³ E ecoko Petro giku Yakobo man Yohana gicidho de gikugi, e ie maku wang’ lii, cwinye de ng’abre mumbe.

³⁴ Man ewacu igi kumae, Can ubenego ng’eyong’ec para dit apila ceng’ni tho: wudong’ keni, wuki.

³⁵ Man ecidho nyangba yor i wang’gi, epodho de i ng’om, man erwo nia, tek ecopre, saa maeni kabre woko ire.

³⁶ Ewacu kumae, Abba, Vwa, gin ceke copre iri; kab kikombe maeni woko i bang’a: ento yeny ma ia yenyo re ngo, endre yeny ma ii yenyo.

³⁷ Man ebino, enwang’u ginindo, man ewacu ni Petro kumae, Simon, inindo? icopo kio ngo saa aceli?

³⁸ Wuki wurwo de, kara kud wumond i abidhe: cwiny uyenyo andha, ento kum ubedo ng’ic.

³⁹ E ecidho kendo, man erwo, eyero lembe ma cal acel.

⁴⁰ Man ebino kendo, enwang’u ginindo, kum wang’gi bedo pek; e ging’eyo ngo maram gilok ko lembe ire.

⁴¹ Man ebino kendo mir adege, ewacu igi kumae, Kawono dong’ wunindi, wuyom de: eromo; saa tundo; nen, Wod dhanu jucibe i cing’ judubo.

⁴² Wuai, wacidhu: nen, ng’atu m’uciba eni ceng’ni.

Jucibo Yesu man Jumake

⁴³ E ndhu ndhu nica, kinde m’ebeyero, Yuda bino, en e ng’atu acel ma kind juapar wi ario, kud udul dhanu ma weg palamularu ku dul, ma giai ba julam ma dongo ku jugorcik ku judongo de.

⁴⁴ Nwang’u ng’atu m’ucibe emio igi riekolembe, ewacu kumae, Ng’atu ma tek abicwio limbe, nwang’u en e en; wumake, wuci kude rut.

⁴⁵ E kan ewok, ndhu ndhu nica ebino i bang’e, ewacu kumae, Japonji; man ecwio limbe.

⁴⁶ E giketho cing’gi i kume, gimake ko.

⁴⁷ Ento ng’atu acel ma kind ju m’ucungo keca ewodho palamularu pare, egoyo jamiru pa jalam ma dit, man etong’o ithe woko.

⁴⁸ Man Yesu loko lembe ewacu igi kumae, Wubino, calu wubino kum jayek, ku palamularu ku dul de kara wumaka?

⁴⁹ Abedaponjo ma wabedo wakudu i hekalu ku ba rupiny ku ba rupiny, wumaka de ngo: ento maeni timbre kara lembagora pa Mungu timbre kakare.

⁵⁰ E kagi ceke giweke, giringo.

Jalawobi M’upiei

⁵¹ Jalawobi moko lubo toke, m’ebedo ku bongu ma nwang’ ma jubolo i kume, wi kume m’ubedo muneru: e gimake;

⁵² ento eweko bongu ma nwang’, man epiei muneru.

Yesu i Wang’ Dilo

⁵³ E gipeyo Yesu ba jalam ma dit: e julam ma dongo ku judongo ku jugorcik ceke gibino gikugi.

⁵⁴ Nwang’u Petro lubo ng’eye ku bor cen, cil die pondot pa jalam ma dit; gibedo gikud asikari de, man emuro kume i der mac.

⁵⁵ Nie julam ma dongo ku dilo ceke giyenyo mulembe kum Yesu ma giketh etho ko; e ginwang’u ngo.

⁵⁶ Kum dhanu dupa gibale, lembabali migi de ribre acel ungo.

⁵⁷ E jumoko gicungo, gibale, giwacu kumae,

⁵⁸ Wawinjo ewacu kumae, Abinyotho hekalu maeni ma jugomo ku cing’, man i ceng’ adek abigomo mange ma jutimo ku cing’ ungo.

⁵⁹ Kadok ku maeni de abali migi ribre acel ungo.

⁶⁰ E jalam ma dit ucungo i kindgi, epenjo Yesu, ewacu kumae, Idwoko lembe moko ngo? en e ang’o ma joni benyutho i kumi?

⁶¹ Ento ebedo ling’, eloko lembe moko ngo. Jalam ma dit upenje kendo, ewacu ire kumae, In i Kristu, Wod Jamugisa?

⁶² E Yesu wacu kumae, An a en: man wubineno Wod dhanu jany yo ku cing’ ma yor acwic mi Tego, m’ebebino de ku i afuru mi polo.

⁶³ Man jalam ma dit uyeco kendi pare, ewacu kumae, Can jumulembe benegowa ke mir ang’o?

⁶⁴ Wuwinjo lembacidi ma kum Mungu: wuwacu ang’o? E kagi ceke gigonje ya eromo ku tho.

⁶⁵ E jumoko maku ng’ulo lau i kume, giumo wang’e de, gipade, giwach ire kumae, Cu: asikari de gijole ku cwany mi cing’gi.

Petro Kwero Yesu

⁶⁶ E ka Petro bedo piny i pondot, jatic ma nyaku pa jalam ma dit ubino;

⁶⁷ e kan eneno Petro m’ebeoyo mac, enene, ewacu kumae, In bende wubedo wuku Janazareti, ma Yesu.

⁶⁸ Ento ekwero, ewacu kumae, Ang’eyo ngo, kadi lembe m’iyero de ang’eyo ngo: e ecidho woko pondot; e kulok ukok.

⁶⁹ Jatic ma nyaku nene, e emaku yero ni ju m’ucungo i vutgi kendo kumae, Maeni en e ng’atu acel m’i kindgi.

⁷⁰ Ento ekwero kendo. Man yo ku ng’eye nyangba ju m’ucungo i vute giwacu ni Petro kumae, Andha in i ng’atu acel m’i kindgi; kum in i Jagalilaya.

⁷¹ Ento emaku yanyu ayany, ku kwong’o kwong’ de, ewacu kumae, Ang’eyo ng’atuni ngo ma wuyero pire.

⁷² E ndhu ndhu nica kulok ukok mir arionde. Nie Petro poi kum lembe ma Yesu wacu ire kumae, Ka fodi kulok kukok wang’ ario ngo, ibikwera wang’ adek. E ka ie pido pire, eywak.