Luka 4 - The Holy Bible In Alur (Lur) Revised Orthography

Jubidho Yesu

¹ Yesu ai Yordan, edwogo m’epong’ ku Tipo Maleng’, Tipo de telo wie i yamba

² wonabali de bidhe nindo pier ang’wen. Ecamu gin moko ngo i ceng’ maeno: ka githum, kec unege.

³ E wonabali wacu ire kumae, Tek in i Wod Mungu, wac ni kidi maeni nia edok ni kwen.

⁴ Yesu loko lembe ire kumae, Egore kumae, Dhanu bibedo ni kum kwen kende ngo.

⁵ Man etelo wie malu, enyutho ire ker ceke m’i ng’om i kinde ma nyathigi ci.

⁶ Wonabali wacu ire kumae, Abimio ng’ol maeni ceke iri, ku dwong’ne de: kum jumie ira; man ke amie ni ng’atu ma tek ayenyo.

⁷ Ka kumeno tek ibirwo i bang’a, ceke bibedo peri.

⁸ Yesu dwoko lembe ewacu ire kumae, Egore kumae, Rwo ni Rwoth Mungu peri, man itim ire kende.

⁹ Man etelo wie Yerusalem ekethe de wi usimbru mi hekalu, man ewacu ire kumae, Tek in i Wod Mungu, ai ku kuno iredhri piny:

¹⁰ kum egore kumae, Ebing’olo lembe ni malaika piri ya gikuri:

¹¹ man, Gibitheng’i malu i cing’gi, Kara kud iewany tiendi kum kidi.

¹² Yesu loko lembe ewacu ire kumae, Egore kumae, Kud imul i Rwoth Mungu peri.

¹³ Ka wonabali daru abidhe kubang’e ceke, eweke mi nindo moko.

Yesu Caku Tic Pare i Galilaya

¹⁴ E Yesu dwogo Galilaya ku tego mi Tipo: man pire yik cil i ng’om ma ceng’ni ceke.

¹⁵ Man eponjo i kacokri migi, dhanu ceke de giyunge.

Yung Umbe ni Yesu i Nazareti

¹⁶ Ebino Nazareti, ka ma jutunge i ie: man emondo i kacokri i ceng’ sabatu, calu kurane, man ecungo malu nisomo.

¹⁷ Jumio ire kitabu pa jabila Isaya. Man eyabu kitabune, enwang’u ka ma lembe gore i ie kumae,

¹⁸ Tipo pa Rwoth ni i wia, Kum ewira kara ayer lembanyong’a ni jucan: Eora niyero pi gony ni ju ma juyakugi, Man pi dwoko nenopiny ni abinga, Nigonyo ju ma kumgi dhuth,

¹⁹ Niyero pi rundi pa Rwoth ma yire.

²⁰ Man edolo kitabu, edwoke ba jatic, man ebedo piny: wang’ dhanu ceke ma i kacokri de konjri i kume.

²¹ E emaku yero igi kumae, Tinuni lembagora pa Mungu maeni timbre kakare i ithwu.

²² Dhanu ceke gi jumulembe pare, man igi wang’ lii kum lembe mi bero m’uai i dhoge: giwacii kumae, Maeni wod Yusuf ungo?

²³ Man ewacu igi kumae, Wubiwacu ira lembabola maeni andha, Jakeikum cengri giri: gin ceke ma wawinjo utimbre Kapernaum, tim keni i ng’om ma thu ma dhe bende.

²⁴ Man ewacu kumae, Andha ayero iwu kumae, Jabila moko mbe ma yire i ng’om ma thugi ma dhe.

²⁵ Ento andha awacu iwu kumae. Mon ma coggi tho dupa nuti i Israel i ceng’ pa Elia, i nindo ma polo twire rundi adek ku dwi abusiel, ka ndru ma dit upodho i ng’om ngung’;

²⁶ man juoro Elia ba ng’atu moko m’i kindgi ngo, ento ba dhaku ma cware tho kende ma i Sarepta, i ng’om Sidon.

²⁷ Man weg joi de dupa nuti i Israel i nindo pa Elia ma jabila; ng’atu moko mbe i kindgi de ma julonyo kume, ento Naman kende ma Jacami.

²⁸ Ka giwinjo gin maeni kwinyo pong’o i dhanu ceke ma i kacokri;

²⁹ giai malu, man giwodhe woko ku i adhura, gitere wi ungulu got ma jugomo adhura migi i wie, kara gikul wie giredhe ko piny.

³⁰ Ento ekadhu kud i kindgi ecidho i yo pare.

Won Tipo M’ucido

³¹ Eloro piny Kapernaum, ma adhura mi Galilaya. Eponjogi de i ceng’ sabatu:

³² e igi wang’ lii kum ponji pare; kum lembe pare bedo ku ng’ol.

³³ Man i kacokri ng’atu acel nuti ma won tipo mi pajogi m’ucido; man ekok ku dwande ma tek kumae,

³⁴ Ha! Yesu in ma Janazareti, wabedo ku lembang’o wakudi? ibino nyothowa? Ang’ei in i ng’adi, Ng’atu Maleng’ pa Mungu.

³⁵ Yesu juke ewacu kumae, Bed ling’, wok kud i ie. Ka pajogi redhe piny i kindgi, ewok kud i ie ma k’etime rac ungo.

³⁶ E igi ceke wang’ lii, giwecri gigi, giwacu kumae, Maeni lembang’o? kum ku ng’ol man tego eng’olo lembe ni tipo m’ucido, e giwok woko.

³⁷ E pire yik i kaka ceke m’i ng’om ma ceng’ni.

Yesu Keyo Kum Dhamaru Petro

³⁸ Man eai kud i kacokri, emondo de i ot pa Simon. E dhamaru Petro kume cek lii; man gikwaye pire.

³⁹ Man ecungo i wang’e ejuko cekkume; e eweke: e eni eni eai malu man etimo igi.

Yesu Keyo Kum Weg Tho Dupa

⁴⁰ Man ka ceng’ umaku mwony, dhanu ceke m’ubedo ku dhanu ma kumgi lith ku tho ma kwonde tung’ tung’ gikelogi i bang’e; man eketho cinge i kumgi kubang’gi nzu, ecangugi.

⁴¹ Pajogi de wok woko kud i dhanu dupa, gibekok akoka, man giwacu kumae, In i Wod Mungu. Ejukogi, eyio ngo ya giyer, kum ging’eyo nia en e Kristu.

Yesu Cidho Nirweyo Lembanyong’a

⁴² Ka piny uni, eai ecidho i ka ma ngele: man udul dhanu giyenye, gicidho i bang’e de, giyenyo gicere, nia kud ewekgi.

⁴³ Ento ewacu igi kumae, Akociyero lembanyong’a mi ker pa Mungu bang’ adhura mange bende be: kum juora kum maeno.

⁴⁴ Man ebedeyero i kacokri mi Galilaya.