Marko 11 - The Holy Bible In Alur (Lur) Revised Orthography

Mondo pa Yesu i Yerusalem ku Yung

¹ Ka gidhingo Yerusalem, ba Bethfage ku Bethania de, ba got Zeituni, eoro kind julubne ario,

² ewacu igi kumae, Wucidh i pacu ma i weng’wu: e pio pio ka wumondo i ie, wubinwang’u nyathi kana m’ubedo atwia, ma ng’atu moko fokubedo i wie ngo; wugonye, wukele.

³ Tek ng’atu moko wacu iwu kumae, Wutimo maeni nedi? wuwac kumae, Cande ni i kum Rwoth; e ndhu ndhu nica ebiore keni kendo.

⁴ E gicidho, ginwang’u nyathi kana bedo atwia dhugola yo woko i gengi; gigonye de.

⁵ Jumoko m’ucungo keca giwacu igi kumae, Wutimo ang’o, ma wubegonyo ko nyathi kana e?

⁶ Gin ke giwacu igi calu ma Yesu wacu: e giwekogi gicidho.

⁷ E gikelo nyathi kana ba Yesu, gipedho kendi migi de i wie; ebedo de i wie.

⁸ Dhanu dupa gipedho kendi migi i wang’ayo; jumange ke jangyen, ma gitong’o i thim.

⁹ Ju m’utelo yo, ku ju m’udong’ cen de, gikok akoka kumae, Hosana; mugisa ni ng’atu m’ubino ku nying Rwoth:

¹⁰ Mugisa ni ker m’ubino, ker pa wegwa ma Daudi: Hosana malu ngbir.

¹¹ E emondo i Yerusalem, i hekalu; e kan eneno wi gin ceke ndri, nwang’u piny udoko uthieno, eai ecidho Bethania ku juapar wi ario.

Kwong’ wi Ulam

¹² Urwone, ka giai Bethania, kec unege.

¹³ E kan eneno ulam udinyo ku cen, ebino, nia nyo ebinwang’u gin moko i wie: man kan ebino i bang’e, enwang’u gin moko ngo ndhu ithe kende; kum kacek mir ulam fodutundo ngo.

¹⁴ Eloko lembe man ewacu ire kumae, Ng’atu moko kud ucam nyingi ugambre kawono cil nja ku nja. Julubne de giwinjo maeni.

Yesu Riemo Ju M’ucido Hekalu

¹⁵ Man gibino Yerusalem, emondo i hekalu, man emaku riemo ju ma giloko piny ku ju m’ung’iewo de ku i hekalu, ere dho mesa de mi juwilsente, ku kom mi ju m’uloko akuru;

¹⁶ man eyio ngo ya ng’atu moko yei agulu kadh kudo ku i hekalu.

¹⁷ Eponjo, ewacu igi kumae, Egore ngo kumae, Ot para jubilwong’o ot mi rwo ni thek ceke? ento wudwoke ni kagonjo mi weg ayeki.

¹⁸ Julam ma dongo ku jugorcik giwinjo maeni, e giyenyo maram ginyothe ko: kum lworo negogi i kume, kum udul dhanu ceke igi wang’ lii kum ponji pare.

¹⁹ E ku bang’ uthieno ceke ebedeai kud i adhura.

Ponji pir Ulam M’uner

²⁰ Kugweno ka gikadhu, gineno ulam uner cil i ulage.

²¹ E Petro m’upoi kum lembene ewacu ire kumae, Japonji, nen, ulam m’ikwong’o ener woko.

²² Yesu loko lembe ewacu igi kumae, Wubed ku yioyic yo ba Mungu.

²³ Andha awacu iwu kumae, Ng’atu ma tek biwacu ni got maeni kumae, Mugri iboli i nam; ma adundene kubedo jiji ngo, ento ebiyio nia gin m’eyero timbre, e gica bibedo ire.

²⁴ Ka kumeno awacu iwu kumae, Gin ceke ma tek wurwo wupenjo pire de, wuyi nia wujologi, e wubibedo kugi.

²⁵ E kinde ma tek wucungo wuberwo, tek wubedo ku lembe kum ng’atu moko, wuwek lembene rwiny; kara Wegwu bende ma ni i polo uwek kier mu woko.

²⁶ Ento tek wuweko lembene rwinyo woko ngo, Wegwu ma ni i polo de biweko kier mu woko ngo.

Penji pi Ka ma Yesu Nwang’u ie Ng’ol

²⁷ E gibino kendo Yerusalem: kan ebewotho de i hekalu, julam ma dongo ku jugorcik ku judongo de gibino i bang’e;

²⁸ e giwacu ire kumae, Itimo gin maeni ku ng’ol manedi? kadi ng’a m’umio iri ng’ol maeni m’itimo ko ginduni?

²⁹ E Yesu wacu igi kumae, Abipenjo penji acel i beng’wu, wulok ira lembene de, kan abiyero iwu pi ng’ol m’atimo ko gin maeni.

³⁰ Baputisi pa Yohana ai i polo, kadi ba dhanu? wulok ira lembe.

³¹ E giporo lembe gigi, giwacu kumae, Tek wabiwacu kumae, Uai i polo; ebiwacu kumae, Ka kumeno wuyie ngo nedi?

³² Ento tek wawacu kumae, Uai ba dhanu, gilworo dhanu: kum dhanu ceke gikwanu andha nia Yohana en e jabila.

³³ E giloko lembe ni Yesu giwacu kumae, Wang’eyo ngo. E Yesu wacu igi kumae, Kadok an de ayero iwu ngo pi ng’ol m’atimo ko gin maeni.