Luka 5 - The Holy Bible In Alur (Lur) Revised Orthography

Gitwomo Udul Rec Dupa

¹ Nie etimbre, kinde ma udul dhanu gicungri i kume giwinjo lem pa Mungu de, nwang’u ecungo dhu nam Genesareti;

² man eneno yei ario bedo dhu nam: ento junam giai kud i igi, gibelwoko voi migi.

³ E emondo i yei acel, ma pa Simon, man epenje ya ecwal i pi nyanok dhu wath. Man ebedo piny eponjo udul dhanu de kud i yei.

⁴ Kan eweko weco lembe, ewacu ni Simon kumae, Cwal ka ma thuth, wulur voi i pi kara wutwom.

⁵ Simon uloko lembe ewacu kumae, Japonji, wamula ku tic ku diewor soro, e wakwanyu gin moko ngo: ento kum lem peri abiluro voi.

⁶ E ka gitimo maeni, gitwomo rec udul dupa; voi migi de maku cot:

⁷ man gigwelo jutic wagi ma ni i yei mange, ya gibin gikonygi. E gibino, gipong’o yei ario, ketho gimaku mwony.

⁸ Ento ka Simon Petro neno, epodho the cong Yesu, ewacu kumae, Koiweka, e Rwoth; kum an a jadubo.

⁹ Kum ie wang’ lii, ku ju ma ginuti gikugi de, kum udul rec ma gitwomo;

¹⁰ Yakobo ku Yohana, wot Zebedayo ma gi jutic wagi Simon, bende kumeno. Yesu wacu ni Simon kumae, Lworo kud unegi; ugambre kawono ibitwomo dhanu.

¹¹ Ka gikelo yei migi dhu wath, giweko ceke, gilubo ng’eye de.

Yesu Lonyo Kum Won Joi

¹² Nie etimbre, kinde m’enuti i adhura acel ma kind wagi, nen, ng’atu moko ma joi romo kume: man kan eneno Yesu, epodho arieba wang’e, man ekwaye, ewacu kumae, Rwoth, tek iyenyo, icopo dwoko kuma leng’.

¹³ Man erieyo cinge, emulo ko kume, ewacu kumae, Ayenyo; kumi dok leng’. E eni eni joi weke.

¹⁴ Man eng’olo ire ya kud eyer ni ng’atu moko: ento cidh i yo peri, man inyuthri ni jalam, man imi pi dwokoleng’ peri, calu Musa ng’olo, ni lembatuca igi.

¹⁵ Ento pire yik m’usagu dit: man udul dhanu ma dit gicokri niwinje, kara jukei tho migi de.

¹⁶ Ento eai ecidho ka ma ngele, man erwo.

Yesu Keyo Kum Won Tho ma Nego Kum Nding’

¹⁷ E etimbre i ceng’ moko ma kind maeno, nwang’u ebeponjo; man Jufarisayo ku jueuthecik gibedo keca, ma giai ku ba pacu ceke mi Galilaya man Yahudi ku Yerusalem: man tego pa Rwoth ni i bang’e m’ecangu ko kum.

¹⁸ Man nen, dhanu kelo ng’atu ma kume tho nding’ wi kavuto: man giyenyo giroye, gikethe i wang’e.

¹⁹ Ka karoye mbe igi kum udul dhanu, giidho wi ot, gilure piny ku wang’ biriki ku kavuto pare i kindgi i wang’ Yesu.

²⁰ Kan eneno yioyic migi, ewacu kumae, Nico, dubo peri wekre iri woko.

²¹ Man jugorcik ku Jufarisayo gimaku poro lembe, giwacu kumae, Maeni ng’a m’uyero lembacidi kum Mungu? Ng’a ma copo weko dubo woko, ma k’e Mungu kende ngo?

²² Ento Yesu m’ung’eyo porolembe migi, edwoko lembe igi ewacu kumae, Wuporo lembe i adundewu nedi?

²³ Makani ma yot ma sagu, wacu kumae, Dubo peri juweko woko iri; kadi wacu kumae, Ai malu iwothi?

²⁴ Ento kara wung’ei nia Wod dhanu bedo ku ng’ol wi ng’om mi weko dubo (ewacu ni ng’atu ma kume tho nding’ kumae), Awacu iri kumae, Ai malu, ting’ kavuto peri, man icidh i ot peri.

²⁵ E ndhu ndhu nica eai malu kud i wang’gi, eting’o gin m’evuto i wie, ecidho i ot pare, ku yungo Mungu.

²⁶ Kagi ceke igi wang’ lii, man giyungo Mungu: lworo de negogi dwanya, giwacu kumae, Tinuni waneno gin ma tung’.

Yesu Lwpng’o Lawi

²⁷ Yo ng’ei gin maeni ecidho, man eneno won ajok, nyinge Lawi, m’ebedo ka ma jujoko ie ajok, man ewacu ire kumae, Lub ng’eya.

²⁸ Man eweko ceke, eai malu elubo ng’eye.

²⁹ Man Lawi timo ire agba ma dit i ot pare: weg ajok ku jumange ma gibedo dhu cam gikugi gin udul ma dit.

³⁰ Jufarisayo ku jugorcik ging’ur kum julubne, giwacu kumae, Wucamu wumadhu de ku weg ajok man judubo nedi?

³¹ Man Yesu loko lembe ewacu igi kumae, Ju ma kumgi leng’ can jakeikum negogi ngo; ento ju ma kumgi lith re.

³² Abino ngo nilwong’o weg bedopwe ya gilok cwinygi ento judubo re.

Penji pi Kwiro Cam

³³ Man giwacu ire kumae, Julub Yohana giweko cam wang’ udul, gikwayu kwac de; julub Jufarisayo bende; ento peri gicamu gimadhu de.

³⁴ Yesu wacu igi kumae, Wucopo ketho wot won ambadha wek cam, kinde ma won ambadha ni i bang’gi?

³⁵ Ento ceng’ bibino; man ka jubikabu won ambadha woko kud i bang’gi, e gibilund weko cam i ceng’ maeno.

³⁶ Eyero lembabola bende igi kumae, Ng’atu moko mbe ma yeco kurembo kum kendi ma nyen man ekethe kum kendi m’uti; tek eketho, nwang’u eyeco kendi ma nyen, man kurembo de ma kum kendi ma nyen eribre ngo ku kendi m’uti.

³⁷ Ng’atu moko mbe de ma ketho pigulok ma nyasa i usaupigulok m’uti; tek eketho, pigulok ma nyasa yeco usaune, e en gire ebioi, usaune binyothre.

³⁸ Ento pigulok ma nyasa jukojuketho i usaupigulok ma nyen be.

³⁹ Ng’atu moko mbe de ma madhu pigulok ma kudra ma yenyo ma nyasa; kum ewacu kumae, Ma kudra ber ma sagu.