Luka 24 - The Holy Bible In Alur (Lur) Revised Orthography

Cer pa Yesu

¹ Ento i ceng’ ma kwong’a ma yenga, ka mombwa thumo, gibino ba liel ma juroko i cana, ma gikelo ko udok ma giyiko.

² E ginwang’u jung’ielo kidi woko ku dhu liel ma juroko i cana.

³ Gimondo de, ginwang’u avuj Rwoth Yesu de ngo.

⁴ E etimbre, kinde ma cwinygi ng’abre kum lembene, nen, juario cungo i vutgi ku kendi m’urieny:

⁵ man ka lworo makugi gikulo wang’gi de i ng’om, giwacu igi kumae, Nedi wuyenyo ng’atu ma kwo i kind ju m’utho?

⁶ Embe keni, ento ecer: wupoi maram eyero ko iwu ma fodi eni i Galilaya,

⁷ m’ewacu ko nia Wod dhanu jubikomie be i cing’ judubo, man jubigurev ebicer kendo de i ceng’ mir adege.

⁸ E gipoi kum lembe pare,

⁹ giai de ku ba liel ma juroko i cana gidok, giyero gin maeni ceke ni juapar wi acel, ku juwadi ceke bende.

¹⁰ Nie gin gi Mariamu Magdalene, ku Yoana, man Mariamu ma min Yakobo: ku mon wadi mange de gikugi giyero gin maeni ni jukwenda.

¹¹ E lembe maeni nen i wang’gi calu wec mananu; e giyiogi ngo.

¹² Ento Petro ai, eringo ba liel ma juroko i cana; man egung’ eneno i ie, eneno kitambala ma nwang’ ubedo katung’; man edok i ot pare, ma ie wang’ lii kum gin m’utimbre.

Yesu ku Juario M’ubecidho Emao

¹³ Man nen, ceng’ nino juario m’i kindgi gicidho i pacu ma julwong’o Emao, ma en e ungolo apar wi abusiel ku Yerusalem.

¹⁴ E giweco i kindgi pi gin maeni ceke m’utimbre.

¹⁵ Man etimbre, kinde ma giweco gipenjri de i kindgi, nia Yesu ku kite coro ceng’ni, giwotho gikugi de.

¹⁶ Ento wang’gi umbre kara ku ging’eye.

¹⁷ Man ewacu igi kumae, Lembang’o ma wuwotho ku weco i kindwu? E gicungo ling’, ma wang’gi cido ku can.

¹⁸ Man ng’atu acel m’i kindgi, ma nyinge Kleopa, uloko lembe wacu ire kumae, Ibedo i kendi i Yerusalem man ing’eyo gin m’utimbre kuca i ceng’ maeni ngo?

¹⁹ Man ewacu igi kumae, E girang’o? Man giwacu ire kumae, Gin m’utimbre kum Yesu ma Janazareti, ma en e jabila ma tek i tic ku lembe de i wang’ Mungu i wang’ dhanu ceke bende:

²⁰ man maram julam ma dongo ku jubim mwa de gimie ko kara jupok lembe i wie rac ni tho, man gigure.

²¹ Ento wageno nia en e ng’atu ma biwaru Israel. Eyo m’umedre kum maeni ceke, kawono en e ceng’ mir adege yo ng’ei gin maeni m’utimbre.

²² Man kendo mon moko m’i kindwa ketho iwa wang’ lii, ma gicidho pir kugweno ba liel ma juroko i cana;

²³ ka ginwang’u avuje ngo, gibino, giwacu nia gineno ginmawokiwang’ mi malaika, m’uwacu nia ebedo kwo.

²⁴ E jumoko ma ni i bang’wa de gicidho ba liel ma juroko i cana, e ginwang’u ebedo kumeno calu mon uwacu: ento en re ginene ngo.

²⁵ Man ewacu igi kumae, E wun ma wun adhura, ma adundewu galu ku yio lembe ceke ma jubila yero!

²⁶ Kristu kousendre be ku gin maeni ngo kan emond i dwong’ pare?

²⁷ Man etheko kum lem pa Musa ku jubila ceke de, ekoro igi i lem pa Mungu ceke gin ma pire gire.

²⁸ E gidhingo pacu, ka ma gibecidho i ie: man etimo calu eyenyo ecidh i wang’e.

²⁹ Man gicere, giwacu kumae, Dong’ wabed wakudu; kum uthieno dhingo, ceng’ de doko ng’ic. E emondo gibed gikugi.

³⁰ Man etimbre, ka gibedo gikugi dhu cam, eting’o kwen emio mugisa de; e kan eng’wenyo ie emio igi.

³¹ E wang’gi yabre, man ging’eye; e erwinyo woko kud i wang’gi.

³² Man giwecri i kindgi kumae, Adundewa wang’ lii ngo i iwa, kan eyero iwa i yo, kan ekoro iwa lembagora pa Mungu?

³³ E i saa maeno giai malu, man gidok Yerusalem, e ginwang’u juapar wi acel ucoko dhoggi karacelo, ku ju ma gini i bang’gi,

³⁴ giwacu kumae, Rwoth ucer andha, man enyuthre ni Simon.

³⁵ E giyero gin m’utimbre i yo, man maram eng’eire ko igi i ng’wenyo i kwen.

Yesu Nyuthre ni Julubne

³⁶ E ka giyero gin maeni, en ku kite ecungo i kindgi, ewacu igi kumae, Kwiocwiny ubed i beng’wu.

³⁷ Ento ndiri makugi man lworo, e giwacu nyo gineno tipo.

³⁸ Man ewacu igi kumae, Cwinywu ng’abre nedi? penji de wok i adundewu nedi?

³⁹ Wunen cinga ku tienda, nia en e an ku kita: wumul kuma, wunen; kum tipo mbe ku ring’o man cogo, calu ma wuneno abedo ko.

⁴⁰ E kan eyero maeni, enyutho igi cinge ku tiende.

⁴¹ E ka fodi giyio ngo ni mutoro m’unegogi, ku igi de m’uwang’ lii, ewacu igi kumae, Gin moko nuti beng’wu keni mir acama?

⁴² E gimio ire ng’et rec m’athola.

⁴³ Man eting’e, ecamu de i wang’gi.

⁴⁴ Man ewacu igi kumae, Maeni en e lembe para m’ayero iwu, ma fodi ani i beng’wu, nia gin ceke koutimbre be kakare, m’ugore pira i cik pa Musa, ku jubila, ku i zaburi de.

⁴⁵ Elund eyabu pidoigi, karafging’ei lembagora pa Mungu;

⁴⁶ man ewacu igi kumae, Egore kumeno, nia maku Kristu sendre, ecer kendo de ku kind ju m’utho i ceng’ mir adege;

⁴⁷ man kara juyer pi lokocwiny ku rucodubo i nyinge ni thek ceke, ugambre Yerusalem.

⁴⁸ Wun wu jumulembe mi gin maeni.

⁴⁹ Man nen, aoro lembang’ola pa Vwa i wiwu; ento wubed i adhura, ram wurony ko tego m’uai malu.

Yesu Dok i Polo

⁵⁰ Man etelo wigi woko i ng’et Bethania: man eting’o cinge malu, emio igi mugisa.

⁵¹ Man etimbre, kan emio igi mugisa, epokre gikugi, e juting’e malu i polo.

⁵² E girwo ire, man gidok Yerusalem ku mutoro ma dit:

⁵³ man gibedo thiri thiri i hekalu, ku mio mugisa ni Mungu.