Luka 22 - The Holy Bible In Alur (Lur) Revised Orthography

Jutelwic Uporo Lembe Kum Yesu

¹ NIE agba mi kwen ma thobi mbe i ie dhingo ceng’ni, ma julwong’o Kadhukuwijo.

² E julam ma dongo ku jugorcik de giyenyo maram gicopo nege ko; kum gilworo dhanu.

³ E Jok umondo i Yuda ma julwong’o Iskariote, ma en e kind juapar wi ario.

⁴ E ecidho, giweco ku julam ma dongo ku jego, maram ecopo mie ko igi.

⁵ E anyong’a negogi, man giribo lembe gikugi y a gimie sente.

⁶ En de eyio, man eyenyo maram ecopo cibe ko igi kan udul dhanu mbe.

Yesu Camu Kadhukuwijo ku Julubne

⁷ Ceng’ mi kwen ma thobi mbe i ie wok, ma jukojulamu ie lam mi kadhukuwijo be.

⁸ Man eoro Petro giku Yohana, ewacu kumae, Wuciyik iwa kadhukuwijo, kara wacam.

⁹ E giwacu ire kumae, Iyenyo wayik kani?

¹⁰ Man ewacu igi kumae, Nen, ka wumondo i adhura, wubirombo ku ng’atu m’uyeyo agulu pi; wulub ng’eye ka m’emondo i ie i ot.

¹¹ E wubiwacu ni won ot kumae, Japonji wacu iri kumae, Odwelo nikani, ka ma wabicamu ie kadhukuwijo ku julubna?

¹² E ebinyutho iwu ot ma dit ma malu m’ubedo ku piny i ie: e wuyik kakeno.

¹³ E gicidho, ginwang’u calu ewacu igi: e giyiko kadhukuwijo.

Thekri mi Cemo pa Rwoth

¹⁴ Ka saane tundo, ebedo piny, giku julubne.

¹⁵ Man ewacu igi kumae, Kadhukuwijo maeni ava camu wakudu nega dit ma fokasendra ngo:

¹⁶ kum awacu iwu kumae, Abicame ngo, ma foketimbre kakare ngo i ker pa Mungu.

¹⁷ Man egamu kikombe, kan emio foc, ewacu kumae, Wugam maeni, wupok i kindwu:

¹⁸ kum awacu iwu kumae, Ugambre kawono abimadhu pigolok ungo, ma fodi ker pa Mungu ku bino ngo.

¹⁹ E eting’o kwen, e kan emio foc, eng’wenyo ie, emio igi, ewacu kumae, Maeni en e kuma m’umire piwu: wutim mae wupoi ko pira.

²⁰ Kikombe de kumeca yo ng’ei cemo mir uthieno, ewacu kumae, Kikombe maeni en e lembariba ma nyen i rimba, cil maeno m’uthwogre woko piwu.

²¹ Ento nen, cing’ ng’atu m’uciba ni wi mesa i bang’a.

²² Kum Wod dhanu eidho andha, calu lembe kethre: ento can wi ng’atu maeno m’ucibe!

²³ E gimaku penjri i kindgi, nia ng’a m’i kindgi ma bitimo gin maeni?

Piem pi Ng’a ma Dit

²⁴ Piem uwok i kindgi bende, nia ng’a m’i kindgi ma jukwanu ya e dit ma sagu.

²⁵ E ewacu igi kumae, Ubimo mi Thekdhanumange gibimo wigi; ju m’ubedo ku ng’ol i wigi julwong’ogi Jutimber.

²⁶ Ento wubibedo kumeno ngo: ento ng’atu m’usagu i kindwu, dong’ edok calu ng’atu ma nok; ng’atu ma jawipiro de, calu ng’atu ma timo.

²⁷ Kum makani m’usagu, ng’atu m’ubedo dhu cemo, kadi ng’atu m’utimo? en e ng’atu m’ubedo dhu cam ungo? ento abedo i kindwu calu ng’atu m’utimo.

²⁸ Ento wun wu ju ma wabedo asu wakudu i abidhe para;

²⁹ man ang’olo iwu ker, cil calu Vwa ng’olo ira,

³⁰ kara wucam wumadh de dhu mesa para i ker para; man wubijany wi komker ku poko lembe wi suru apar wi ario mir Israel.

Yesu Nyutho Maram Petro Bikwere Ko

³¹ Simon, Simon, nen, Jok upenjo nia ebed kudi, kara epiedhi pami nganu:

³² ento akwayu piri, kara yioyic peri kud urany; in de, kan ilokri kendo, iteng’ utumeru.

³³ Man ewacu ire kumae, Rwoth, abedo ayika mi eidho kudi i odkol man i tho de.

³⁴ E ewacu kumae, Awacu iri, Petro, kulok bikok ungo tinuni, ma fok’ikwero wang’ adek ungo nia ing’eya ngo.

Gbethe, Mangala ku Palamularu

³⁵ Man ewacu igi kumae, Naka kan aorowu ma gbethe mbe kudu, ku mangala, ku wara de, nwang’u gin moko rem iwu? Giwacu kumae, Gin moko mbe.

³⁶ Man ewacu igi kumae, Ento kawono, ng’atu ma won gbethe, wek eting’e, man won mangala bende kumeca; man ng’atu ma palamularu pare mbe, wek elok kanzu pare, eng’ieu ko.

³⁷ Kum awacu iwu, nia maeni m’ugore bikotimbre kakare i kuma be kumae, E jukwane ku judubo: kum maeno ma pira timbre kakare.

³⁸ E giwacu kumae, Rwoth, nen, palamularu ario ni keni. E ewacu igi kumae, Eromo.

Yesu Rwo wi Got Zeituni

³⁹ Man ewok woko, ecidho de, wi got Zeituni, calu kura pare; e julubne bende gilubo ng’eye.

⁴⁰ E kan ewok kakeca, ewacu igi kumae, Wurwo kara kud wumond i abidhe.

⁴¹ E kindgi liero kugi rom ku ma jucanyu ie kidi; man erum piny erwo,

⁴² ewacu kumae, Vwa, tek iyenyo, kab kikombe maeni kud i bang’a: ento yeny para ngo, ento peri, utimbre.

⁴³ E malaika wok i bang’e kud i polo, m’udwoke tek.

⁴⁴ E en m’eni i ndiba erwo ma tek m’usagu; kwok pare de doko pami ng’idho rimo m’uton i ng’om.

⁴⁵ E kan eai malu kud i rwo pare, ebino ba julub, man enwang’u ginindo ni can,

⁴⁶ man ewacu igi kumae, Wunindo nedi? wuai malu, wurwo, kara kud wumond i abidhe.

Jucibo Yesu man Jumake

⁴⁷ Kinde ma fodi eweco, nen, udul dhanu, ku ng’atu ma julwong’o Yuda, acel m’i kind juapar wi ario utelo wigi; man ecoro ceng’ni Yesu nicwio limbe.

⁴⁸ Ento Yesu wacu ire kumae, Yuda, icibo Wod dhanu ku cwici?

⁴⁹ E ka ju ma ginuti i vute gineno gin ma bilubo toke, e giwacu kumae, Rwoth, wabitong’o ku palamularu?

⁵⁰ E ng’atu acel m’i kindgi tong’o jamiru pa jalam ma dit, man etong’o ithe ma yor acwic woko.

⁵¹ Ento Yesu loko lembe ewacu kumae, Wukowuwekgi tundu. Man emulo ithe, eketho ekei.;

⁵² E Yesu wacu ni julam ma dongo, ku jego mi hekalu, man judongo, ma gibino i kume kumae, Wubino, calu kum won ayeki, ku palamularu ku duli?

⁵³ Ka wanuti wakudu ceng’ ku ceng’ i hekalu, wurieyo cingwu ngo i kuma: ento maeni saa mu, ku tego mi mudho.

Petro Kwero Yesu

⁵⁴ E gimake, man gipeye, gikele i ot pa jalam ma dit. Ento Petro lubo ng’eye ku cen.

⁵⁵ E ka gikudho mac i die pondot, man gibedo piny karacelo, nwang’u Petro bedo i kindgi.

⁵⁶ E nyaku moko m’enene kan ebedo i der mac, m’enene tel, ewacu kumae, Ng’atu maeni bende gibedo gikugi.

⁵⁷ Ento ekwero, ewacu kumae, Nyane, ang’eye ngo.

⁵⁸ Yo ku ng’eye nyanok ng’atu mange nene, ewacu de kumae, In bende in i ng’atu acel m’i kindgi. Ento Petro wacu kumae, Ng’atue, an ungo.

⁵⁹ Yo ng’ei kinde ma calu saa acel ng’atu mange yero ku tegocwinye, ewacu kumae, Andha ng’atu maeni bende gibedo gikugi; kum en e Jagalilaya.

⁶⁰ Ento Petro wacu kumae, Ng’atue, ang’eyo gin m’iyero ngo. E eni eni, kinde m’ebeyero, kulok ukok.

⁶¹ E Rwoth ulokre, man eneno Petro. E Petro poi kum lembe pa Rwoth, maram ewacu ko ire kumae, Tin ma fodi kulok kukok ungo ibikwera wang’ adek.

⁶² E ewok woko, eywak ku can m’apila.

Jucayu Yesu man Jufode

⁶³ E dhanu m’umaku Yesu gicaye, gicwanye.

⁶⁴ Man gitwio wang’e ku kitambala, e gipenje, giwacu kumae, Cu: ng’a m’ucwenyi?

⁶⁵ Man gin dupa mange giyero i kume, gicaye ko.

Yesu i Wang’ Dilo

⁶⁶ E ka piny uru, udul mi judongo mi dhanu gicokri karacelo, julam ma dongo ku jugorcik; e gipeye woko i dilo migi, giwacu kumae,

⁶⁷ Tek in i Kristu, wac iwa. Ento ewacu igi kumae, Tek awacu iwu, wubiyio ngo:

⁶⁸ man tek apenjowu, wubiloko lembe ngo.

⁶⁹ Ento ugambre I kawono Wod dhanu bijany yo ku cing’ ma yor acwic mi tego pa Mungu.

⁷⁰ E kagi ceke giwacu kumae, Ka kumeno in i Wod Mungu? Man ewacu igi kumae, Wuwacu nia an a en.

⁷¹ Man giwacu kumae, Can jumulembe mange negowa nedi? kum wan giwa wawinjo lembe i dhoge en.