Luka 7 - The Holy Bible In Alur (Lur) Revised Orthography

Yesu Keyo Kum Jamiru pa Jego

¹ Kan edaru lembe ceke i ith dhanu, emondo i Kapernaum.

² Jamiru pa jego moko, en e ng’atu ma kaewinye, kume lith man eyenyo tho.

³ Kan ewinjo pi Yesu, eoro judong Juyahudi i bang’e, m’upenje nia ebin elar jamiru pare.

⁴ Gin de, ka gibino ba Yesu, gikwaye ma tek, giwacu kumae, Ng’atuno romo nia itim maeni ire;

⁵ kum emaru thek mwa, man egomo iwa kacokri mwa en.

⁶ E Yesu gicidho gikugi. Man kan ewok ceng’ni ot, jego oro jurimbe i bang’e, ma giwacu ire kumae, Rwoth, kud isendri giri; kum an aromo ngo nia imond i ot para:

⁷ kum kumeno ia pido nia aromo ngo m’abin ko i beng’i: ento yer lembe ci, e kum jamiru para bikei.

⁸ Kum an a ng’atu ma juketho the ng’ol, m’abedo kud asikari i tienda: awacu ba ng’atu maeni, Cidhi, e ecidho; ni mange de, Bin, e ebino; ni jamiru para de, Tim mae, e etime.

⁹ Ka Yesu winjo gin maeni, ie wang’ lii i kume, man elokre ewacu ni udul dhanu m’ulube kumae, Awacu iwu kumae, Fodi anwang’u yioyic ma dit ma kumeni ngo, ungo, i Israel de ngo.

¹⁰ E ju ma juorogi de, ka gidwogo ba ot, ginwang’u kum jamiru kei.

Yesu Ting’o Wod Dhaku ma Cware Tho

¹¹ Man etimbre yo ku ng’ei maeni nyanok, nia ecidho bang’ adhura ma julwong’o Nain; julubne gicidho gikugi, kud udul dhanu ma dit.

¹² Nie kan ewok ceng’ni dhugang’ mir adhura, nen, juyeyo avu dhanu, en e wod min kulong’, en de e dhaku ma cware tho: man dhanu dupa mir adhura ginuti gikugi.

¹³ Ka Rwoth unene, ngisi nege i kume, man ewacu ire kumae, Kud iywaki.

¹⁴ Man ecoro ceng’ni emulo kika de: e ju m’uyeye gicungo gr. Man ewacu kumae, Jalawobi, awacu iri, Ai malu.

¹⁵ E ng’atu m’utho uai malu, ebedo wi there, emaku weco. Man emie ni min.

¹⁶ E lworo makugi kagi ceke: man giyungo Mungu, giwacu kumae, Jabila ma dit uwok i kindwa: man, Mungu liewo dhanu pare.

¹⁷ Rwonglembe maeni yik pire i Yahudi ngung’, man i ng’om ceke ma ceng’ni.

Jukwenda M’uai ba Yohana ma Jabaputisi

¹⁸ Man julub Yohana giyero ire pi gin maeni ceke.

¹⁹ Man Yohana lwong’o kind julubne ario i bang’e eorogi de ba Rwoth, ewacu kumae, In i ng’atu m’ubebino, kadi wakur mange?

²⁰ E ka dhanu wok i bang’e, giwacu kumae, Yohana ma Jabaputisi orowa i beng’i, epenjo kumae, In i ng’atu m’ubebino, kadi wakur mange?

²¹ I saa maeno ekeyo tho dupa m’unyang’ i kum, ku thong’om man tipo ma rac; ju ma abinga dupa de eketho gineno piny.

²² Edwoko lembe ewacu igi kumae, Wuciyer ni Yohana pi gin ma wuneno ma wuwinjo de; abinga neno piny, weg abala mi tielo de giwotho, weg joi kumgi doko leng’, ju ma ithgi dhing’ de giwinjo, ju m’utho ndhu de gicer, lembanyong’a ma juboth ko de y ere ni jucan.

²³ Mugisa ni ng’atu m’unwang’u lembe moko ngo m’ekier i wie ni kuma.

²⁴ Ka jukwenda pa Yohana ai, emaku yero lembe pi Yohana ni udul dhanu kumae, Wucidho woko i yamba nineno ang’o? undodi m’uyengre ku yamu?

²⁵ Ento wucidho woko nineno ang’o? ng’atu m’uronjre ku kendi ma yomi? Nen, ju m’ukendo kendi m’urieny, m’ubedo ku lonyo de, gini i udi mir ubimo.

²⁶ Ento wucidho woko nineno ang’o? jabila? Eyo, awacu iwu, ma sagu jabila dit.

²⁷ Maeni ng’atu ma jugoro pire kumae, Nen, aoro jakwenda para i weng’i, Ma biyiko yo peri i weng’i.

²⁸ Ayero iwu kumae, I kind ju ma mon unyolo, ng’atu moko mbe ma sagu Yohana: ento ng’atu ma en e nok i ker pa Mungu re e m’usage.

²⁹ Dhanu ceke de ka giwinjo, ku weg ajok de, gimio bedopwe ni Mungu, gi ju m’umaku baputisi ba Yohana.

³⁰ Ento Jufarisayo ku jueuthecik gikwero lembapora pa Mungu igi gigi, gi ju ma gimaku baputisi ngo i bang’e.

³¹ Abilund poro dhanum’utuk maeni kud ang’o, man gi calu ang’o?

³² Gi calu nyithindho m’ubedo i katali, m’ulwongri i kindgi; m’uwacu kumae, Wakudho usegu iwu, man wumiel ungo; wawero wejawu, wuywak de ngo.

³³ Kum Yohana ma Jabaputisi bino ku camu kwen ungo kadok ku madhu pigulok de ngo; wuwacu de kumae, E won pajogi.

³⁴ Wod dhanu bino ku camu ku madhu de: man wuwacu kumae, Nen, ng’atu ma jambo, man andre pigulok, jarimb weg ajok ku judubo de!

³⁵ E rieko nwang’u bedopwe ni kum nyithindhe ceke.

Yesu i Ot pa Simon ma Jafarisayo

³⁶ Kind Jufarisayo acel uyenyo ya gicam gikude. Man emondo i ot pa Jafarisayo, ebedo dhu cam de.

³⁷ Nen, dhaku nuti i adhurane ma won dubo; man kan eng’eyo nia ebedo dhu cam i ot pa Jafarisayo, ekelo cupa mi kidi ma ber ma ie ju mo,

³⁸ ecungo ko yor i ng’eye ba tiende, ku ywak, man emaku cwiro piwang’e wi tiende, eyweyogi de ku yukwie, man ecwio tiende, ewirogi de ku mo.

³⁹ Nie ka Jafarisayo m’ulwong’e neno maeni, eyero kud i ie, ewacu kumae, Ng’atu maeni, tek en e jabila, kuno di eng’eyo nia dhaku maeni en e ng’a en e ng’atu manedi m’umulo kume, nia en e jadubo.

⁴⁰ Yesu dwoko lembe ewacu ire kumae, Simon, abedo ku gin moko m’ayer iri. Eloko lembe kumae, Japonji, yer.

⁴¹ Ng’atu moko m’umio jupiny ni banja ebedo ku jubanja ario: acel banja pare denarii dak abic, mange ke pier abic.

⁴² Ka gimbe ku gin ma gicul ka wang’e, eweko igi gin ario. Ka kumeno makani ma kind juario maeni ma bimare ma sagu?

⁴³ Simon uloko lembe ewacu kumae, Awacu nyo ng’atu m’eweko lem pare dit ma sagu. E ewacu ire kumae, Ipoko lembe pwe.

⁴⁴ Elokre ba dhaku, man ewacu ni Simon kumae, Ineno dhaku maeni? Amondo i ot peri, imio pi ira ngo mi tienda: ento ecwiro piwang’e wi tienda, eyweyogi de ku yukwie.

⁴⁵ Icwio limba ngo: ento en, ugambre i kinde m’amondo, eweko cwio tienda ngo.

⁴⁶ Iwiro mo i wia ngo: ento ewiro tienda ku mo.

⁴⁷ Kum kumeno awacu iri kumae, Dubo pare, m’ubedo dupa, uwekre woko; kum emaru dit: ento ng’atu ma juweko ire nyanok, ng’atuno maru nyanok.

⁴⁸ Ewacu ire kumae, Dubo peri wekre woko.

⁴⁹ Ju ma gibedo kugi dhu cam de gimaku wacu i igi gigi kumae, Ng’atu mae ma weko dubo woko en e ng’a?

⁵⁰ Ewacu ni i dhaku kumae, Yioyic peri e m’ubodhi; cidh ma cwinyi kwio.