Luka 23 - The Holy Bible In Alur (Lur) Revised Orthography

Yesu i Wang’ Pilato

¹ Man udulgi ceke ai malu, gikele i wang’ Pilato.

² E gimaku dote, giwacu kumae, Wanwang’u ng’atu maeni beroco thek mwa, man ebekwero ya ku jumi ajok ni Kaisari, ewacu de nia en e m’e Kristu m’ubimo.

³ E Pilato penje, ewacu kumae, In i Ubimo mi Juyahudi? Man edwoko lembe ire ewacu kumae, Iwacu.

⁴ Man Pilato wacu ni julam ma dongo kud udul dhanu kumae, Anwang’u dubo ngo i ng’atu maeni.

⁵ Ento gijai ma sagu, giwacu kumae, Ethubo i dhanu, eponjo cil i Yahudi ceke, ugambre i Galilaya cil kakeni.

Yesu i Wang’ Herode

⁶ Ento ka Pilato winjo maeni, epenjo tek ng’atuni en e Jagalilaya.

⁷ E kan eng’eyo nia eni the pokolembe pa Herode, eore ba Herode, ma en bende eni i Yerusalem i ceng’ maeni.

⁸ Nie ka Herode neno Yesu, anyong’a nege dit: kum ava nene gamu time con, kum ewinjo pire; man egeno y a ebineno musana moko m’utimbre ni kume.

⁹ E epenje ku lembe dupa; ento eloko lembe ngo ire.

¹⁰ E julam ma dongo ku jugorcik gicungo, gibedote apila.

¹¹ Herode de kud asikari pare ging’ale, gicaye de, man ka gironye ku kendi ma ber giore edok ba Pilato.

¹² Man i ceng’ maeno Herode ku Pilato gicamu rimo: kum naka adegi nii kindgi.

Jung’olo Tho wi Yesu

¹³ E Pilato lwong’o julam ma dongo man jubim ku dhanu de karacelo i bang’e.

¹⁴ Man ewacu igi kumae, Wukelo ng’atuni i bang’e calu ng’atu acel m’uroco dhanu: man nen, an, m’aluro i lembe pare i vutwu, anwang’u dubo ngo i ng’atu maeni pi gin maeno ma wudote pire:

¹⁵ ungo, kadok Herode: kum edwoke i bang’wa; man nen, etimo gin moko ngo m’uromo ku tho.

¹⁶ Ka kumeno abifode, man abigonye.

¹⁷ Nie ekoegony jakol acel igi be i agba.

¹⁸ Ento kagi ceke gikok karacelo, giwacu kumae, Ter ng’atu maeni cen, gony iwa Baraba:

¹⁹ en e ng’atu acel ma jubole i odkol kum ethubo ali i adhura, man kum negonek.

²⁰ Pilato yero igi kendo, m’eyenyo egony Yesu;

²¹ ento gikok, giwacu kumae, Gure, gure.

²² E ewacu igi wang’ adege, Nedi, gin ma rac ang’o ma ng’atuni timo? Anwang’u lembe moko ngo i bang’e ma romo ku tho: ka kumeno abifode abigonye de.

²³ Ento gijai giwoi ku dwandgi ma tek, ma gipenjo ko nia jugure. E dwandgi sagu.

²⁴ Man Pilato ng’olo nia dong’ jutim gin ma gipenjo.

²⁵ Man egonyo ng’atu ma jubole i odkol kum athube ku nek, en e ng’atu ma gikwaye; ento Yesu emie ni yeny migi.

Maram Juguro Ko Yesu wi Yen M’athara

²⁶ E ka gipeye woko, gimaku ng’atu acel ma nyinge Simon ma Jakurene, m’uai i thim, e giketho yen m’athara i wie, kara eyei elub ko ng’ei Yesu.

²⁷ E udul dhanu ma dit ulubo ng’eye, ku mon m’ugoyo nduru m’uywak de i kume.

²⁸ Ento Yesu lokre i bang’gi ewacu kumae, Nyig Yerusalem, kud wuywak i kuma, ento wuywak i kumwu giwu, man pi nyithindho mu.

²⁹ Kum nen, ceng’ bibino, ma gibiwacu i ie kumae, Mugisa ni mugumba, ku ic ma fodunyol ungo de, man thuno ma fodi judhodho ngo.

³⁰ I nindo maeno gibimaku wacu ni gudi kumae, Podh i wiwa; ni ungulu got ke kumae, Umwa.

³¹ Kum tek gitimo gin maeni i yen ma numu, ang’o ma bitimbre i yen m’uthwo?

³² Juario mange bende ginuti, ma gi judubo, ma jupeyogi, gikugi jubecinegogi.

³³ E ka giwok i ka ma julwong’o Upokowic, gigure keca, ku judubo de, acel yo ku cing’ ma yor acwic acel ke yo ku cing’ ma yor acam.

³⁴ E Yesu wacu kumae, Vwa, wek lem migi rwiny; kum ging’eyo ngo gin ma gitimo. Man gipoko kendi pare i kindgi, gigoyo ku jara.

³⁵ Dhanu de cungo gibeneno. Jubim de ging’ale, giwacu kumae, Ebodho jumange; wek ebodhre gire, tek en e Kristu pa Mungu, m’egoyo nyinge.

³⁶ E asikari bende gicaye, ma gibino i bang’e, gimio picwa ire,

³⁷ giwacu de kumae, Tek in i Ubimo mi Juyahudi, bodhri giri.

³⁸ Ramblembe bende ni yor i wie kumae, MAENI UBIMO MI JUYAHUDI.

³⁹ E jadubo acel ma julierogi ecaye, ewacu kumae, In i Kristu ngo? bodhri giri ku wan de.

⁴⁰ Ento wadi dwoko lembe, ejuke, ewacu kumae, E ilworo cil Mungu de ngo, in m’ini i lembapoka ma rac ma cal aceli?

⁴¹ E wan ebedo iwa pwe andha; kum wanwang’u sukulia m’uromo ku tic mwa: ento ng’atuni timo gin moko ngo ma rac.

⁴² Man ewacu kumae, Yesu, poi pira kan imondo i ker peri.

⁴³ E ewacu ire kumae, Andha awacu iri kumae, Tin wabibedo wakudi i Paradis.

Tho pa Yesu

⁴⁴ I kinde maeno e calu saa mir abusiende, e mudho yutho wi ng’om ceke cil i saa mir abung’wende,

⁴⁵ der ceng’ de jik: kusika mi bongu m’i hekalu de kak dra.

⁴⁶ Man Yesu, m’ukok ku dwande ma tek, ewacu kumae, Vwa, aketho tipona i cingi: e kan ewacu maeni, eweko cwinye kadhu.

⁴⁷ E ka jego neno gin m’utimbre, eyungo Mungu, ewacu kumae, Andha ng’atu maeni e ng’atu ma pwe.

⁴⁸ E udul dhanu ceke coltri karacelo kum neno maeni, e ka gineno gin m’utimbre, gidok ku dhongo korgi.

⁴⁹ E dhanu ceke ma ging’io kugi, ku mon m’ulubo ng’eye kud i Galilaya, gicungo ku cen, gineno gin maeni.

Kuny pa Yesu

⁵⁰ Man nen, ng’atu ma nyinge Yusuf, m’e ng’atu acel ma kind dilo, en e ng’atu ma ber ma pwe de

⁵¹ (eyio lembapora migi ku tic migi de ngo), en e ng’atu ma Arimathaya, adhura mi Juyahudi, m’ebekio ker pa Mungu:

⁵² ng’atu maeni eidho ba Pilato, man ekwayu avuj Yesu.

⁵³ Man efudhe piny, eboye de i bongu ma nwang’, ekethe de i liel ma juroko i cana, ka ma avu dhanu fokuvuto i ie ngo.

⁵⁴ Man en e ceng’ Yikopiny, ceng’ sabatu de dhingo.

⁵⁵ E mon, m’ubino kugi kud i Galilaya, gilubo ng’eye, man gineno liel ma juroko i cana, man maram juketho ko avuje.

⁵⁶ E gidwogo, giyiko udok ma ng’wice ng’ar ku mo de. I ceng’ sabatu de giyom calku lembang’ola.