Luka 18 - The Holy Bible In Alur (Lur) Revised Orthography

Lembabola pi Dhaku ma Cware Tho ku Japoklembe

¹ Man eyero lembabola igi nia dong’ girwo thiri thiri, cwinygi kud uai;

² ewacu kumae, Japoklembe nuti i adhura, ma lworo Mungu ngo, eparu pi dhanu de ngo:

³ man dhaku ma cware tho nuti i adhura maeno; ebino i bang’e de wang’ udul, ewacu kumae, Cul wang’ lembe para kum jadegina.

⁴ E eyio ngo nindo moko: ento macen ewacu i ie gire kumae, Kadok alworo Mungu ngo, kadi aparu pi dhanu de ngo;

⁵ ento kum dhaku maeni besenda, abiculo wang’ lembe pare, kara kud eola ku bino pare ma thiri thiri.

⁶ Man Rwoth uwacu kumae, Wuwinj lembe ma japoklembe m’ugondre yero.

⁷ E Mungu biculo wang’ lembe mi ju m’egoyo wigi ngo m’uywak i bang’e dieceng’ ku diewor, ento fodi etwio cwinye i kumgi?

⁸ Awacu iwu, nia ebiculo wang’ lembe migi pio. Karacelo ku maeni, ka Wod dhanu bino, ebinwang’u yioyic i ng’omi?

Lembabola pi Jafarisayo ku Won Ajok

⁹ Man eyero lembabola maeni ni ju m’ugendri gigi nia gi pwe, man gicayu jumange ceke:

¹⁰ ewacu kumae, Juario idho malu i hekalu nirwo; ng’atu acel en e Jafarisayo, jalwadi ke won ajok.

¹¹ Jafarisayo cungo man erwo kumeno i ie gire, Mungu, afoii, kum a calu dhanu mange ngo, ma weg kuvuga, weg gondri, ma weg gier, kadi calu won ajok maeni de ngo.

¹² Aweko cam wang’ ario i yenga acel, amio apaje mi gin ceke m’anwang’u.

¹³ Ento won ajok, ucungo bor cen, eyio ting’o wang’e malu i polo de ngo, endre edhongo kore, ewacu kumae, Mungu, dong’ kisa negi i kuma an a jadubo.

¹⁴ Awacu iwu kumae, Ng’atu maeni loro piny i ot pare ma lembe m’i wie gonjre ma sagu pa jalwadi: kum ku ba dhanu ceke m’uyungre gire jubijwige; ento ng’atu m’ujwigre gire jubiyunge.

Yesu Mio Mugisa wi Nyithindho

¹⁵ Man gikelo mukere migi i bang’e bende, kara emul kumgi: ento ka julubne gineno, gijukogi.

¹⁶ Ento Yesu lwong’ogi i bang’e, ewacu kumae, Wuyi nyithindho ma thindho gibin i bang’a, kud wukwergi: kum ker pa Mungu en e mi wagi joni.

¹⁷ Andha awacu iwu kumae, Ng’atu ma tek bijolo ker pa Mungu calu nyathin ma nok ungo, ebimondo i ie ki ngo.

Jabim ma Jalawobi ma Jalonyo

¹⁸ Jabim acel upenje, ewacu kumae, Japonji ma ber, abitimo ang’o kara acam pacu mi kwo ma rondo ku rondo?

¹⁹ E Yesu wacu ire kumae, Nedi ilwong’a ya a beri? ng’atu moko mbe ma ber, ndhu acel kende, en e Mungu.

²⁰ Ing’eyo lembang’ola, Kud igier gier, Kud ineg nek, Kud ikwal kwo, Kud ibed jamulembe mi ndra, Yung wuru ku meru.

²¹ Ewacu kumae, Gin maeni ceke aworo ugambre m’a nyathin.

²² E ka Yesu winjo maeni, ewacu ire kumae, Lembe acel nuti m’irem i ie: lok gin ceke m’ibedo ko, pok ni jucan, e ibibedo ku piny m’akana i polo: man ibin, ilub ng’eya.

²³ Ento kan ewinjo lem maeni, can umake dit; kum elony dit.

²⁴ Ka Yesu nene ewacu kumae, Mondo i ker pa Mungu tek apila ni julonyo!

²⁵ Kum mondo ku wang’ sindani e yot ni ngamia, ma sagu mondo i ker pa Mungu ni julonyo.

²⁶ Ju m’uwinjo maeni giwacu kumae, Ka kumeno ng’a ma copo bothi?

²⁷ Ento ewacu kumae. Gin ma copre ngo ni dhanu copre ni Mungu.

²⁸ E Petro wacu kumae, Nen, waweko piny mwa ceke, walubo ng’ei.

²⁹ Man ewacu igi kumae, Andha awacu iwu, Ng’atu moko mbe m’uweko ot, kadi dhaku, kadi umego, kadi junyodo, kadi nyithindho, pi ker pa Mungu,

³⁰ m’ekebinwang’u wang’e bang’ dupa ngo i nindo maeni, man i ng’om m’ubino kwo ma rondo ku rondo.

Yesu Nyutho pi Tho Pare Wang’ mir Adege

³¹ Man egamu juapar wi ario i bang’e, ewacu igi kumae, Nen, wabeidho malu Yerusalem, man gin ceke m’ugore ni kum jubila bitimbre kakare kum Wod dhanu.

³² Kum jubicibe ni Thekdhanumange, e jubing’ale, man jubiyenye ku rop, jubing’ulo lau de i kume:

³³ e jubifode man jubinege: man i ceng’ mir adege ebicer kendo.

³⁴ Man ging’eyo gin maeni ngo; thelembe maeni de mungre igi, man ging’eyo ngo thelembe ma juyero.

Wang’ Ng’atu M’abinga Uyabre

³⁵ Man etimbre, kan edhingo Yeriko, nwang’u ng’atu acel ma abinga bedo dhu yo ebekwayu piny:

³⁶ e kan ewinjo udul dhanu bekadhu, epenjo nia mae ang’o.

³⁷ Man giwacu ire, nia Yesu ma Nazareti bekadhu en.

³⁸ Man ekok, ewacu kumae, Yesu, i wod Daudi, bed ku kisa i kuma.

³⁹ E ju m’utelo yo gijuke, nia ebed ling’: ento ekok ma sagu dit kumae, I wod Daudi, bed ku kisa i kuma.

⁴⁰ E Yesu cungo, man eng’olo ya jukele i bang’e: e kan ewok ceng’ni, epenje kumae,

⁴¹ Iyenyo atim ang’o iri? Ewacu kumae, Rwoth, kara nenopiny unendre ira.

⁴² E Yesu wacu ire kumae, Nenopiny udwog i beng’i: yioyic peri e m’ubodhi.

⁴³ E eni eni emaku neno piny, elubo ng’eye de, ku yungo Mungu: man dhanu ceke, ka gineno maeni, gimio pak ni Mungu.