Luka 20 - The Holy Bible In Alur (Lur) Revised Orthography

Penji pi Ng’ol ma Yesu Bedo Ko

¹ Man etimbre, i ceng’ acel ma kind wadi, kan ebeponjo dhanu i hekalu, ebeyero lembanyong’a ma juboth ko, julam ma dongo ku jugorcik man judongo de gibino i bang’e;

² man giyero, giwacu ire kumae, Wac iwa: Itimo gin maeni ku ng’ol manedi? Kadi en e ng’a m’umio iri ng’ol maeni?

³ Man eloko lembe ewacu igi kumae, An bende abipenjowu ku penji moko; man wuwac ira:

⁴ Baputisi pa Yohana, ai i polo kadi ba dhanu?

⁵ E giporo lembe i kindgi gigi, giwacu kumae, Tek wabiwacu kumae, Uai i polo; ebiwacu kumae, E ka nedi wuyie ngo?

⁶ Ento tek wabiwacu kumae, Uai ba dhanu; dhanu ceke bicanyuwa ku kidi: kum giyio nia Yohana en e jabila.

⁷ Gidwoko lembe, nia ging’eyo ngo ka m’eai i ie.

⁸ E Yesu wacu igi kumae, Kadok an de awacu iwu ngo nia ku ng’ol manedi m’atimo ko gin maeni.

Lembabola pi Podho mir Ulok ku Jutipodhone

⁹ Man emaku yero lembabola maeni ni dhanu: Ng’atu moko pidho podho mir ulok, emie de ni sumba ba jutipodho, man ecibedo i ng’om mange mi nindo dupa.

¹⁰ Man i nindo mi mwoka eoro jamiru ba jutipodho, kara gimi ire mwoka moko mi podho mir ulok: ento jutipodho gifode, giore edok mananu.

¹¹ Fodi eoro jamiru mange de: en bende gifode, gitime rac dit, giore edok mananu.

¹² Man eoro mir adege: en bende gitong’o lero i kume, e gibaye woko.

¹³ E rwoth mi podho mir ulok uwacu kumae, Abitimo ang’o? Abioro woda ma jamerna; kuno nyo gibijwigri ire.

¹⁴ Ento ka jutipodho ginene, giporo lembe i kindgi, giwacu kumae, Maeni jacampacu; dong’ wanegue, kara camupacu dong’ mwa.

¹⁵ E gibaye woko kud i podho mir ulok, ginege de. Ka kumeno rwoth mi podho mir ulok bitimo ang’o i kumgi?

¹⁶ Ebibino ebinyotho jutipodho maeni, ebimio podho mir ulok ba jumange. E ka giwinjo maeni, giwacu kumae, Kud ebed kumeno.

¹⁷ Ento eneno bang’gi, man ewacu kumae, Ka kumeno mae ang’o m’ugore kumae, Kidi ma jugomot ukwero, Eni jukethe wi guli?

¹⁸ Ku ba dhanu ceke m’upodho wi kidi maeno bitur nziki nziki; ento ng’atu ma tek ebipodho i wie, ebikethe pamir utur.

¹⁹ Jugorcik ku julam ma dongo giyenyo giketh cing’gi i kume i saa maeno nino; man gilworo dhanu: kum ging’eyo nia eyero lembabola maeni i kumgi.

Mio Ajok ni Kaisari

²⁰ E gioro julib de i bang’e, ma gipali gigi nia gi pwe, kara gimak lembe m’i dhoge, kara gimie ni tego ku ng’ol pa jabim.

²¹ Man gipenje, giwacu kumae, Japonji, wang’eyo nia iweco iponjo de cu, man ijolo ayi dhanu ngo, ento andha iponjo yo pa Mungu:

²² Cik uyio wami ajok ni Kaisari, kadi ungo?

²³ Ento eng’eyo riu migi, man ewacu igi kumae,

²⁴ Wuleng’ denarius anen. Ayi ng’a ku ramblembene de? Giwacu kumae, Pa Kaisari.

²⁵ E ewacu igi kumae, Ka kumeno, wumi ni Kaisari gin pa Kaisari, ni Mungu ke gin pa Mungu.

²⁶ E gicopo maku lem moko ngo i wang’ dhanu: e igi wang’ lii kum lembadwoka pare, man giling’.

Penji pi Cer

²⁷ Man Jusadukayo moko gibino i bang’e, gi ju ma giwacu nia cer umbe:

²⁸ gipenje, giwacu kumae, Japonji, Musa goro iwa, nia tek umin ng’atu moko tho, ma cege nuti, ma nyithindho de mbe kude, emaku ya umin ugam cege, man enyol nyithindho ni umin.

²⁹ Ka kumeno umego abiro nuti: e ma kwong’ane gamu dhaku, etho de ma nyithindho mbe kude;

³⁰ mir arionde de game:

³¹ mir adege de game; man gin abiro bende kumeno githo, ma giweko nyithindho ngo.

³² Yo ku ng’eye dhaku de tho.

³³ Ka kumeno i cer ebidong’ bedo ci ng’a m’i kindgi? kum gin abiro gigame ni dhaku igi.

³⁴ Yesu wacu igi kumae, Wot m’i ng’ombuni gigambri, jumio de mi nyom:

³⁵ ento ju ma jukwanu y a giromo ma ginwang’ ko ng’om maeno, ku cer ma kind ju m’utho de, gigambri ngo, jumiogi de ngo mi nyom:

³⁶ kum gicopo tho kendo ngo: kum girom rom ku malaika; man gi wot Mungu, ma gi wot mi cer.

³⁷ Ento nia ju m’utho cer, cil Musa enyutho, i ka Yen m’udinyo, kan elwong’o Rwoth nia Mungu pa Ibrahim, man Mungu pa Isak, man Mungu pa Yakobo.

³⁸ Nie en e Mungu mi ju m’utho ngo, ento mi ju ma kwo: kum dhanu ceke bedo ni kume.

³⁹ Jumoko ma kind jugorcik giloko lembe kumae, Japonji, iwacu dre.

⁴⁰ Kum tegocwiny umbe kugi ma gipenje ko ku penji mange.

Penji pi Wod Daudi

⁴¹ Man ewacu igi kumae, Giwacu nenedi nia Kristu en e wod Daudi?

⁴² Kum Daudi wacu en i kitabu mi Zaburi kumae, Rwoth uwacu ni Rwoth para kumae, Jany yo ku cinga ma yor acwic,

⁴³ Cil m’aketho ko jukwoji ni kom mi tiendi.

⁴⁴ Ka kumeno Daudi lwong’e Rwoth e, en e wode nenedi?

Yesu Kwero Kuratim mi Jugorcik

⁴⁵ Man i ith dhanu ceke ewacu ni julubne kumae,

⁴⁶ Wukuru giwu ni jugorcik, ma gimaru woth ma ku kendi ma lor lor, man gimaru moth de i katali, ku bedo ma i ka m’usagu i kacokri, ku bedo ma i ka m’usagu i agba;

⁴⁷ ma gicamu udi mi mon ma coggi tho, man gitimo rwo ma bor ni abombi: joni binwang’u lembapoka ma rac ma dit m’usagu.