Luka 17 - The Holy Bible In Alur (Lur) Revised Orthography

Gin ma Ketho Jukier

¹ Man ewacu ni julubne kumae, Gin ma ketho dhanu kier bikowok be: ento can wi ng’atu, m’ebiwok ni kume!

² E ber ire ma tek jung’abu pom i ng’ute, jubaye ko i nam, sagu ma tek eketho kind nyithindho ma thindho maeni ukier.

³ Wukuru giwu: tek umeru dubo, juke; man tek eloko cwinye, wek lembene woko ire.

⁴ Man tek edubo iri wang’ abiro i ceng’ acel, elokre kendo i beng’i wang’ abiro, ewacu kumae, Aloko cwinya; wek lembene ire.

Med Yioyic Mwa

⁵ E jukwenda wacu ni Rwoth kumae, Med yioyic mwa.

⁶ E Rwoth uwacu kumae, Tek wubedo ku yioyic ma ro ku nying atingli, nwang’u wuwacu ni ulemo mae kumae, Fudhri woko, man icidh ipidhri i nam; kuno di eworowu.

Tic pa Jamiru

⁷ Ento ng’a ma ni i kindwu, m’ubedo ku jamiru ma furo fur kadi m’ekwayu rombe, ma biwacu ire, kan eai i thim kumae, Bin pio ibed dhu cam;

⁸ ma sagu ebiwacu ire kumae ngo, Yik cam m’abicamu, man itwiri giri, itim ira, cil m’acamu amadhu de: e macen ibicamu ibimadhu de?

⁹ Emio foyofoc ni jatic kum etimo gin ma jung’olo ire?

¹⁰ E wun bende kumeno, ka wubidaru timo gin ceke ma jung’olo iwu, wuwac kumae, Wa jumiru ma kulokawa mbe; watimo gin ma maku watim.

Yesu Lonyo Kum Weg Joi Apar

¹¹ Man etimbre, ka gini i yo ma gibecidho ko Yerusalem, nia ebekadhu ku kind Samaria ku Galilaya.

¹² E kan emondo i pacu acel, erombo ku weg joi apar, m’ucungo bor cen:

¹³ e giting’o dwandgi malu, giwacu kumae, Yesu, Japonji; bed ku kisa i kumwa.

¹⁴ E kan enenogi, ewacu igi kumae, Wucinyuthru ni julam. E etimbre, ka gicidho, kumgi doko leng’.

¹⁵ E ng’atu acel m’i kindgi, kan eneno nia kume kei, edok ku paku Mungu ku dwande ma tek;

¹⁶ epodho arieba wang’e the tiende, ku mio ire foc: man e Jasamaria.

¹⁷ E Yesu loko lembe ewacu kumae, Juapar kumgi doko leng’ ungo? ento juabung’wen gini kani?

¹⁸ Ng’atu moko mbe ma junwang’u udwogo nimio yung ni Mungu, ndhu jakamange maeni?

¹⁹ Egam ewacu ire kumae, Ai malu icidhi: yioyic peri e m’ubodhi.

Ker pa Mungu Bino

²⁰ Ka Jufarisayo gipenje, nia ker pa Mungu bino awene, eloko lembe igi ewacu kumae, Ker pa Mungu bino ndem ndem ungo:

²¹ kadok awaca de gibiwacu ngo kumae, Nen, keni! kadi, Kaca! kum nen, ker pa Mungu ni i iwu.

²² Ewacu ni julubne kumae, Ceng’ bibino, ka wubiyenyo wunen kind ceng’ acel pa Wod dhanu, ere wubinene ngo.

²³ Gin de gibiwacu iwu kumae, Nen, kaca! Nen, keni! kud wuci kamoko, kadi kud wulub ng’eigi:

²⁴ kum calu lukoth, kan emil yo the polo kurucel, eriedo de yo the polo ma kurucel; e Wod dhanu de bibedo kumeno i ceng’ pare.

²⁵ Ento elar ekoesendre be ku gin dupa man dhanum’utuk maeni de ukwere.

²⁶ Calu etimbre i rundi pa Noa, e ebibedo kumeno de i ceng’ pa Wod dhanu.

²⁷ Gicamu, gimadhu, gigambri, giwodho mi nyom, cil i ceng’ ma Noa mondo ie i avur, epi ma dit ucore, man enyothogi ceke.

²⁸ Ebedo kumeno cil calu etimbre i ceng’ pa Lot; gicamu, gimadhu, ging’iewo, giloko, gipidho, gigomo:

²⁹ ento i ceng’ ma Lot uai i ie ku i Sodom, mac ku muganga ai i polo ucwi, unyothogi ceke:

³⁰ ebibedo kumeno i ceng’ ma Wod dhanu nyuthre i ie.

³¹ I ceng’ maeno, ng’atu m’ubedo wi ot, jamni pare ke ni i ot, kud elor piny nilabugi woko: ng’atu ma ni i thim de kumeno kud edok cen.

³² Wupoi kum ci Lot.

³³ Ng’atu ma tek biyenyo egwok kwo pare ebirwinye: ento ng’atu ma tek birwinyo kwo pare ebigwoke.

³⁴ Awacu iwu kumae, I diewor maeno jumaco ario bibedo wi kavuto acel; jubigamu acel, wadi ke jubiweko.

³⁵ Mon ario birego karacelo; jubigamu acel wadi ke jubiweko.

³⁶ Co ario bibedo i thim; acel bikabre, man wadi bidong’.

³⁷ Gidwoko lembe giwacu ire kumae, Kakani, Rwoth? Man ewacu igi kumae, Ka ma kum ni i ie, acuth bicokri ie karacelo.